Pulu Yemonga Mini Kake Telimu Manie Orumu Temanemo
2
(Pulu Yemonga ungumu. Kolomongo-kanga wane.)˻Yesusi kolorumu koro yepoko-pakera omba purumu kinie˼ Juda-yemboma mako toko Pulu Yemo-kinie ulu te teringi wale ‘Pendikosi’ nilimua wendo orumu. Aku walemonga Yesusi lombili andoli yemboma kolea telune máku toko moloringi. 2 Walsikele ungu te, poporome awili ungu nilimo mele, mulúne-ola manie orumu, kanu mélemo ulkena moloringi yembomane pali pilieringi. 3 Mélema, tepe-alumbelu mele, wendo orumu kanoringi, aku mélema pupe yembomanga pali ˻pengena˼ telu-telu nimbe pupe molorumu. 4 Kanu-kinie Mini Kake Telimu Yesusi lombili andoli yembomanga konopune sukundu omba molopa kapola terimu. Kanu-kinie Minimuni eno yu-mele-mele ‘Umbu-ungu lupe-lupema kerena niengi!’ nimbe konopume sumbi sirimu kinie eno umbu-ungu ou naa niringi lupe-lupema pulu polko ninge niringi.
5 Juda-yembo mare ou ongo kolea-awili Jerusalleme máku toko moloringi kinie aku ulumu wendo orumu. Eno Pulu Yemonga ungu pilieli yemboma. Eno ma-koleana yembo lupe-lupema pea pali molkolie kanu yemboma munduku siye kolko Jerusalleme sukundu oringi. 6 Kanu poporome awili-mele ungumu pilkulie kanu yemboma máku tokolie enonga umbu-ungu lupe-lupema Yesusi lombili andolimene niringi pilkulie eno konopu awisili liku mundoringi. 7 Eno suru ningu konopu awisili lekolie ningendo:
“A, i yemboma umbu-ungu lupe-lupe nikimilime eno kolea Gallilli-Disiriki yemboma mindinje? ˻Gallilli-yembomane ungu telumu mindi nilimele kanumu.˼ 8 Pe kinié olionga ya yu-mele-mele umbu-ungu lupe-lupe nilimoloma nambeko pilkulie nikimili-ne olio pilkimuluye?
9-11 “Olio kolea Patia kinie, kolea Midia kinie, kolea Illame kinie, kolea Mesipotemia kinie, kolea Judia kinie, kolea Kapadosia kinie, kolea Pondasi kinie, kolea Esia kinie, kolea Pirisia kinie, kolea Pambillia kinie, kolea Isipi kinie, kolea LLipiab sukundu Sairini nondopa lemo koleama kinie, kolea-awili Romo kinie, kolea Kiriti kinie, kolea Arepia kinie, aku kolea lupe-lupemanga pali molopo omulu yemboma molemolo. Olio Juda-yemboma kinie yembo lupe molopo Juda-yembomanga ulu-pulu alowa tepo telemolo yemboma kinie, olio yu-mele-mele olionga umbu-ungumene Pulu Yemone ulu-tondoloma telemo ulumendo nikimili pilkimulu.” niringi.
12 Eno suru ningulie ‘Pilipu sundukumulunje?’ ningu pilkulie, anjo-yando kere-pale ningulie “Imunge ulu-pulumu nambolkamoye?” niringi. 13 Nalo yembo marene ungu-taka tondokolie ningendo: “I yema no-tondolo nongolie kekelepo tokomele.” niringi.
Pitane Yemboma Ungu Nimbe Sirimu Temanemo
14 Kanu-kinie Pita, ˻Yesusini lipe mundorumu ye˼ rureponga yepoko wema kinie pea ola angilkulie, yuni yembomando tondolo-mundupe nimbendo: “Olionga Judia-yemboma kinie, eno Jerusalleme molemele yemboma kinie, i wendo okomo tekemolo ulumunge pulumu eno nimbu siembo, mimi-siku komu tendeko piliengi!” nirimu. 15 “ ‘Olio kekelepa tokomolo.’ ningu pilkimili akumu mólo! Kinié ipulueli-ou nani killoko mindi, aku-kinie yemboma no naa nolemele kanumu. 16 Kinié wendo okomo ulumundu Pulu Yemone ungu-umbu tondorumume pilipe yemboma nimbe sirimu yec Joelene pe wendo ombá mele ou nirimu. Yuni nirimu mele i-sipe:
17 “Pulu Yemoned nimbendo:
“Kolea pora nimbé walema wendo ombá kinie
nane nanga Minimu yemboma pali simbo.
Kanu-kinie enonga lemenali-marenalini
nanga ungu-umbu tondomboma pilku
yemboma ningu siku,
enonga ye-andamane uru-kumbu teko,
enonga ye-kangomane ongo angilieli none temba
kumbi-kere lipe pinjimbe ulume kanonge.
18 Nanga kendemande ambo-yema kepe
nanga Minimu simbo kinie nanga ungu-umbu
tondomboma pilku yemboma ningu singe.
19-20 Awilimunge wale awilimu ou wendo naa opili
nane mulúne-ola kinie mana-manie kinie
˻walema pora nimbé˼ lipe ora simbe ulu-tondolomae
‘Eno kanangi!’ nimbu tembo.
‘Mana meme kinie tepe kinie ilie awili kinie,
aku ulu-tondoloma tepili!’ nimbo.
‘Mulúne enamo sumbulu topa olimu meme tepili!’ nimbóla.
21 Kanu-kinie Awilimunge wale awilimu
kamu wendo ombá kinie yembomane isili-ou
Awilimunge imbi lekof walsinge yemboma
nane lipu tapondopo
mindili nolemela aulkena wendo lipu
na-kinie molko kondonge aulkena
lipu mondombo.” nimbeg
Pulu Yemone nimu.”h Joele 2:28-32
nimbe Joelene aku-sipe nirimu.
22 “Eno Isirele-yemboma, eno i ungu nimbo tekeromo pilieyo!
‘Kolea-Nasarete ye Yesusi ‘Yu sike Pulu Yemone makó topo lipe mundorumu.’ ningu kanangi!’ nimbe Pulu Yemone yu lipe tapondorumu kinie eno moloringine yemboma lipe ora sirimu ulu-tondoloma terimu. Akumu eno kanoko pilieringi. 23 Enone kanu yemo-kinie pe tenge mele Pulu Yemone ou pilipe molorumu. Pulu Yemone ‘I-sipe wendo opili!’ nimbe pilipelie i yemo eno Juda-yemboma sirimu kinie ‘Teko kenjeringi yembomane olio liku tapondoko yu toko kondangi!’ ningu eno siringi, enone ‘Yu kolopili!’ ningu unjo-perana pirimúni toko uku toko panjeringi kolorumu.i 24 ˻Aku teringi˼ nalo Pulu Yemone ‘Yu kamu mana-manie naa pepili!’ nimbe topa makinjinderimu. Kololi ulu-pulumuni yu ka sipe kamu manda naa ambolombamonga mindili nongo kolemele mindilimenga pali Pulu Yemo yuni yu lipe tapondopa wendo linderimu.
25 “Depisi yuni kepe yu i yemo pe temba mele ou ungu te nirimu mele i-sipe:
“Awilimu nanga kumbikerena
alieli molorumu kanorundu.
Yu na lipe tapondombando
nanga ki-umbukundu molemomonga
méltene umbune na manda naa simbe.
26-27 Akumunge na kamele akopo molopo,
nanga kerena konopu sipu ungume nilio.
Nuni nanga minimu yembo kolko pulimele koleana
munduku siye naa kolko, nunge Ye Kake Telimunge ónomo
‘We puropili!’ naa nini akumunge pilipulie,
‘Nanga kangimu kinie minimu kinie
na méle peangamo limbo.’ nimbu nokopo molio.
28 Nuni na konde molopo mindi pumbo aulkemo
liku ora sirinu,
nu na-kinie tapu toko molonimunge
na konopu awisili simbo.”j Konana 16:8-11
nimbe Depisini aku-sipe nirimu.
29 “Angokeme, i ungumu sike nikiru. Olionga anda-kolepa Depisi koronga-ou kolorumu óno teringi, yunge óno-koleamo olionga koleana lierimu we lemó. Aku liemu yuni ‘Nunge Ye Kake Telimunge ónomo ‘We puropili!’ ni naa nini.’ nirimumu yu-yuyundu naa nirimu lémo. 30 Nalo yu Pulu Yemone ungu-umbu tondorumume pilipe yemboma nimbe sirimu yemo molopalie, Pulu Yemone “Nuni kalko lini ye te nu kolo wangopa ye-nomi-kingimu molomba.”k nimbelie “Paa sike aku tembo.” nimbe tondolo-mundupe nirimu mele pilierimu. 31 Depisi ˻yu Pulu Yemone ungu-umbu tondorumume pilipe yemboma nimbe sirimu yemo molopa˼ pe wendo ombá mele ou pilipelie nimbendo:
‘Pulu Yemone yunge minimu
yembo kolko pulimele koleana
mundupe siye naa kolopa,
yunge ónomo naa purumbe.’l Konana 16:10
nirimu akumu Pulu Yemone makó topa lipe mundorumu ye-nomi Kirasimum kolopalie kelepa lomboropa ola molombamondo nirimu. 32 Pulu Yemone i ye Yesusi sike topa makinjinderimu, akumu olio kanorumulu mele nikimulu.
33 “Topa makinjindipelie yunge ki-umbukundu lipe mondorumu. Akune molopalie Lapane ou “Simbo.” nirimu Mini Kake Telimu yu sirimu, lipelie, kinié yando sikimu. Kinié kanoko pilkimilimu yuni sikimumu kanoko pilkimili. 34-35 Depisi mulú-koleana olando naa purumu nalo yuni nimbendo:
“Awili ˻Pulu Ye Yawene˼
nanga Awilimundu nimbendo:
“‘Nunge opa-puluema nuni nokani!’ nimbu,
pe eno topo manie mundundumbo kene
isili-ou nu ˻na-kinie pea tapú-topolo
ye-nomiselo molopolo mélema nokambili˼
nanga ki-umbukundu ongo molani!” nirimu.”n Konana 110:1
nimbe Depisini nirimu.
36 “Akumunge Isirele-yemboma eno pali i-siku piliengi:
I ye Yesusi enone ˻“Kolopili!” ningu˼ unjo-perana uku toko panjeringimu Pulu Yemone “Yu Ye Awilimu kinie, yu ‘Yemboma nokopa kondomba ye te lipu mundumbo.’ nimbu mako torundu ye-nomi Kirasimu molopili!” nirimu yemo molemo.” nimbe Pitane nirimu.
Yembo Paa Awisili Konopu Alowa Teko No Lsingi Temanemo
37 Pitane enone aku-siku teringi mele nirimu ungumu pilkulie yemboma mini-wale mundukulie enone Pita kinie Yesusini “Nanga kongonomo tende-paa!” nimbe lipe mundorumu yeo wema kinie enondo ningendo: “Angokeme, kinié olio nambe-eamiliye?” niringi.
38 Pitane enondo nimbendo: “Eno ‘Pulu Yemone olionga ulu-pulu-kerime kanopa konde tendepili!’ ningu teko kenjilimele mele pilku keri pilku, konopu alowa teko, ‘Na Yesusi Kirasinge yembomo molambo!’ ningup no liengi! Aku tenge kinie Pulu Yemone Mini Kake Telimu eno we simbe lingela. 39 Pulu Yemone ‘Mini Kake Telimu simbo.’ nirimu akumu eno kinie enone kalko linge yemboma kinie yembo kolea sulumenga molemele molongema kinie enondo pali nirimu. Awilimu olionga Pulu Yemo yuni ‘ ‘Nanga yemboma molangi waa!’ nimbo yemboma pali Mini Kake Telimu simbo.’ nirimu.” nimbe Pitane nirimu.
40 Pitane ungu lupe-lupe awisili tondolo-mundupe eno liepi-liepi topalie nimbendo: “Ya mana-yembo molko kenjilimelemanga Pulu Yemone eno umbune simbe tekemo kene yuni ‘Olio umbune naa sipili!’ ningu, pilku kondoko molaa!” nirimu.
41 Kanu-kinie Pitane nirimu ungumu pilku lsingi yemboma no lsingi. Kanu walemonga Yesusinge ungumu ‘Sike.’ ningu tondolo-munduku pilieringi yembo talapemonga sukundu yembo tausini yepoko meleq olandopa purumu. 42 Kanu-kinie ungumu pilku liku no lsingi yemboma Yesusini “Nanga kongonomo tende-paa!” nimbe lipe mundorumu yemane ungu-mane siringime pilku, angenupili-kinie telune kapola-kapola molko, pea tapú-toko langi nongo,r Pulu Yemo-kinie ungu ningu moloringi.
Kirasinge Yemboma Kapola-Kapola Moloringi Mele Temanemo
43 Yesusini “Nanga kongonomo tende-paa!” nimbe lipe mundorumu yema Pulu Yemone lipe tapondorumu kulu lipe ora sirimu ulu-tondoloma teringimunges kanokolie yemboma pali pipili koloringi. 44 ‘Yesusi yu sike ˻Pulu Yemone “Yemboma lipe tapondopa nokopa kondomba.” nimbe mana lipe mundorumu ye-nomi Kirasimu.’˼ ningu tondolo-munduku pilieringit yemboma pali telune molko, enonga mélema enono yu-mele-mele naa nosiku, ‘Olionga pea’ ningu nosiku kapola-kapola moloringi. 45 Enonga ma kinie méle noseringime makete teko kou liku méle mólo torumu yemboma kou moke teko siringi.u 46 Alieli ˻Pulu Yemo popo toko kaloringi˼ ulke-tembelena puku máku toko, enonga ulkemanga pali pea andoko ‘Langi pea namili!’ ningu, konopu peanga pepili konopu siku langi nongo, 47 Pulu Yemo kapi ningu imbi liku ola mundunduku, moloringi. Yembomane pali eno kanoko peanga kanoringi.v Ulu-pulu-keri kanoko keri kanoko konopu alowa teko Yesusindu “Mindili nolka aulkena naa pambo kene liku tapondou!”w niringi yemboma Awilimuni ‘Yunge yemboma molangi!’ nimbe taki-teki sukundu-sukundu lsimu.x