2 Paa koronga-ou, mélte mana naa liepili, yu Pulu Yemo-kinie moloringili.

3 Ungumu yuni yuyu mélema pali terimu. Mélte we pora naa purumu. Méle wendo orumume pali yuni terimu-ne wendo orumu.

4 Mololi ulu-pulumu yu-kinie mindi perimu.^b Kanu mololi ulu-pulumu yembomanga pa tendelimu.^c

5 Aku pa telimuni sumbulu tolemomo pa tendelemo. Sumbulu tolemomone altopa pa telimu manda pipi sipe sumbulu altopa naa tomba.

6 Ye te orumumu Pulu Yemone lipe mundorumu-ne orumu, yunge imbi Jono. ˻Yu No-Lindeli Jono kanumu.˼^d

7 Jonone pa tendelimunge pulumu nimbe simbe orumu. ‘Yembomane “Nondopa ombá yemo yu sike aku pa tendelimu.” ningu tondolo-munduku piliengi!’^e nimbe, omba nimbe sirimu.

8 Jono yu aku pa tendelimu mólo! Yu aku pa tendelimu ombá mele nimbe simbe orumu.

9 Jonone yemboma ungu nimbe sipe molopili paa sike pa tendelimuni yemboma pali pa tendelemo kanumu mana ombá orumu.

10 Yu ma-koleana omba molorumu. Yuni yuyu ma-koleamo terimu nalo ma-koleana yembomane yu kanokolie ‘Yu ma-kolea terimu Pulu Yemo.’ ningu naa kanoko ‘Yu we-mana-ye te.’ ningu pilieringi.

11 Yu yunge koleana omba molorumu nalo yunge yembomane “Nu olionga Awilimu okono kene olio ongo nokoko molou!” ni naa niringi.^f

12 Nalo yundu “Nu sike ˻Pulu Yemone lipe mundorumu-ne orunu yemo kene˼^g olio nokani pea molamili ou!” ningu yunge ungume tondolo-munduku pilku lsingi yemboma yuni “Pulu Yemonga ambolangoma molangi!” nirimu.^h

13 Nalo kanu yemboma Pulu Yemonga ambolangoma a lieringi, aku ulumu kangimunge kongonomo mólo! Anupili-lapalini “Pulu Yemonga ambolangoma meamili!” ni naa niringila. Pulu Yemone yuyu mindi enondo “Nanga ambolangoma.” nirimu.ⁱ

14 Ungumu ˻Pulu Yemo pea moloringilimu˼ manie omba mana ye a-lepa olio-kinie pea wale wallo-kolte molorumu. Yu mana omba molorumu kinie neme-neme nimbu kanopolie, yu ye paa peanga, imbi molemo ye tondolomo, kanopo pilierimulu. Kanu ye paa peanga tondolomo Malo telu molorumumu Lapa molorumune yu pea molkololie mana manie orumumunge yu ye paa peanga lepa imbi paa ola mololi ye tondolomo mindi kanopo pilierimulu. Yu we-kondo-kololi ulu-pulumu kinie sike-nili ulu-pulumu kinie yunge konopune pepa tengepea terimu yemo.

15 ˻Jono yemboma no lindipe molopili Yesusi, Pulu Yemonga Ungumu, orumu kinie˼ Jono yuni yemboma kanu yemo lipe ora sipe yu molorumu mele nimbe sirimu. Yuni ru nimbelie nimbendo: “I yemo nane enondo ou “Nondopa ombá.” nimbu sirindu kanu yemo imu. Na naa molambo i yemo yu koronga-ou Pulu Yemo-kinie molorumu kulu “Yu ye-nomi awilimu, na paa we koropamo.” nirindu^j kanu yemo imu.” nirimu.

16 Yuni olio we kondo kolemo ulu-pulumu yu-kinie pelemomonga yuni olio alieli kondo kolopa mindi molopa olio ‘Konopu waengo siengi!’ nimbe taki-teki sewe anjilimo.

17 Mosisini olio Pulu Yemonga ungu-mane sirimume mindili sipu tepo molorumulu.^k Nalo olio we kondo kololi ulu-pulumu kinie sike ungume kinie aku ulume Yesusi Kirasi yu-kinie mindi pepili orumu.

18 Mana-yembo tene ou kepe, kinié kepe, Pulu Yemo naa kanolemele.^l Pulu Yemonga Malo telu mindi molemo, akumu Lapa-kinie pea tapú-toko molembele, akumuni mindi ‘Pulu Yemo molemo mele kanangi!’ nimbe yu lipe ora sirimu.

19 Juda-yemboma˻nga ye-awili˼^m kolea-awili Jerusalleme moloringi ˻kanu yemane˼ Pulu Yemo popo tondoringi ye pokore kinie,ⁿ LLipai-ye pokore kinie Jono no lindipe molorumune liku mundukulie, “Jonondo “Nu naweye?” ningu walsiku piliengi paa!” niringi.

20 Eno ongo yu walsiku pilieringi kinie yuni kolo naa topa sumbi-sipe nimbelie nimbendo: “Pulu Yemone ‘Olio nokopa kondomba ye te lipu mundumbo.’ nimbe mako torumu ye-nomi Kirasimu^o na mólo!” nirimu.

21 Enone ningendo: “Nu aku yemo mólo liemo nu naweye? Nu Pulu Yemone ungu-umbu tondorumume pilipe yemboma nimbe sirimu ye Illainja, ˻yu konde molopili Pulu Yemone ou olando lsimu akumu˼^p nu kelko onuye?” ningu walsiku pilieringi.

22 Kanu-kinie enone yundu ningendo: “Nu naweye? Olio liku mundongi yemane ‘Ongo ningu singe.’ ningu nokoko molemele kene nunge imbi leko si! Nunu nawe konopu lekenoye?” niringi.

23 Jonone nimbendo: “Pulu Yemone ungu-umbu tondorumume pilipe yemboma nimbe sirimu ye Aisayane koronga-ou nimbendo:

24 ˻Kanjollomane˼ mundoringi ongo moloringi yemanga Parisi-ye mare moloringila.^s

25 Aku Parisi-yemane yundu walsiku pilkulie ningendo: “Nu ye-nomi Kirasimu mólola! Illainja mólola! ‘Pulu Yemone ungu-umbu tondorumume pilipe yemboma nimbe simbe ye te pe ombá.’ ou niringi yemo mólola! Pe kinié nu nambemu-ne yemboma no lindilinoye?” niringi.

26 Jonone enondo topondopa nimbendo: “Na sike no lindilio nalo nanga kongonomo manie. Ye te olionga koleana sukundu molemo akumu eno kanokolie ‘we-yere’ konopu leko, kanoko imbi naa silimele,

27 akumu na lombili akumu lepa okomo yemo. ˻Yembo-awilimenga kongono keri teli yembomane sike enonga yembo awilimenga kongono keri tendengendo enonga kimbu-su ka pilke toko su wendo lindilimele nalo˼ i ye na lombili akili-lepa okomomonga kimbu-su ka pilke topo su wendo lindimbo kongonomo kepe paa olandopa mele, nane manda naa tendembo. Na ye paa keri mele; yu ye paa nomi awilimu.” nirimu.

28 I ulu wendo orumume Betani taono, No-Jodane nekendo lemo koleana, wendo orumu. Jonone akune yemboma no linderimu.

29 Opalikundu ˻No-Lindeli˼ Jono molorumune Yesusi ombá orumu kanopalie nirimumuni, yembomando nimbendo: “Kaname! Pulu Yemonga Kongi-Sipisipi Walomo^t okomo. Yu yembomanga pali ulu-pulu-kerime kulu tondolemo tondomba yemo okomo.” ˻nirimu˼.

30 “Ou nane ye te nirindu kanumu andi okomo ye akumundu nirindu. Ou nane nimbondo: “Ye na lombili ombá ye te na naa molambo yu koronga-ou molorumu-kulu yu olandopa, na maniendopa.” nirindu kanumu i yemo.

31 Na kepe yu naa kanorundu nalo ‘Isirele-yemboma yu kanokolie piliengi lipu ora siembo!’ nimbu na ombo yemboma no lindilio.” nirimu.

32 Jonone yundu ungu te pea nimbendo: “Yu no lindipu molopo kanondu kinie Mini ˻Kake Telimu˼ kera-waembono mele mulú-koleana maniendo omba yu molomune omba molomu kanondu.

33 Nane yu kanopolie yu imbi naa pilipu ‘Yu we-yere.’ konopu lelka nalo nando “Yemboma no lindi-pou!” nimbe lipe mundorumu yemone na nimbe sipelie nimbendo: “Mini ˻Kake Telimu˼ manie omba ye tenga kangi tenga ola omba molomba kanoni kinie aku yemone yemboma Mini ˻Kake Telimu˼ lindimbe yemo.” nirimu kulu pilipulie yu kanopo imbi sipulie

34 enondo “Yu Pulu Yemonga Malo.” nilio.” nirimu.

35 Opalikundu ˻No-Lindeli˼ Jono No-Jodane kélo akune altopa angilipelie nirimumuni, yu lombili andolimenga^v ye talo pea angilieringi.

36 Kanu-kinie Yesusi omba purumu kinie yuni kanopalie nimbendo: “Kanale! Pulu Yemonga Kongi Sipisipi Walomo^w omba pukumu.” nirimu.

37 Yu lombili andoli-selo yuni nirimu ungumu pilkululie Yesusi lombili puringili.^x

38 Yesusi topele topa elo yu lombili oringili kanopalie elondo nimbendo: “Nambolka korokombeleye?” nirimu.

39 Yuni elondo “Kanangili wale!” nirimu. Elo yu perimune puku kanokololie ipupene po-killoko mele terimu kulu kanu enamonga yu pea peringi.

40 Ye talo Jonone nirimu ungumu pilkululie Yesusi lombili puringili yeselonga te Enderu, Saimono Pitanga angenu.

41 Yu sumbi-sipe pupe angenu Saimono koropa kanopa lendepalie yundu nimbendo: “Pulu Yemone “olio nokopa kondomba ye te lipu mundumbo.” nimbe mako torumu ye-nomi Mesayamo^z kanopo lendemulu.” nirimu. (‘Mesaya’ akumu Juda-yembomanga ungu te. Mesayamondo Giriki-Ungune ‘Kirasimu’ nilimele.)

42 Aku nimbelie Enderuni angenu Saimono Yesusi molorumune meli purumu. Yesusini yu kanopalie nimbendo: “Nu Saimono, ‘Jono’ nili ye tenga malo. Nunge imbi te ‘Sipasi’ ningu lenge.” nirimu. (Sipasindu ‘Pita’ niringila. Juda-yembomanga ungune ‘Sipasi’ ningu, Giriki-Ungune ‘Pita’ nilimele, aku unguselonga pulumu ‘kou-mulú’.)

43 Opalikundu Yesusi ‘Kolea Gallilli disiriki pambo!’ konopu lepa pumbe purumu. Pupelie Pillipu aulkena angilierimu kanopalie, “Na lombili ou!” nirimu.

44 Pillipu kepe Besaida taono yemo, Enderu kinie Pitaselonga koleamo.

45 Pillipuni Nataniele kanopa lendepalie yuni yundu nimbendo: “Mosisini boku torumu bokumenga^a ‘Ye te ombá.’ nimbe temane torumu kanu yemo kepe, Pulu Yemone ungu-umbu tondorumume pilku yando ningu siringi yemane enonga bokumenga ‘Ye te ombá.’ ningu temane toringi kanu yemo kepe, kinié olio kanopo lendemulu. Yu Nasarete taono ye Yesusi, Josepo malo.” nirimu.

46 Nalo ‘Aku kolea kelóna ye-awili te manda wendo naa ombá.’ nimbe pilipelie Natanielene Pillipundu nimbendo: “Nasarete taonona ulu peanga te manda wendo ombáye?” nirimu.

47 Kanu-kinie Nataniele ombá orumu kinie Yesusini kanopalie, yundu nimbendo: “I ye okomomo paa sike Isirele-yemo, yu kolo toli ungu te paa naa pelemo yemo.” nirimu.

48 Natanielene Yesusindu nimbendo: “Nuni na nambeko kanoko imbi sikulie aku nikinuye?” nirimu.

49 Aku nirimu kinie Natanielene tondolo-mundupe nimbendo: “Rapai,^b nu Pulu Yemonga Malo,^c olio Isirele-yembomanga ye-nomi-kingimu^d lepamo.” nirimu.

50 Yesusini nimbendo: “Nane ‘Nu unjo-piki pulune molonu kinie kanondu.’ nindu kanumunge nuni na ‘Pulu Yemonga Malo molemo.’ ningu pilkinuye? Kinié nane nundu nindu mele maniendopa. Pe ulu-tondolo paa olandopama wendo ombá kanoni.” nirimu.

51 Aku nimbelie Yesusini ungu te pea nimbendo: “Nane enondo paa sike nimbu sikirumu: “Pe mulú-koleana anjo-yando pupe, Pulu Yemonga angelloma Manie Omba Mana-Ye A Lierimu Yemo^e molombana olando puku maniendo ongo tenge kanonge.” nikiru.” nirimu.^f