˻Yesusini yunge lombili andolimendo kelepa nimbendo:˼

“Eno konopune umbune tepili mini-wale munduku naa molayo! Pulu Yemone eno ‘Sike ˻nokopa lipe tapondomba˼.’ ningu tondolo-munduku piliengi! Nane eno ‘Sike ˻nokopa lipe tapondomba˼.’ ningu tondolo-munduku piliengila! 2 Nanga Tatanga ulkena suluminia awisili lemo. Naa lelkanje nane enondo “Naa lemo.” nimbu, nimbu silke. Nalo sike lemomonga nane enonga molonge koleamo pupu tepo mimi tende-pukuru.^a 3 We naa-la tendembo. Enonga molonge koleamo pupu tepo mimi tendepolie nimbomone, pe na molombona ‘Eno pea molamili!’ nimbu eno ombo limbo. 4 Pumbo koleamonga aulkemo eno kanolemele.” nirimu.

5 ˻Lombili andoli ye˼ Tomasini yundu nimbendo: “Awilimu,^b nu puni koleamo olio naa kanolemolo. Pe kinié olio aku koleamonga aulkemo nambepo kanolemoloye?” nirimu.

6 Yesusini yundu nimbendo: “Na aulkemo, na sike-ungumu, na konde molko mindi punge ulu-pulumu.^c Yembo te Tata molemona pumbendo na molombona mindi manda ombá. Aulke te-lupe mólo! 7 Enone na pilku kondoko molemelanje Tata pilimela-la. Nalo kinié nimbu sikiru kinie Tata yu pulu polko kanoko imbi sikimili.” nirimu.

8 ˻Yu lombili andoli ye˼ Pillipuni yundu nimbendo: “Awilimu, Lanie liku ora siyo! Kanopolie olione “Manda.” nimolo.” nirimu.

9 Yesusini yundu nimbendo: “Pillipu, eno wale awisili na pea molemolo nalo na Tata-mele molio naa pilimele lemo. Na kanolemelemane Tata kanolemele. Pe kinié “Tata liku ora si!” nikinu akumu nambemune nikinuye? 10 Na Tatanga konopune sukundu molopo yu-kinie tapú-topo molio, yu nanga konopune sukundu molopa na-kinie tapu topa molemo, kanumu nane ‘Kolo topa nilimo.’ ningu pilimeleye? Ungu enondo nilioma nanga nanu konopuni pilipu naa nilio. Tata nanga konopune sukundu molopalie nane telio ulume yuni mindi telemo. 11 “Na Tatanga konopune sukundu molio, yu nanga konopune sukundu molemo.” nikiru akumu ‘Sike nikimu.’ ningu tondolo-munduku pilieyo! Molo ungumu mindi pilkulie ‘Sike nikimu.’ ningu we naa piliengi liemo nane ulu telioma kanokolie ‘Tatane manda telemo ulu-tondoloma mele mindi nane sike aku-sipe telemo.’ ningu kanokolie “Tata kinie na kinie ye telumu molembolo.” nikiru ‘Sike nikimu.’ ningu tondolo-munduku piliee!” ˻nirimu.˼^d

12 “Nane enondo paa sike nimbu sikirumu: “Na molio nilio mele ‘Sike nikimu.’ ningu tondolo-munduku pilinge^e yemboma nane ulu-tondoloma telio mele aku yembomane aku-siku tengela. Nalo nane ulu-tondolo terindumu koltalo mele terindu. Kinié Tata molemona pumbomonga enone ulu-tondolo awisili mele tenge. 13 Nanga imbi leko ˻‘Nanga ningu tenderinumunge nu molenona ombo mawa tekero.’ ningu˼^f ulu te na mawa tenge ulumu nane tembo. ‘Malone Lapanga imbi lipe ola mundundopili!’ nimbu na aku-siku mawa tenge mele pilipulie tembo. 14 Nando ulu te molo méle te nanga imbi leko mawa tengi liemo nane mawa tenge mele pali tembo.” nikiru.” nirimu.

15 Yesusini ungu te pea nimbendo: “Enone na konopu mondongi liemo nanga ungu-mane silioma pilku liku tenge.^g 16-17 Aku tenge kinie nane Tata enonga nimbu mawa tendembo kinie yuni Lipe Tapondopa Konopu Enge-Sindelimu te-lupe^h ‘Eno-kinie kamu tapú-topa molopili!’ nimbe akumu eno simbe. Yu Ungu-Sikema Lipe Ora Sili Minimu. We-yembomane yu naa kanoko yu naa pilimelemonga kanu yembomane yu yando manda naa linge. Nalo na lombili andolime, yu eno-kinie tapú-topa molemo-na enone yu pilku imbi silimele. Pe yu enonga konopumenga molombala.ⁱ

18 “Eno mundupu siye kolopo pupulie nimbomone, nane ‘Eno-enono ambolango-kolumulume mele molangi!’ naa nimbo, mólo! Kelepo eno molongena ombó. 19 Pe nondoko we-yembomane na kamu naa kanonge. Nalo enone na kanonge. Na konde molopo mindi pulio-na eno kepe konde molko mindi punge. 20 Aku enamonga enone pilkulie, ‘Na Tatanga konopune sukundu molio mele kepe, eno nanga konopune sukundu molemele mele kepe, na enonga konopune sukundu molio mele kepe’ pilinge. 21 Yembo te yu nane “Teaa!” nilio ungu-manema pilipe molemo yembomo yuni na konopu mondolemo. Yembo tene na konopu mondolemo yembomo Tatane kanu yembomo konopu mondomba. Nane kanu yembomo konopu mondopolie ‘Na pilipu molio mele piliepili!’ nimbu yu molombana ombo telune kopu-tepo molopolie molio mele lipu ora simbo.” nirimu.

22 Yesusini aku nirimu kinie ˻yu lombili andoli ye˼ ‘Judasi’ nili te, Judasi-Isikeriote mólo, Judasi te-lupe, yuni Yesusi yundu nimbendo: “Awilimu, nuni olio manjipu “lipu ora simbo.” nikinu, we-yemboma nambemune “Naa lipu ora simbo.” nikinuye? Nambe-ekolie aku teniye?” nirimu.

23 Kanu-kinie Yesusini topondopa yu lombili andolimendo nimbendo: “Yembo tene na konopu mondomu liemo yuni nanga ungu-manema pilipe lipe temba. Kanu-kinie kanu yembomo nanga Tatane konopu mondopalie Tata kinie olto ‘Yu pea telune molamili!’ nimbulu yu molombana ombolo. 24 Na konopu naa mondolemo yembomone nanga ungu-manema pilipe lipe naa telemo. I nikiru pilkimili ungumu nanga mólo! Tatane na lipe mundorumu yemonga ungumu mindi.” ˻nirimu.˼

25 “Na eno-kinie molopolie i ungume pali nilio. 26 Nalo na nondopo tembomonga Tatane Eno Lipe Tapondolimu yando lipe mundumbe. Akumu Mini Kake Telimu. Mini Kake Telimu yuni eno ungume pali mane-sipe nimbé; nane enondo nirindu ungume pali te komu sindinge kinie aku ungumu altopa nimbe simbe.

27 “Na ˻eno nondopo mundupu siye kolopo pumbondo˼ “Eno konopu pe nipili molangi!” nimbu isili-ou nikiru. “Na konopu waengo sipu molio mele eno konopu waengo siku molangi!” nikiru. Nanga ungumu naa pilimele yemboma konopu waengo silimele mele lupela; na konopu waengo silio mele lupela. Nanga ungumu naa pilimele yemboma walse konopu waengo siku walse mini-wale munduku telemele. Nalo eno na lombili andolime, “Na alieli konopu pe nipili molio mele eno alieli konopu pe nipili molangi!” nikiru kene eno walse kepe konopu umbune tepili naa molko mini-wale naa munduku konopu waengo siku mindi molangi!^j

28 “Nane ou nindumu eno piliengi! “Na eno mundupu siye kolopo pumbo. Pe altopo eno molongena yando ombó.” nindu piliengi kanumu.^k Tata yu olandopa na maniendopamonga enone na konopu mondolemelanje na Tata molemona pumbomonga eno konopu silimela.^l 29 Nane enondo “Pupulie kelepo yando ombó.” nikiru ungumu pe wendo ombá kinie ‘ ‘Sike nirimu.’ ningu tondolo-munduku piliengi!’ nimbulie ou naa pupulie tembo mele enondo nimbu sikiru.

30 “Ya ma-koleamo nokolemo ye-nomi ˻Setene˼ okomo-na nane pe eno-kinie ungu awisili altopo naa nimbo. ˻Na mana molombo walemo pora nikimu. Yuni na ‘Toko kondangi!’ nimbé okomo˼ nalo na naa nokolemo-na uluri we manda naa temba.^m ˻Nane ‘Yuni na uluri tepili!’ nindu liemo na manda temba. We manda naa temba.˼ 31 Nalo ‘ ‘Mana-yembomane pali na Tata konopu mondolio.’ ningu piliengi!’ nimbu Tatane nando “Tei!” nirimu ungu-manema pali pilipu lipu tembo.” ˻nimbe Yesusini nirimu.˼

˻Aku nimbelie˼ “Manda nikiru kene kinié pamili waa!” nirimu.