Ya Mana Nosilimolo Mélemando Yesusini Ungu Te Nirimu Temanemo
16
(Pulu Yemonga ungumu. Kolomongo-kanga wane.)
˻Aku nimbelie˼ Yesusini yu lombili andolimendo nimbendo:
“Walse ye-kamako te molorumu kinie yunge méle noserimumenga nokondoli ye te molorumula. Walse yembo marene kamakomo molorumune ongo, yunge mélema nokondoli yemone terimu mele ongolie yundu ningendo: “Nunge méle nosilinomanga nokondoli yemone nu tepa kenjipe, nunge mélema ‘We manie pupili!’ nimbe yu akume nokopa naa kondolemo.” niringi.
2 Aku niringi pilipelie kamakomone kanu yemondo ‘Ou!’ nimbelie yundu iri topa nimbendo: “I ungu nambolka ungumu nikimiliye? Nuni nanga mélema teko kenjilino mele ningi kinie pilipulie nuni nanga mélema terinu teleno mele bokune toko, yando sikulie pe pani! Nu nanga mélema altoko manda naa nokani! Nu makorombo.” nirimu.
3 Kanu mélema nokondoli yemo yuyu nimbendo: “Apa! Kinié nambe-eamboye? Nanga awilimuni nanga kongono teliomo wendo lipe na makoromba tekemo kene na nambe-eamboye? Na ma akumbondo tondolo naa pulimo-na aku kongonomo manda naa tembo. Yemboma langi mawa tembondo pipili kolombo.
4 Akumunge na tembo mele kinié pilipero. ˻Nanga awilimuni pundu anjerimu yemboma lipu tapondopolie enondo ‘Pundu ekendo mindi tangi, ekendo manie pupili!’ nimbo kinie˼ pe na makoromba kinie kanu yembomane na konopu siku liku tapondokolie nando “Pea peamili ou!” ninge.” nimbelie nirimumuni,
5 yunge awilimuni pundu anjerimu yemboma ‘Yu-mele-mele wangi!’ nimbe kumbi-lepa orumu yemondo nimbendo: “Nanga awilimuni nu-kinie méle nambepa pundu anjerimuye?” nimbe walserimu kinie
6 yuni topondopa nimbendo: “Unjo-ollipi mongo wele-mingi pape-paono pundu anjerimu.” nirimu kinie
kamakomonga mélema nokondoli yemone yundu altopa nimbendo: “Pundu anjeli bokumu i sikiru; ya manie molko, pape-paono toko mondoringi gomomo ora toko ltekolie kolo-wangoko gomo kondena wele-mingi tu-paono-tene welea toko mondou!” nirimu.
7 Yunge bulkundu orumu yemondo nimbendo: “Nanga awilimuni nu-kinie méle nambepa pundu anjerimuye?” nimbe walserimu kinie
yuni topondopa nimbendo: “Rasi-witi wale pape-paono pundu anjerimu.” nirimu kinie
mélema nokondoli yemone yundu altopa nimbendo: “Pundu anjeli bokumu i sikiru; ya manie molko, rasi-witi wale pape-paono toko mondoringi gomomo ora toko ltekolie kolo-wangoko gomo kondena rasi-witi wale po-paono welea toko mondou!” nirimu.
8 Yu aku terimu pilipelie ye-kamako awilimuni kanu tepa kenjeli yemo yu kapi nirimu. Yunge mélema sike wa-mele lipe tepa kenjerimu nalo yunge pilipe konginjelimu paa olandopa perimu pilipelie yu kapi nirimu.
“Ya mana molko, Pulu Yemo konopu naa mondolemele yemboma, enonga pilipe konginjelimu paa olandopa; pa teline molko Pulu Yemo konopu mondolemele yemboma enonga pilipe konginjelimu maniendopa. We-yembomane yembo te-kinie kou-kongono tengendo, molo ulu te tengendo, aulkemo sumbi-siku kanoko akisiku kondolemele; pa teline molemele yemboma aku-sipe tondolomo maniendopa pelemo. We-yemboma aku-siku molemelemonga ˻ye-awilimuni tepa kenjeli yemo aku-sipe kapi nirimu.˼” ˻nimbe Yesusini nirimu.˼
9 “Nane enondo nimbu siembo: “Kinié ya mana molkolie mana-mélema liku ‘Yemboma nunge angenali mele molangi!’ ningu nunge méle nosilinomanga eno liku tapondani! Pe mélema pora nimbé kinie nu kolea peanga kamu-kumu lembana puni kinie akune molongemane nundu “Ya kamu pea molamili!” ninge.” nikiru.” ˻nirimu.˼
10 “Yembo tene yembo tenga méle koltalo nokopa kondondolemo kinie kanopalie ‘Méle awisili simbo kinie nokopa kondondomba lemo.’ nilimo. Yembo tene yembo tenga méle koltalo nokopa kenjindilimo kinie kanopalie “Méle awisili simbo kinie nokopa kenjindimbe lemo.” nilimo.
11 Nuni ya mana nosilimele mélema nokoko naa kondonu liemo nu paa sike méle peanga awisili lupe-lupe Pulu Yemone silimoma ‘Nokondani!’ manda naa nimbé. ˻Ya mana nosilimele mélema maniendopa, Pulu Yemone silimo méle kande-kande lupema olandopa kanumu.˼
12 Nuni ya mana nosilino mélema paa sike nunge mólo; kanu mélema Pulu Yemonga. Akumunge nuni yunge mélema nokoko naa kondondonu liemo pe yuni ‘nunge nosieni!’ nimbe simbe tepa molemo mélema manda simbeye?
13 “Kendemande-yembo teluni ye awili talonga kongonoselo lipe tere lepa manda naa tendemba. Ye-awili te konopu keri panjipe, te konopu mondomba. Molo aku naa temu liemo ye-awili tenga ungu nimbéma paa konopu sipe pilipe lipe kongono nimbéma tondolo-mundupe tendepa, te konopu keri panjipe yunge ungu nimbéma ta nimbé. Yembomane Pulu Yemonga kongonomo kinie Kou-Monemonga kongonomo kinie liku tere leko manda naa tendenge.” nirimu.a
14 Yesusini aku-sipe nirimu pilkulie Parisi yema eno kou-mone kepe mélema kepe konopu paa awisili mondoringimunge yuni ungu nirimumu liku su siku tawe teringi kinie
15 Yesusini enondo nimbendo: “Eno-enono i-siku ningendo: ‘We-yembomane olio Parisi-yema konopu sumbi-sipe pepa, peangama molemolo kanoko niengi!’ ningu molemele nalo enonga konopune paa sike pelemo mele Pulu Yemone kanopa molemo. Mana-yembomane kanokolie ‘Méle paa komindi, méle paa olandopamo.’ nilimele mélema Pulu Yemone kanopa keri kanolemo.” ˻nirimu.˼
Ungu-Manemanga Kinie, Temane-Peangamonga Kinie, Yesusini Ungu Te Nirimu Temanemo
16 “˻No-Lindeli˼ Jono ou mana naa omba molopili Pulu Yemone yemboma ‘Teaa!’ nirimu mele ˻Pulu Yemonga ungu-manema yando nimbe sirimu ye˼ Mosisini torumu bokume kinie, Pulu Yemone ungu-umbu tondorumume pilku yemboma ningu siringi yemane boku toringime kinie, kanu bokumenga molorumu, yandopa-yandopa mane siku yemboma ningu siringi.b Nalo kinié, Pulu Yemone omba ye-nomi-kingimu molopa yemboma nokopa kondomba temane-peangamo topo silipu andolemolo. Pulu Yemo ye-nomi-kingimu molopa yemboma nokomba yembo-talapenac sukundu puku molongendo yemboma ekelepa teko pulimele.
17 Mulú kinie ma kinie walse manda pora nimbé nalo Pulu Yemone ungu-manema Mosisini yando nimbe sipe boku torumu molemo imbimenga imbi telu paa wallo-kolte kepe manie manda naa pumbe.d Pulu Yemonga ungu-manema pali lepa mindi pumbe.” ˻nirimu.˼
Ye Tene Ambo Te “Kelko Pu!” Nilimomonga Yesusini Ungu Te Nirimu Temanemoe
18 “Ye tene yunge ou limo ambomo makoropa “Kamu pu!” nimbelie kelepa ambo te limo kinie aku yemone wa-ulu-kerinele telemo. “Pu!” nimbe makorolemo ambomo pe ye tene yu limo kinie kanu yemo kepe wa-ulu-kerinele telemola.” ˻nirimu.˼
Ye-Kamakomo Kinie Ye-Koropa LLasirasi-selonga Temanemo
19 ˻Nimbelie Yesusini kelepa temane te topalie nimbendo:˼
“Ye-kamako te molorumu. Yunge wale-pakoli paa peanga kou paa olandopa pulime pakopa, alieli yunge ulkena langi peangama mindi nomba perimu.
20 Ye-koropa te molorumula, kanumunge imbi LLasirasi. Yu enamanga taki-teki ‘Kamakomone yu kondo kolopa kou-mone te molo langi te simbenje.’ ningu yunge ulke-kerepulune ‘Molopili!’ ningu mengo ongo mondoringi. Yunge kangime pali ereli terimu.
21 Aku erelime owamane ongo pene-mane lieringi. Yu ‘Kamakomonga langi-pundu manie pumbema lipu nombó.’ nimbe molorumu.
22 Pe walse koropamo kolorumu. Kolorumu kinie angellomane yunge minimu liku, ˻Juda-yembomanga pulu-pulu anda-kolepa˼ Eporayamo molorumune mengo puringi.
Kamakomo kolorumula. Yembomane yu óno teringi.
23 Kanu-kinie yu tepe-koleana mindili nomba molopalie, yuni mongone olando sipe kanopa aulke sulune Eporayamo kanopa LLasirasi pea moloringili kanorumu.
24 Kanopalie ungu te tondolo-mundupe nimbendo: “Toto Eporayamo, na kondo kolkolie ‘LLasirasini nona ki-sundumu manie mundupelie ‘Nanga alumbelune koma liepili!’ nimbe tendepili!’ ningu yu yando mundoyo! Na i tepemonga paa mindili nombo molio.” nirimu.f
25 Nalo Eporayamone yundu nimbendo: “Toto, ou moloringili mele pílie! Elo mana moloringili kinie nu méle kande-kandema nosiku kapola molorunu; LLasirasi yunge méle kerime nosipe, molopa kenjerimu kanumu. Pe kinié yu konopu peanga pepili molemo, nu mindili nongo moleno.
26 Molo nane “E.” nilkenje yu andine manda naa-la olka. Olio kinie eno kinie awi-suku-singine ˻Pulu Yemone˼ kombu awilimu lsimu lemo kanumu. Pe kinié ya molemolo yemboma ‘Eno molemelena anjo pamili!’ ninge kinie manda naa pungela; enonga yemboma ‘Yando wamili!’ ninge kinie yando manda naa ongela.” nirimu.
27 Kanu-kinie kamakomone nimbendo: “Aku lepamo kene, Toto, ‘Yu nanga pulu-koleana pupili mundeni!’ nimbu mawa tekero.
28 Nanga angenupili kise-pakera molemele kanumu. I kolea mindili noli koleana eno kepe naa wangi kene yuni eno liepi-liepi topa ungu nimbe sipe kondopili!” nirimu.
29 Nalo Eporayamone yundu nimbendo: “Mosisini boku torumu bokume kinie Pulu Yemone ungu-umbu tondorumume pilku yemboma ningu siringi yemane boku toringi bokume kinieg nosilimele kanumu. Enone kanu bokume molemo ungume kanoko piliengi!” nirimu.
30 Kanu-kinie kamakomone nimbendo: “Toto Eporayamo, aku manda mólo! Kolorumu yembo te lomboropa ola molopa eno molemelena pupe nimbe simu liemo ulu-pulu-keri telemelema pilku keri pilkulie siye kolko konopu alowa tenge.” nirimu.
31 Eporayamone yundu nimbendo: “Mosisinge ungume kinie Pulu Yemone ungu-umbu tondorumume pilku yemboma ningu siringi yemanga ungume kinie ˻bokumenga toringi molemo akume˼ pílie naa piliengi liemo kolorumu yembo te lomboropa ola molopa pupe nimu liemo yunge ungumu naa-la pilinge.” nirimu.” nimbe Yesusini temane te aku-sipe torumu.