2 ˻Jeriko akune˼ kou-takisi lipe takisi lsingi yema nokorumu ye te, yunge imbi Sakiasi, yu akune molorumu. Yu méle awisili nosipe yu kamako molorumu.

3 Kanu yemone Yesusi orumu kanomba terimu. Yesusi orumune yembo awisili liku máku toringi kulu Sakiasi yu ye-ponjili kulu molopalie Yesusi manda naa kanorumu.

4 Akumunge Yesusi orumune kanombando yu lkisipe kumbi-lepa pupelie unjo ‘sikamo-piki’ nili te Yesusi ombá orumu aulkena nondopa angilierimu aku unjomonga omba ola purumu.

5 Yesusi akune ombalie we angilipe olando-sipe kanopalie yundu nimbendo: “Sakiasi, nunge ulkena kinié na pea molambili pambili welea manie ou!” nirimu kinie

6 yu popenge-tepa manie omba yundu “Kapola.” nimbe konopu sirimu.

7 Yesusi Sakiasinge ulkena pea puringili kanokolie ou akune liku máku toringi yembomane ningendo: “Yu ulu-pulu-keri teli ye te-kinie ‘Molo-pambili!’ nimbe pukumu.” ningulie yu terimu mele kanoko keri kanoringi.^a

8 Kanu-kinie Yesusi kinie Sakiasi kinie elo ulkena suku molkololie Sakiasi ola angilipe Awilimundu nimbendo: “Awilimu, nane nundu ungu te niembo pílie! Nanga méle nosilioma ekendo lipu yembo-koropama sipulie, pe kou te molo mélte kolo topo wa-mele lsindu mélte altopo wa lsindu mele pundu topo yepoko-tepo ola panjipu anjo simbo.” nirimu.

9 Yuni aku-sipe nirimu kinie Yesusini yundu nimbendo: “Kinié i ulke pulu yemboma Pulu Yemone lipe tapondopa ‘mindili nolemela aulkena wendo ongo, yu-kinie pea molko kondonge aulkena pangi!’ nilimo ulu pulumu likimili.^b Kinié i ulke pulu yemo yu kepe anda-kolepa Eporayamone kalopa lsimu ye te kanumu.^c

10 “Manie Omba Mana-Ye A Lierimu Yemone^d ‘Yembo aulke lou leko molko kenjilimele yemboma koropo, eno lipu tapondopo mindili nolemela aulkena^e wendo lipu na-kinie molko kondonge aulkena lipu mondombo.’^f nimbe orumu.” nirimu.

11 Aku-sipe nirimu pilkulie Yesusi-yu kolea-awili Jerusalleme nondopa ombá terimu kulu^h kanokolie we-yemboma enone ‘Pulu Yemo omba ye-nomi-kingimu molomba walemo paa nondopa ombá.’ konopu leko moloringi. Enone aku-siku pilku moloringi pilipelie ˻Yesusi-˼yuni enondo ungu-iko te topalie

12 nimbendo:

13 Ou naa pupili yunge kendemande-ye rureponga talondo “Waa!” nimbelie kou-kulupi rureponga talo moke tepa eno yu-mele-mele kou-kulupi telu-telu nimbe sipelie enondo nimbendo: “Na wele anjo molambo i kou-mone sikiru likimilimungeⁱ ‘Kou te olandopa pea liemili!’ ningu konopu tondolo-munduku teko molangi! Pe ombó.” nimbe yu purumu.

14 Kanu yemo purumu kinie yunge talapena-yemboma yu-kinie konopu keri pilieringi kulu enonga ye te ‘Yu akilipe pupili!’ ningu liku mundukulie ningendo: “ ‘ “I ye-nomimu olionga ye-nomi-kingi naa molopili!” nimbu molemolo.’ nindei!” ningu yu liku mundoringi.

15 Pe kanu yemo kingi-nambamo sike lipe meli yando orumu kinie ou kou-mone sipe purumu kendemandemando “Waa!” nimbelie “Eno kou-mone sirindumunge olandopa kou nambeko lsingiye?” nimbe walserimu.

16 Ou kumbi-lepa sirimu yemone omba yundu nimbendo: “Awilimu, nunge kou-kulupi te sirinu kanumunge ola panjipu kulupi rureponga talo lsindu.” nirimu kinie

17 ye-nomi-kingimuni yundu nimbendo: “Kendemande-ye peangamo. Papu terinu. Méle kanga sirindumunge nu teko kondorunu kene nu kolea-awili rureponga talo nokani!” nirimu.

18 Ye talo-sipemone omba yundu nimbendo: “Awilimu, nunge kou kulupi te sirinu kanumunge ola panjipu kulupi kise-pakera lsindu.” nirimu kinie

19 ye-nomi-kingimuni yundu nimbendo: “Aku-siku terinumunge nu kolea-awili kise-pakera nokani!” nirimu.

20-21 Pe kendemande te omba yundu nimbendo: “Awilimu, nane pilipulie ‘Nu bisinete tondolo-munduku teko, ‘Kou-mone lipu nosimbomonga yemboma mindili nongi liemo mandala.’ ningu ˻kendemande-yemboma ‘Kongono mindili-siku teangi!’ ningu siku, eno méle koltalo siku mélema pali nunu mindi lino yemo;˼ ponie yembomane panjindilimele kinie nu-nunu langi-mélema we akuku liku; ponie naa teleno poniena langi liku nosiku, nu aku-siku teko moleno yemo.’ pilipulie pipili kolopo nuni na sirinu koumu kulupi topo noserindumu i sikiru.” nirimu.

22 Aku nirimu kinie pilipelie ye-nomimuni iri topalie yundu nimbendo: “Nu kendemande-ye kerimu. ˻Nane nunge kote pilimbo kinie˼ nunge nikinu ungumuni nunu kote tendemba. Nuni pilkulie ‘Ponie yembomane panjindilimele kinie na-nanu langi mélema we akupu lipu; ponie naa telio-na langi lipu nosipu, na aku-sipu tepo molio.’ ningu pilku molenoye?

23 Aku ningu pilkulie nanga kou-monemo kou-benge ulkena nambemune naa noserinuye? Aku telenanje na ombo nanga koumu wendo lipulie kou wallo-kolte ola panjiku silimela lilkela.” nirimu.

24 ˻Kanu kendemande-yemondo aku-sipe nimbe pora sipelie˼ yuni nondoko angilieringi yembomando nimbendo: “I yemo tepa kenjerimu kene yunge koumu wendo likulie kou-kulupi rureponga talo ambolkomo yemo siee!” nirimu.

25 Enone yundu ningendo: “Awilimu, yu koronga kou-kulupi rureponga talo ambolkomo kanumu.” niringi.

26 Enone aku niringi kinie ye-nomi-kingimuni kelepa nimbendo: “Enondo nimbu siembo: “Mélema nosilimo yembomo^j nane mare pea simbo, yu paa awisili nosimbe. Nalo mélema naa nosilimo yembomo^k yunge nosilimo mélema kepe wendo limbo,” nikiru.” nirimu.

27 Aku-sipe nimbelie kanu ye-nomi-kingimu yuni ungu te pea nimbendo: “Kinié na teko kenjeringi yemboma mengo wame! Enone nando ningendo: ‘I yemo olionga ye-nomi-kingimu naa molopili!’ niringi kanu yemboma mengo ongo na kanopo molambo eno toko kondaa!” nirimu.” nimbe ˻Yesusini aku-sipe kanu ungu-ikomo topa pora sirimu˼.

28 Ungu-iko akumu topa pora sipelie kolea-awili Jerusallemendo kelepa pumbe purumu.^l

29 Kanu-kinie Yesusi ˻kinie yu lombili andolime kinie˼ eno kolea-awili Jerusalleme nondoko ongo, ma-pangi te ‘Ma-Pangi Unjo-Ollipi Ponie Lielimu’ nili akune lemo kolea-kanga talo, Betepasi kinie Betani-selonga nondoko oringi. Kanu-kinie Yesusini yu lombili andoli ye talo lipe mundupelie, elondo nimbendo:

30 “Ne kolea-kanga kanokombelena pukululie kongi-dongi walo te, yembo te yunge bulu-mingine walsikele kepe naa molopa andorumumu ka teko panjingemo ne akune sukundu molomba kanongele kanumu puku posiku mengo wangili pale!

31 Posingele teko molongele kinie yembo tene elondo “Dongimu nambemune posikimbiliye?” nimbe walsemu liemo elone i-siku niengili: “Awilimu yu ‘Dongimuni mepili!’ nimu-ne ombo likimbulu.” niengili!” nimbe elo lipe mundorumu.

32 Kanu lipe mundorumu yeselo pukulu yuni nirimu mele kanoko lendekololie

33 pe kanu kongi-dongi walomo posikulu moloringili kinie dongi pulu yemane elondo ningendo: “Olionga dongimu nambemune posikimbiliye?” ningu walseringi kinie

34 elone “Awilimu yu ‘Dongimuni mepili!’ nimu-ne ombo likimbulu.” niringili.

35 Kanu-kinie dongi kanumu likulu Yesusi molorumune mengo oringili kinie enone enonga mulumbalema kulku, dongimunge bulu-mingine ola pauwe tondoko Yesusi kanune ola mondoringi.

36 Marene enonga mulumbalema kulku yu ombá aulkena pauwe toliku puringi.

37 Kanu-kinie yu Jerusalleme paa nondopa omba, ‘Ma-Pangi Unjo-Ollipi Ponie Lielimu’ nili akune manie ombá orumu kinie yu lombili puringi yembo awisili konopu awili-teko siku ˻Yesusini˼ ulu-tondolo awisili terimu kanoringimenga Pulu Yemo kapi ningu ungu tondolo-munduku ningendo:

39 Aku-siku niringi pilkulie pea oringi Parisi-ye marene^q ˻we-yembomane aku-siku niringi mele pilku keri pilkulie˼ yundu ningendo: “Ungu Mane Silimu, nu lombili andolimene nikimili mele ‘Naa niengi!’ ningu eno iri tou!” niringi kinie^r

40 Yesusini enondo nimbendo: “Nane enondo i-sipu nikiru: “I yembomane i-siku naa ningu we molongi liemo ya kou-mulú lemomane ru ninge,” nikiru.” nirimu.

41 Kolea-awili Jerusalleme paa nondopa omba kanumu kanopalie nirimumuni, Yesusini kola tepalie

42 nimbendo: “˻Jerusalleme yemboma,˼ kinié eno kepe mindili naa nongo kapola-kapola molonge aulkemo pilimelanje papu. Nalo kinié naa pilimele, naa pilinge.

43 Eno molongena wale mare wendo ombá, kanu walemanga enonga opa-puluema ongo ‘Enonga koleamonga aulke naa liepili!’ ningu ma liku máku toko, pala-mele teko opa-puluema eno molko makapu teko ‘Eno sukundu molangi!’ ningu aku tenge.^s

44 Aku tekolie ningemone, pe Jerusalleme ulkema pali toko tekisiku bulu-balu sikulie suku molonge yemboma tonge, aku-siku tenge walema wendo ombá lemo. Pulu Yemone ˻eno lipe tapondombando˼ omu walemo enone naa piliengimunge kanu walema wendo ombá.” nirimu.

45 Yesusi Jerusalleme suku pupelie nirimumuni, Pulu Yemo popo toko kaloringi ulke-tembelena ˻“Juda-yembo naa molemele yemboma ‘Pulu Yemo popo tamili!’ ningu máku tolemele kolea” niringi akune˼ suku pupe kanopalie akune mélema makete teko moloringi yemboma topa makoromba makoropalie

46 enondo nimbendo: “Pulu Yemonga bokune ungu te i-sipe nilimo:

47 Yuni enamanga taki-teki ulke-tembelena suku ˻“Juda-yembo naa molemele yemboma ‘Pulu Yemo popo tamili!’ ningu máku tolemele kolea” niringi akune˼ yemboma ungu-mane sirimu. Pulu Yemo popo tondoringi ye-awilime kinie, Pulu Yemonga ungu-manemanga pulume pilku mane siringi yema kinie,^w Juda-yemboma nokoringi ye-awilime kinie, enone yu toko kondonge aulke te kororingi

48 nalo we-yembomane yunge ungu komu tendeko pilku moloringi kulu enone yu toko kondonge aulke te naa kanoko lsingi.