Kimbu Keri Lierimu Ye Tenga Temanemo
Akumunge, Kimbu Keri Lierimu Ye Te Pitane Tepa Konde Lsimu Temanemo
3
(Pulu Yemonga ungumu. Kolomongo-kanga wane.)Yemboma ˻Pulu Yemo popo toko kaloringi˼ ulke-tembelena ena tere killoko Pulu Yemo-kinie alieli ungu niringi mele walse Pita kinie Jonoselo kanu enamonga Pulu Yemo-kinie ungu ningelendo puringili. 2 Kimbu keri lierimu ye te akune molorumu. Anumuni merimu kinie kimbu keri lielimu merimu. ‘Yu yembo ongo ulke-tembelena sukundu pungema mawa tepa “Kou-mone siee!” nipili!’ ningu alieli mengo ongo ulke-tembele kerepulu te ‘Paa Peangamo’ ningu imbi lieringine mondoringi. 3 Yu akune molopili Pita Jonoselo ongo ulke-tembelena sukundu pungele puringili kinie yuni elo mawa tepa “Kou mare siele!” nirimu. 4 Pita kinie Jonoselone yu neme-neme ningu kanokololie Pitane nimbendo: “Nuni olto kanou!” nirimu. 5 Kanu-kinie ‘Kou singelendo nikimbili.’ konopu lepalie elo kanorumu.
6 Kanu-kinie Pitane nimbendo: “Na kou telu kepe paa naa mendu nalo mélte mekeromo nu siembo! Akumu kolea-kanga Nasarete-Yea Yesusi Kirasinge tondolomoneb ‘Nu ola angilku andou!’ nikiru.” nirimu. 7 Aku nimbelie yunge ki-umbukundu ambolopa lipe ola anjerimu kinie walsikele yunge kimbuselo enge nirimu. 8 Yu pukue topa ola pupe ola angilipe pulu polopa andopa molorumu. Aku tepalie yeselo-kinie pea tapú-toko ulke-tembelena sukundu puringi. Yu kimbu kambilipe pukue tolipe Pulu Yemo kapi nilipe sukundu purumu.
9 Yu kimbu kambilipe Pulu Yemo kapi nilipe orumu yembomane pali kanoringi. 10 Enone kanokolie, ‘Yu alieli ulke-tembele kerepulu ‘Paa Peangamo’ níline manie molopa kou mawa telemo ye kanumu okomo lemo.’ ningu kanoko pungu-pungu ningu mini-wale mundoringi.
Pitane Ulke-Tembelena Ungu-Mane Sirimu Temanemo
11 Kimbu keri lierimu yemo ola angilipe Pita Jonoselo ambolorumu kinie kanokolie yemboma pali mini-wale munduku lkisiku ongo ulke-tembelena ‘Sollomononga’ ningu ulke-kerepulu takoko yando lsingine Pita Jonoselo kinie kimbu keri lierimu yemo kinie moloringine eno ongo máku toringi.c 12 Aku teringi kinie Pitane kanopalie enondo nimbendo:
“Isirele-yemboma, nambemu-ne i ulu wendo okomomo kanoko konopu awisili liku mundukumiliye? Nambemu-ne enone olto neme-neme ningu kanokomeleye? Oltone oltonga tondolo tene “I yemo ola angilipe pupili!” ningili konopu lekemeleye? Paa mólo! Molo oltone Pulu Yemone kanopa peanga kanolemo ulu-pulu telembolomo-ne i yemo teko konde lingili konopu lekemeleye? Paa mólola! 13 Eporayamo keme Aisake keme Jekopo keme olionga anda-kolepalimene “Olionga Pulu Yemo.” ningu popo toringi Pulu Yemo, yuni yunge kendemande Yesusinge imbi lipe ola mundundorumu. Aku yemo eno Isirele-yembomane “Yu toko kondangi!” ningu yu Romo-gapomano yema liku siringi. Kanu-kinie Romo ye-nomi Paillatene “Yu ulu te temu nimbu naa kanokoro. Yu pupili!” nirimu nalo enone “Yu toko kondangi!” ningu liku bulu siringi. 14 Ye Kake Tepa Sumbi Nilimu liku bulu siku, “Yu kolopili toko kondangi!” ningu, yemboma topa kondoli ye Barapasi ka-ulkena “ ‘Kolo wangopa wendo pupili!’ ni!” niringi. 15 Konde mololi ulumunge pulu yemo toko kondoringi nalo Pulu Yemone yembo-óno-koleana topa makinjinderimu. Oltone aku terimu mele kanorumbulu. 16 ‘Yesusini manda lipe tapondomba.’ nimbu tondolo-mundupu piliembulumunge i ye eno kanoko imbi silimele yemo konde pukumu. ‘ ‘Yesusi-kinie tondolo pelemo.’ nimbu pilipu yu imbi lepo walsipulu, yuni i yemo manda ‘Konde pupili!’ nimbé.’ nimbu tondolo-mundupu piliembulumunge i yemo konde pumu mele enone kanokomele.
17 “Sike, angokeme, eno kinie enonga nokoli-yema kinie pilku sundukulie Yesusi toko kondoringi. 18 Nalo talko wendo orumu mele ou Pulu Yemone ‘Wendo opili!’ nirimu mele wendo orumu. Yuni pe wendo ombá mele yunge ungu-umbu tondorumume pilku yemboma ningu siringi yemando nimbendo: “Nane eno nokopa kondomba ye te makó topo lipu mundumbo ye-nomi Kirasimud mindili nombá.” nirimu kanu-mele eno nanga ungumu pilkimilimene paa sike talko yu toko kondoringimu wendo orumu.e
19 “Akumunge, kinié teko kenjeringi mele pilku keri pilku konopu alowa teko, Pulu Yemo molemona wangi! ‘Pulu Yemone olionga ulu-pulu-kerime kamu mundupe siye kolondopili!’ ningu aku teangi! Aku tenge kinie Awilimunif eno konopu pe nimbe enge nipili molonge walema sipe, 20 eno molongena yuni “Eno nokopa kondomba ye te lipu mundumbo.” nimbe mako torumu ye-nomi Kirasimu eno simbe. Simbe ye akumu Yesusi.
21 “Pulu Yemone ‘Mélema pali konde pupili!’ nimbé walemo wendo ombámonga kinié isili-ou Yesusi yu mulú-koleana nokopa molemo. Ou Pulu Yemone aku-sipe nimbe panjerimu mele yunge ungu-umbu tondorumume pilieringi ye kake telimene aku-siku yando ningu siringi kanumu.g 22 Akumunge Mosisini nimbendo:
“Awilimu enonga Pulu Yemone
ungu-umbu tondolemoma pilipu
eno nimbu silio yemo molio-mele
pe enonga ye te na-mele
‘Pulu Yemone ungu-umbu tondombama
pilipe nimbe simbe ye te molopili!’ nimbe
mako tomba.
Aku ye ombámo yuni nimbé mele eno paa pilku liengi!
23 Aku yemonga ungumu naa pilinge yemboma
Pulu Yemo yunge talapena ‘Naa molangi!’ nimbe
Pulu Yemo yuni eno topa kondomba.”h
nimbe Mosisini nirimu. Ungu-Manema 18:15,18,19
24 “Kinié wendo okomo akumu Pulu Yemone ungu-umbu tondorumume pilku yemboma ningu siringi yemane pali ungu ningu siringi mele kinié wendo okomo. Ye Samuele kinie, Pulu Yemone ungu-umbu tondorumume pilipe yemboma nimbe sirimu yandopa-yandopa moloringi ye wemane pali aku-siku niringi. 25 Pe kinié Pulu Yemone ungu-umbu@tondorumume pilku yemboma ningu siringi yemane wendo ombá ou niringi ungume kinié wendo okomomo ‘Enonga.’ nimbe wendo okomo. Ou enonga anda-kolepalime-kinie Pulu Yemone nimbe panjipe mi lierimu ungumui kinié ‘Enonga.’ nimbe wendo okomo. Pulu Yemo yuni enonga ou-pulu-pulu anda-kolepa Eporayamondo nimbendo:
“Nuni kalko lini ye tene tembamonga
mana-yemboma pali molko kondonge.”j
nirimu. 26 Pulu Yemone yunge kendemande-yemo mana manie lipe mundumbendo ‘Eno Juda-yemboma lipe tapondopili!’ nimbe ‘Eno Juda-yemboma teko kenjilimele ulume kanoko keri kanoko munduku siye kolangi! Eno yu-mele-mele konopu alowa tendepili!’ nimbe eno molongine yunge kendemande-yemo yu ou kumbi-lepak lipe mundomu. ‘Kanu yemone eno aku-sipe sewe anjepili!’ nimbe Pulu Yemone aku terimu.” nimbe Pitane nirimu.