2 “Walse, kolea tenga kote pilierimu ye te molorumu. Kanu kote pilierimu yemo yu Pulu Yemo kepe mana-yemboma kepe, pipili naa kolorumu.

3 Kanu koleana ambo-waye te molorumula. Kanu ambomo yuni kote pilieli yemo molorumune alieli omba yundu nimbendo: “Na tepa kenjerimu yemo kote tendambo! Nuni na liku tapondoko kote pilindei!” nimbe mawa te-pou-pou terimu.

4 Ambomo ou kokele orumu kinie kote pilieli yemone yundu “Mólo, nunge kote naa pilindimbo.” nirimu nalo ambomo yu alieli omba mawa terimumunge kote pilieli yemo pilipe keri pilipelie yu-yuyu nimbendo: ‘Na Pulu Yemo pipili naa kolopo, yemboma kondo naa kolopo molio

5 nalo i ambo-wayemo alieli omba walsilimomonga pe altopa omba mawa temba kinie na kamu pilipu keri pilimbo kene yunge kote pilindembo!’ nirimu.” ˻nimbe Yesusini˼ nirimu.

6 Awili ˻Yesusini aku ungu-ikomo topa pora sipelie˼ ungu te pea nimbendo: “Kote pilierimu ye-kerimuni ambo-wayemondo terimu mele pilieyo!

7 Aku-sipe mele Pulu Yemone yunge yemboma umbune silimele yemboma aku telemelemonga kote pilieli yemo molopalie kote naa tendembaye? Yunge ou mako torumu yembomane ipulueli kepe tangoli kepe alieli “Olionga kote pilindei!” ningu mawa telemele kinie yuni enonga kote naa pilindimbeye? Yu ou we molopa pe-mele “Eno lipu tapondambo!” nimbe taka lipe ombáye?

8 Yu temba mele nimbu siembo: “Pulu Yemo yu welea omba yunge yemboma lipe tapondombando eno umbune silimele yemboma kote tendepalie mindili simbe.” nikiru. Nalo Manie Omba Mana-Ye A Lierimu Yemo kelepa wale talo-sipe manie ombá kinie “Yembo marene ‘Yuni eno lipe tapondomba.’ ningu yu mawa teko molonge molo mólonje?” nimbe omba kanomba.” nirimu.

9 Yembo mare eno-enone pilkulie ‘Na peanga. Na sumbi-sipu molio, yembo-lupema molko kenjilimele. Eno yembo kerime. Eno-kinie tapú-topo naa molambo!’ ningu pilku andoko moloringi yembomando Yesusini i ungu-ikomo topalie nimbendo:

10 “Ye talo yu-mele-mele ‘Pulu Yemo-kinie ungu niembili!’ ningulu Pulu Yemo popo toko kaloringi ulke-tembelena puringili. Te Parisi-ye te, te kou-takisi lili ye te.

11 Parisi-yemo^a pende tepa ola angilipelie yu-yuyu konopuni pilierimu ungume nimbendo: “Pulu Yemo, yembo-lupema molemele mele na aku-sipu naa moliomonga nu “Ange.” nikiru. Eno wa nongo, ulu-pulu-kerime teko, ambo-yema wa-ulu-kerinele teko, telemele. I kou-takisi lili yemo tepa molemo mele kepe na naa telio.

12 Na koro tenga-tenga wale talo langi mi topo naa nombo,^b kou-mone kinie mélema kinie méle rureponga-talo rureponga-talo (10-10) nimbu liomanga telu-telu nimbu nu silio.” nirimu.^c

13 Nalo kou-takisi lili yemo nondopa naa omba anjo tenga-lupe ma kanopa angilipe, ‘Na ye paa keri te.’ nimbe pilipelie pipili kolopa ki-lumuni yunge luwine topa angilipelie nimbendo: “Pulu Yemo, na konopune ulu-pulu-keri peli yemo kondo kolou!” nirimu.” ˻nimbe Yesusini nirimu.˼

14 “Nane enondo paa sike nimbu sikirumu: “I yeselonga Pulu Yemone kou-takisi lili yemonga ulu-pulu-kerime siye kolopa, yu ‘ye sumbi-nílimu.’ nimbe kanopa molopili lkondo purumu, nalo Parisi-yemo yunge ulu-pulu-kerime konopune we pepili lkondo purumu.”^d nikiru. Yembo enono imbi liku ola mundulimele yemboma Pulu Yemone topa manie mundumbe, nalo yembo enono toko manie mundulimele yemboma yuni enonga imbime lipe ola mundundumbe.” nirimu.

15 Kanu-kinie yembomane enonga ambolango kangama ‘Yesusi yunge kimuni ambolopili!’ ningu yu molorumune mengo oringi. Mengo onge oringi kanokolie Yesusi lombili andolimene iri toko ˻“Naa mengo waa!”˼ niringi.

16 Nalo Yesusini ambolangomando “Waa!” nimbelie ˻yu lombili andolimendo˼ nimbendo: “Pulu Yemo ye-nomi-kingimu molopa nokolemo yembo talape akumu^f i ambolangoma mele molemele yemboma enonga yembo-talapemo kene enone i ambolangoma na moliona wangi pipi siku “Mólo!” naa niee!” ˻nirimu.˼

17 “Nane enondo paa sike nimbu sikirumu: “Ambolangomane^g ‘Pulu Yemo olionga ye-nomi-kingimu molopili!’ ningu molemele mele aku-siku naa nilimele yemboma yunge koleana suku paa naa punge, mólo!” nikiru.” nirimu.

18 ˻Walse Juda-yembomanga˼ ye-nomi te Yesusi molorumune omba yundu walsipe pilipelie nimbendo: “Ungu Mane Sili Peangamo, na nambolka uluri tembo kinie na konde molopa kondopa mindi puli ulu-pulumu limboye?” nirimu.ⁱ

19 Yesusini yundu nimbendo: “Nuni na nambemune “Peangamo.” nikinuye? Yembo peanga te mólo! Pulu Yemo mindi peangamo.” ˻nirimu.˼^j

20 ˻Aku nimbelie yemone walserimumunge topondopa nimbendo:˼ “Nu ˻Pulu Yemonga˼ ungu-manema ˻Mosisini yando nimbe sirimume˼ pilino. ˻Aku ungu-manema i-sipe˼:

21 Aku nirimu kinie pilipelie kanu yemone nimbendo: “Na kangomo molopolie aku ungu-manema pali pilipu lipu tepo molorundu mele yandopa kinié kepe tepo molio.” nirimu.

22 Yu aku nirimu pilipelie Yesusini yundu nimbendo: “Papu teleno nalo ulu telu mindi naa teleno. Nu puku nunge méle nosilinoma pali kou-mone li-pukulie, kou-mone linime yembo-koropama moke teko sikulie na lombili ou!” nirimu. “Nunge ˻mana-˼mélema aku teni kinie mulú-koleana nunge méle kande-kande peangama lemba.” nirimu.

23 Kanu ye-nomimu méle paa kande-kande peangama noserimu kulu Yesusini aku nirimu kinie pilipelie yu konopu keri panjipe konopu umbune paa awili-tepa tepili anjo purumu.

24 Yu aku-sipe purumu kanopalie Yesusini yu lombili andolimendo nimbendo: “Pulu Yemo ye-nomi-kingimu molopa nokolemo koleana suku pungendo yembo-kamakoma paa mindili siku suku punge.

25 Kongi-kemele ˻kongi paa awili te^l nalo˼ kalé suru toline suku pumbendo mindili kanga-mele sipelie pumbe. Nalo yembo-kamakoma Pulu Yemo ye-nomi-kingimu molopa nokolemo koleana suku pungendo mindili paa awili mele siku punge.” nirimu.^m

26 Yuni aku nirimu pilieringi yembomane ningendo: “Aku liemo mindili nolemela aulkena nawe manda wendo pupe, molopo kondomolo aulkena pumbeye?ⁿ Te mólonje?” niringi kinie

27 yuni enondo nimbendo: “Yembomane paa manda naa telemele ulume Pulu Yemone manda temba. Pulu Yemo yuni ulume pali kapola telemo. Ulu te yuni manda naa temba te mólo!” nirimu.

28 ˻Yuni aku nirimu kinie pilipelie˼ Pitane yundu nimbendo: “˻Pe olio-kinie nambolka uluri wendo ombáye?˼ Olio olionga mélema pali mundupu siye kolopo nu lombili purumulu mele pulimolo kanumu.” nirimu.

29 Yesusini nimbendo: “Nane enondo paa sike nimbu sikirumu: “Pulu Yemo omba ye-nomi-kingimu molopa nokomba walemo^o wendo ombá mele ‘Yemboma piliengi!’ ningu siliku andongendo enonga ulkema kinie, menupili kinie, angenupili kinie, anupili-lapalini kinie, ambolangoma kinie, akume munduku siye kolonge yemboma pali

30 ya mana paa olandopa méle awisili likulie pe punge koleana konde molko kondoko mindi puli ulu-pulumu lingela.” nikiru.” nirimu.

31 Kanu-kinie Yesusini ˻yu lombili andoli˼ ye engaki-rurepo ‘na kinie eno kinie oliolio molamili!’ nimbe eno lipe anjo memba pupelie enondo nimbendo:

32 Juda-yembomanga ye-awilimene Manie Omba Mana-Ye A Lierimu Yemo liku Juda-ye naa molemele yema singe.^r Enone yu ungu-taka tondoko yu teko kenjiku yunge kumbikerena olkambe toko,

33 yu ka-pulsene toko yu toko kondonge. Yu toko kondonge kinie wale yepoko-sipemonga lomboropa ola molomba.” nirimu.^s

34 Nalo yuni ungu nirimumu pilku sundoringi. Ungu-pulumu naa pilkulie ungu nirimumu pilku sundoringi.

35 Kanu-kinie Yesusi Jeriko-taono nondopa ombá orumu kinie mongo keri lierimu ye te aulke alselsena molopa yemboma “Kou-mone siee!” nimbe mawa terimu.

36 Kanu yemone yembo awisili ongo punge puringi pilipelie yuni “Nambe-ekemeleye?” nimbe walserimu kinie

37 enone yundu ningendo: “Nasarete-Ye Yesusi omba pukumu.” ningu, ningu siringi.

38 Aku niringi pilipelie yuni tondolo ru nimbe walsipelie nimbendo: “Yesusi, ˻ye-nomi-kingi˼ Depisini kalopa lsimu yemo, na kondo kolou!” nirimu.

39 Kumbi-leko puringi yembomane yu iri toko “Nu ungu naa nili taka-liku molou!” niringi.

40 Yesusi we angilipelie “Yu yando mengo waa!” nirimu. Yu Yesusi angilierimune nondopa orumu kinie Yesusini yundu walsipe pilipelie nimbendo:

41 “Nane nu nambe-eambo konopu lekenoye?” nirimu.

42 Yesusini yundu nimbendo: “ ‘Nane nunge mongoselo kapola tendembo.’ konopu lienumunge nu umbu-mongo kapola angiliepili!” nirimu.

43 Yesusini aku nirimu kinie yu tamburumbu mongoselo peanga lierimu, mélema kanopalie Pulu Yemo kapi nimbe yunge imbi lipe ola mundundulipe Yesusi lombili purumu. Yembomane pali kanu ulu˻-tondolo wendo orumumu˼ kanokolie enone kepe Pulu Yemo kapi niringi.