2 Nanga yemboma aku-sipe kondi tomba yembomo yu kou paa awili te^c moko toko nomine lendeko ‘Yu kamu kolo-popili!’ ningu paka toko nomúne paa maniekondo mundulimelanje paa papu. Aku-siku toko mundulimela kinie yu kolopalie pe yu Pulu Yemonga ambolango tendo ‘Ulu-kerime tepili!’ nimbe kondi manda naa tolka. Nalo yu aku-siku nomúne naa mundulimela kinie yu yemboma kondi tombamonga Pulu Yemone yu ‘Mongo awili-tepa likimu.’ nimbe “Mindili paa nopili!” nilke kene enone yu nomúne papu paka toko mundulimela.

3 “Nanga yemboma, eno-enono telemele mele kanoko kondame!

4 Kanu-kinie ena telumunge yu wale yepoko-pakera aku-sipe nu-kinie tepa kenjipe, pe kelepa wale yepoko-pakera konopu alowa tepa nundu “Ano, kondo kolambo!” nimbé kinie kapola, nu wale yepoko-pakera kanu ulu-keri tembama ‘Manie pupili!’ ningu siye kolani!” nirimu.^d

5 Kanu-kinie Yesusini ou “Nanga kongonomo tende-paa!” nimbe lipe mundorumu yemane^e yundu ningendo: “Awilimu, nu ungu nilino mele olio ‘Sike-ungumu.’ nimbu laye-tepo mindi pilipu lipu ambolemolo kene nuni ‘awili-teko pilku liku tondolo-munduku ambolangi!’ ningu liku tapondani!” ningu mawa teringi kinie

6 ˻Awilimuni˼ enondo topondopa nimbendo: “Unjo tenga mongo akumu méle paa kangamo nalo kanu mongomo mana mundulimolo kinie unjo akopa awi-lepa angilimo kanumu. Aku-sipe mele, eno nane ungu nilio mele unjo-mongo kanga-mele paa wallo-kolte mindi pilku liku ambolemelanje, enone ‘Pulu Yemone nanga ungumu manda pilimbe.’ ningu ya angilkimu unjo awili akumundu “Nu pulkinio pali lkuruku puku, nomúne kelko angiliei!” nilimela kinie kanu unjomo enonga ungumu pilipe lipelie aku-sipe manda telka.” ˻nirimu.˼^f

7 ˻Nimbelie Yesusini ungu te pea nimbéndo:˼ “Enonga ye te yunge kendemande-ye tene ponie tendemba molo kongi-sipisipi tápu tendemba kinie pe ipupene lkondo ombá kinie yunge awilimuni yundu “Ya ongo manie molko ga nou!” nimbéye? ˻Aku manda naa nimbé.˼

8 Kanu kongono tendeli yemo yu kongono tepa kelepa ulkendo ombá kinie yunge awilimuni yundu i-sipe nimbé: “Nanga ga kalondoko boroko sikulie pe na-nanu ga nombo pora simbo kinie nu puku nunge ga kalko nani!” nimbé.

9 Ye-awilimuni ‘Tei!’ nimbé mele yunge kendemande-yemone pilipe lipe tembamonga “Ange, papu tenu.” nimbéye? Aku naa nimbé.

10 “Aku-sipela, enone Pulu Yemone enondo “Kongono tendaa!” nilimo mele pali teko likulie eno-enono ningendo: ‘Olio kendemande kerime.’ niengi! ‘Yuni olio “Teaa!” nilimo mele manjipu tepo, kongono olandopa te naa tepolie olio kendemande kerime molemolo.’ niengi!” nirimu.

11 Yesusi kolea-awili Jerusalleme pumbe pupelie nirimumuni,^g kolea-Gallilli kolea-Sameria disirikiselo aulke awi-suku-singine pupelie,

12 kolea-kanga tenga sukundu purumu. Sukundu purumu kinie kuru-kendi noli ye^h rureponga talo yu aulke omba purumune ongo anjo-siku angilku

13 enone ru ningulie ningendo: “Yesusi, Ye-Nomimu,ⁱ olio kondo kolou!” niringi.

14 Yuni eno kanopalie nimbendo: “Pulu Yemo popo tondoli yema molemelena puku, enonga kangime liku ora si-pee!” nirimu. Kanu-kinie eno punge puringi kinie eno kuru pora nimbe umbu-kangi angilierimu.^j

15 Enone konde pukulie kanoringi kinie ye akumenga te yando omba ungu-tondolo nimbe Pulu Yemonga imbi lipe ola mundundulipe omba

16 Yesusi angilierimune manie pupe tamalu pepa yundu “Paa ange!” nirimu. Kanu yemo yu Sameria-yemo.^k

17 Kanu-kinie Yesusini nimbendo: “Nane ye rureponga talo tepo konde naa linduye?^l Pe kinié ye rureponga telu akume tena molemeleye?

18 Te pea yando ongo Pulu Yemonga imbi liku ola naa mundundukumiliye? I ye-lupemo mindi okomoye? Isirele-ye kuru-kendi nomu tepo konde lindume tena molemeleye?” nirimu.

19 Kanu-kinie yuni Sameria-yemondo nimbendo: “Ola angilku puyo! Nane nu manda tembomonga “Sike.” ningu tondolo-munduku pilienumuni nu konde punu.” nirimu.

20 Parisi-yemaneⁿ Yesusi walsiku pilkulie ningendo: “Pulu Yemo ye-nomi-kingimu molopa yemboma nokomba walemo te-wale wendo ombáye?” niringi.

21 Eno kinié ya molemelena Pulu Yemo koronga ye-nomi-kingimu molopa yembo mare nokolemo-na yu ye-nomi-kingimu molopa yemboma kinie mélema pali nokomba ulumundu yembo tene “Kaname! I wendo okomo.” ningu, “Andi wendo okomo.” ningu, aku-mele manda naa ninge. Kanu walemo koronga wendo okomo lémo.” nirimu.^o

22 Aku nimbelie Yesusini yunge lombili andolimendo nimbendo: “Enone “Manie Omba Mana-Ye A Lierimu Yemo wallo-kolte kanamili!” ninge walema wendo ombá nalo naa kanonge.

23 Yembomane “Wíne molemo.”, “Ya molemo.”, ninge. Nalo aku-siku ninge kinie kolo tonge kene eno lombili naa pangi!

24 Kariapá lipe sinjipe telemo kinie koleama pali pa telemo yembomane pali kanolemele. Manie Omba Mana-Ye A Lierimu Yemo aku-sipe mele kelepa ombá.

25 Nalo ou yu mindili awili-tepa nombá, kinié molemele yembomane yu liku su-siku bulu singe. ˻Kanu-kinie kolopa lomboropa ola molopalie nimbemone,˼ pe “Ombá.” nikiru mele ombá.

26 “Ou ye Noa molopili yembomane teringi mele Manie Omba Mana-Ye A Lierimu Yemo ombá temba kinie yembomane aku-siku tengela.

27 ˻Ma-koleamanga pali˼ no ou naa topili yemboma langi nongo, yema ambo liku, amboma ye puku, aku ulume mindi teko mololiku puringi.^p Noa nona andoli sipi-ulkemonga suku purumu kinie kepe eno aku-siku ulume mindi teko molangi no topa ˻koleama pali none aki topa˼ yemboma pali topa kondorumu.^q

28 “Ye LLote pea moloringi yembomane aku-siku teringila. Eno langi nongo bisinete teko ponie panjiku ulke takoko, we ulu akume teko moloringi.

29 Nalo LLote kolea-awili Sodomo mundupe siye kolopa kowa purumu kanu walemonga tepe kinie kou tepene nolime kinie lo-mele mulúne manie omba Sodomo moloringi yemboma pali topa kondorumu.^r

30 “Manie Omba Mana-Ye A Lierimu Yemo kelepa ombá walemonga ou teringi nikiru mele pe aku-siku teko molongela.

31 “Yu ombá kanu walemo wendo ombá kinie ulke imune ola molonge yemboma altoko lkondo puku enonga ulke sukundu nosinge mélema puku naa li-pengi! Aku-sikula poniena molonge yemboma mélema ulkena liepili nosiku poniena punge kinie kanu walemo wendo ombá kinie ulkena nosinge mélema altoko puku naa li-pengi!

32 LLote-menu terimu mele pilieme! ˻LLote pea Sodomo munduku siye-kolkolo kowa puringili nalo Sodomo tepe manie orumu kulu pilipelie Pulu Yemonga angello tene ou “Iki-teko naa kanokolo we sumbi-siku kowa pale!” nirimu mele LLote-menu naa pilipe lipe, iki-tepa kanorumu kinie api-kusa a-lepa kou-mele we angilierimu.˼^s

33 “ ‘Na naa kolopo konopu simbo ulume mindi tepo molambo!’ ningu Pulu Yemonga ungu naa pilku linge yemboma sike kolonge. Nalo ‘Na kolondu liemo papula.’ ningu Pulu Yemonga ungu pilku liku teko molonge yemboma naa kolko molko mindi punge.

34 “Nane enondo paa sike nimbu sikirumu: “Manie Omba Mana-Ye A Lierimu Yemo kelepa ombá walemonga ipulueli yembo talo suluminia telune pengele kinie ˻Pulu Yemonga angello tene˼ omba yembo te we pepili mundupe siye kolopa te lipe memba pumbe.

35 Ambo talo langi kalongele teko molongele kinie ˻angello te omba˼ ambo te we molopili mundupe siye kolopa te lipe memba pumbe.

36 (Ye talo lamana^t unjo toko angilingele kinie ˻Pulu Yemonga angello tene omba˼ ye te we molopili mundupe siye kolopa te lipe memba pumbe,)” nikiru.” nirimu.^u

37 ˻Yuni nirimu mele pilkulie˼ enone ningendo: “Awilimu, aku ulumu tena tembaye?” niringi.