˻Juda-yembomane ponie tenga-tenga kolea-awili Jerusalleme ongo akune suku˼ Pulu Yemone enonga anda-kolepalime Naa Topa We Omba Purumu mele pilieringi walema^b aku poniemo wendo ombando wale kise-pakera we pepili Yesusi LLasirasi molorumu kolea-kanga Betani purumu. Kanu yemo yu ou kolorumu óno teringi kinie pe Yesusini “Wendo ou!” nirimu kinie yu lomboropa wendo orumu.^c 2 Betani kanune ulke tenga yemboma langi Yesusi pea nongendo teko mimi teringi. LLasirasi kemulu Matane langime moke terimu. Yesusi pea langi nongo moloringi yembomanga te LLasirasi yu.

3 Kanu-kinie LLasirasi kemulu Mariane kopongo-wele ‘sipaikenate’ nili mingi te lipe Yesusi molorumune memba orumu. Kanu kopongo-welemo yunge mingi tenga umbune ape-llita mele, kanumu kou-mone paa awili-tepa purumu. Lipe memba ombalie nirimumuni, Yesusinge kimbuselonga ape kandondopalie Maria yunge penge-lapisemo lipe kimbuselo kulu tondorumu. Ulkena suku kopongo-welemo mune paa awili-tepa torumu.

4 Nalo Yesusi yunge lombili andoli ye te, Judasi-Isikeriote, yuni Yesusi pe lipe Yesusi yunge opa-puluema sirimu ye kanumu, yuni nimbendo: 5 “˻Yuni i kopongo-wele mune paa toli mingi pali nambemu-ne we naa simuye? Silkenje˼ aku welemo kou-mone limelanje kou awisili, kou-mongo wane tausini mele, lipulie yembo-koropama moke tepo silimela.” nirimu. 6 Nalo yuni koropama kondo kolopalie aku-sipe naa nirimu. Yu wa limbendo nirimu. Yu Yesusi lombili andoli yemanga kou-walemo nokopa mendepa, enonga kou-mone lakilieringime alieli yu wa lsimu.

7 ˻Judasi-Isikeriote yuni aku nirimu kinie˼ Yesusini topondopalie nimbendo: “Ambomone temumunge unguri naa ni! Na óno tengemonga kandondombando papu noserimu. 8 Yembo-koropama eno-kinie alieli molonge nalo na eno-kinie alieli naa molombo.” nirimu.

9 Yesusi kolea-kanga Betani ulke tenga molorumu Juda-yembo awisili pilkulie yu molorumune oringi. Yesusi mindi kanongendo naa oringi. LLasirasi ou kolorumu Yesusini topa makinjinderimu kanu yemo konde molorumu mele^d kanonge oringila.

10 Aku teringi-ne Pulu Yemo popo tondoringi ye-awilimene^e pilkulie LLasirasi kepe toko kondongendo langi niringi. 11 LLasirasi-kinie ulu-tondolo te wendo orumumunge Juda-yembo awisili enonga Juda ye-awilime munduku siye kolko Yesusi “molio.” nirimu mele ‘Sike.’ ningu tondolo-munduku pilku yu lombili andoringi kulu LLasirasi yu kepe “Topo kondamili!” ningu langi niringi.^f

12 ˻Pulu Yemone enonga anda-kolepalime Naa Topa We Omba Purumu mele˼ pilinge ulume tengendo kolea-awili Jerusalleme sukundu-sukundu ongo máku toko moloringi. Yesusi ˻oleanga mele kolea-kanga Betani LLasirasinge ulkena molorumu.˼ Pe ipulueli-oukundu yu Jerusalleme ombá orumu mele kanu yembo máku toko moloringimene pilkulie niringimuni, 13 enone kipiyala-gomo mare langoko mengo puku, aulkena Yesusi linge pukulie tondolo-mundukulie ningendo:

14 Yesusi kongi-dongi te kanopa lipe, ola pupe bulu-mingine molopa ˻orumu˼. Aku terimu kinie Pulu Yemonga bokune ungu te, pe wendo ombá koronga-ou niringi mele, wendo orumu. Aku ungumu i-sipe:

17 Yembomane Yesusi aulkena we naa li-poringi. Ou kolea-kanga Betani LLasirasi kolopa óno-koleana perimu kinie Yesusini yu topa makinjinderimu yembo máku toko moloringimene kanoringi.ⁿ Kanu yembomane kanu ulu-tondolomo Yesusini terimu kanoringi mele temanemo andoko toringi. 18 Yembomane yu Pulu Yemone lipe mundorumu, yu-kinie tapú-toko molembele mele lipe ora sirimu kanu ulu-tondolo terimumu^o pilkulie yu aulkena linge puringi. 19 Kanu-kinie Parisi-yemane^p aku teringi kanokolie enone enonga ye-awilimendo ningendo: “Enone yu toko manie mundunge teringi telemele mele manda naa tekemo kanayo! We-yemboma pali puku yu lombili pukumili kanaa!” niringi.

20 ˻Pulu Yemone Juda-yembomanga anda-kolepalime Naa Topa We Omba Purumu mele˼^q pilinge ulume tenge walema wendo ombá terimu kinie yemboma ‘Pulu Yemo popo tondopo yunge imbi lipu ola mundundemili!’ ningu Jerusalleme puringi kanu yembomanga mare Giriki-yembo^r mare eno pea puringi. 21 Kanu Giriki-yemboma kolea Gallilli disiriki lierimu kolea Besaida taono ye Pillipu molorumune ongo mawa tekolie ningendo: “Awilimu, olio Yesusi kanamili!” niringi. 22 Niringi mele Pillipuni pilipelie anjo pupe Enderu nimbe sirimu. Kanu-kinie Yesusi lombili andoli ye Pillipu kinie Enderuselo elo pukulu Yesusi ningu siringili.

23 Yesusini topondopa yu nondopa temba mele nimbe sipelie nimbendo: “Manie Omba Mana-Ye A Lierimu Yemo^s altopa pupe yunge kolea peangana molopa kondomba walemo^t wendo omu. 24 Nane enondo paa sike nimbu sikirumu: “Langi mongo naa kolomu liemo yuyu telu mindi we lemba. Nalo yu kolopa mana-manie pemu liemo poka-topa wendo omba mongo awisili tomba.^u ˻Aku-sipela na naa kolondu liemo nanga yembo awisili naa molonge, nanu manjipu molombo.˼^v

25 “Yembo te ya mana ‘Na molopo kondopo, na nondopo naa kolambo!’ konopu lemo yembo te yu kolopalie kolea kerine mindili nomba molopa mindi pumbe. Nalo yembo te na lombili andopa nanga kongono tendembando ‘Na ya mana mindili nombo molombo mandala, kolombo mandala.’ konopu lemo yembo te yu pe kamu-kumu molopa kondopa mindi pumbe. 26 Yembo nanga kongono tendelemo yembo te yu na lombili andopa na telio mele tepili! Na yemboma lipu tapondopo, Pulu Yemonga ungumu enondo nimbu simbondo mindili nombo molio molombo mele kanu yembomone aku-sipe nanga kongono tendepili! Kanu-kinie na molombo koleana nanga kendemandemo kepe pea tapú-topo molombolomo. Yembo te nanga kongono tendepa molomu liemo pe Tatane kanu yembomonga imbi lipe ola mundundumbe.” nikiru.” ˻nirimu.˼

27 ˻Aku nimbelie Yesusini ungu te pea nimbendo:˼

“Yembomane na toko kondongemonga kinié na mini-wale pupemo. Nambolka nimbonje? Tatando “Tata, kinié na ulu-pulu wendo ombá okomomo ‘Naa wendo opili!’ ni!” niembonje? Mólo! Na ‘I ulu-pulumu wendo opili!’ nímbu orundu-ne aku-sipu paa naa nimbo. 28 Tata, nunge imbi ‘Ola pupili!’ ni!” nirimu.

Kanu-kinie ungu te mulú-koleana wendo ombalie nimbendo: “Nu terinu telenomonga nanga imbimu koronga ola purumu. Pe kinié tenimunge kamu ola pumbe.” nirimu.

29 Maku toko moloringi yembomane aku ungumu pilkulie niringimuni, “Mulú topamo.” niringi.

Marene ningendo: “Angello tene yundu ungu te nimu.” niringi.

30 Yesusini nimbendo: “I ungu wendo omumu na ‘Lipu tapondambo!’ nimbe i ungumu naa nimu. ‘Ulu-pulu wendo ombá okomomo wendo ombá kinie eno konopu enge-nipili molangi!’ nimbe i ungumu nimu. 31 Kinié Pulu Yemone ma-koleana yemboma “Teko kenjilimelemonga pundu toko mindili nangi!” nimbé walemo nondopa wendo ombá tekemo. Na kolombo kinie ma-koleamonga ˻ye-˼nomi ˻Setene˼nga tondolomo manie pumbe.^w 32 Nalo na liku ola panjinge kinie^x na molombona yemboma pali “Waa!” nimbo.” nirimu. 33 (Yuni “Na liku ola panjinge.” nirimumunge ‘ ’Yu kolopili!’ ningu unjo-perana uku-toko ola panjinge yunge lombili andolime piliengi!’ nimbe yuni aku nirimu.)

34 Yuni aku nirimumunge yembo máku toringimene ningendo: “Pulu Yemonga bokune^y ‘Pulu Yemone olio “Nokopa kondomba ye te lipu mundumbo.” nimbe mako torumu ye-nomi Kirasimu^z ombalie kolou naa kolopa alieli molopa mindi pumbe.’ nimbe molemo kanumu pilipu molemolo.^a Akumunge nuni “Manie Omba Mana-Ye A Lierimu Yemo liku ola panjinge.” nikinu akumu nambeko nikinuye? ‘Manie Omba Mana-Ye A Lierimu Ye’ nikinumu naweye?” niringi.

35 Kanu-kinie Yesusini enondo nimbendo: “Wale laye-kolo pa telimu eno-kinie molomba.^b Akumunge kinié pa tendelimu eno-kinie molemo kinie eno pangi! Pe eno sumbulumuni pipi naa sipili! Yembo sumbulu toline pulimo yembomo pulimo aulkemo kanopa imbi naa silimo. 36 Kinié pa telimu eno-kinie molemo kene ‘Olio pa telimunge yemboma molamili!’ ningu ‘Pa telimu sike.’ ningu tondolo-munduku piliengi!” nirimu.

Ungume nimbe pora sipelie nirimumuni, ‘Na naa kanangi!’ nimbe Yesusi yemboma mundupe siye kolopa tenga pupe lopi te-porumu.

37 Yesusini ˻Pulu Yemone yu ‘kongono tendepili!’ nimbe lipe mundorumu, yu pea tapú-toko moloringili mele˼ lipe ora sirimu ulu-tondolo awisili^c terimu yembomane kanoringi nalo ou kepe, kanoringi kinie kepe, “Yu sike Pulu Yemone lipe mundorumu yemo.” ningu naa pilieringi.^d 38 Pulu Yemone ungu-umbu tondorumume pilipe yemboma nimbe sirimu ye Aisayane ou nirimu mele pe kamu wendo ombámonga enone aku-siku ningu naa pilieringi. Aisayane nimbendo:

42 Sike Juda ye-awili awisilini Yesusi “molio” nirimu mele ‘Kolo tokomo. Aku yemo naa molemo.’ ningu pilieringi nalo enonga ye awisilini ‘Yu aku yemo sike omba molemo.’ ningu tondolo-munduku pilieringi. Nalo eno Parisi-yemaⁱ pipili kolkolie, ‘ ‘Yu sike.’ nimbu tondolo-mundupu pilimolo mele nimbu para simolo kinie Parisi-yemane Pulu Yemonga ungumu máku topo pilimolo ulkemanga ‘naa waa!’ ningu kamu makoronge.’ ningu pilkulie, ningu para naa siringi. 43 Eno ‘Pulu Yemone kapi nimbé kinie papu.’ ningu naa pilku, ‘Yembomane olio kapi ninge kinie papu.’ ningu aku-siku we molko, yu ‘Sike.’ ningu tondolo-munduku pilieringi mele ningu para naa siringi.

44 Kanu-kinie Yesusini tondolo ru nimbelie nimbendo: “Yemboma ‘Na molio nilio mele sike.’ ningu tondolo-munduku pilimele yemboma na manjiku ‘Sike’ ningu tondolo-munduku naa pilimele. Na lipe mundorumu yemo kepe ‘Sike’ ningu tondolo-munduku pilimelela.^j 45 Yembo ‘Na sike.’ ningu tondolo-munduku pilimele yembomane na kanolemele akumu na lipe mundorumu yemo kanolemelela.^k 46 ‘Yembo tene ‘Na molio nilio mele sike.’ nimbe tondolo-mundupe pilimbe yembo te sumbulu toline naa molopili!’ nimbu na ma-koleamanga pali pa tendelimu ma-koleana orundu.^l

47 “Nalo yembo te nanga ungumu pilipelie tenge panjipe naa temu liemo nane yu kote naa tendembo. Nane mana-yembomanga kote pilipu ‘mindili nongo molangi!’ nimbu naa orundu kanumu. ‘Eno lipu tapondopo mindili nolemela aulkena wendo lipu, na-kinie molko kondonge aulkena lipu mondombo.’^m nimbo orundu. 48-49 Yembo te na bulu sipe nanga ungume ‘Sike.’ nimbe naa pilipe limbe yembomo kotena pilipe apurumbe mélemo pelemo. Mulú-ma pora nimbé wale kinie ungu nimbu silio ungumene yu kote tendemba. Na-nanu konopuni pilipulie i ungume naa nilio. Tatane na lipe mundorumu-ne orundu yemone “Ni!” nilimo mele pilipulie niliomonga, nilio ungumene kanu yembomo kote tendemba. 50 Na pilkiru, ‘Tatane “Ni!” nimu-ne nilio ungumuni yemboma alieli molko kondoko mindi punge ulu-pulumu silimo.’ nimbu piliomonga yuni “Aku-siku ningu si!” nilimo mele nimbu silio.” nirimu.