2 Parisi-yema kinie Pulu Yemonga ungu-manemanga pulume pilku mane siringi yema kinie^b enone aku teringi mele kanokolie kono-kono ningu ningendo: “I yemo yu tepa kenjikimu. Ulu-pulu-kerime teli yemboma “Pea molamili waa!” nimbelie, langi alieli eno pea nongo molemelela.” niringi.

3 Yesusini eno aku-siku niringi pilipelie ˻i ungu-ikoma eno topa sirimu.˼ Ungu-iko imu topalie nimbendo:

4 “Enonga ye tene kongi-sipisipi^c pape-paono mondolka kinie te talopa lelkanje yuni sipisipi po-paono-tene kelepa nani wema kolea ku lieline molangi siye kolopa pupe, talopa lelka sipisipimu kanopa limbendo korolipe naa pulkeye? ˻Korolipe pulke.˼

5 Pe kanopa lipelie yuni konopu sipe apu topa lkondo memba pulke.

6 Kanu-kinie lkondo ombalie yemone yunge pulu lemo yembomando kinie yunge ulke kere-pongolo yembomando kinie walsipelie nimbendo: “Nanga kongi-sipisipi talopa liemu kanumu kanopo lindu kene pea konopu sipu molamili waa!” nilke.” ˻nirimu.˼

7 ˻Nimbelie ungu-ikomonga pulumu nimbe para sipelie nimbendo:˼ “Nane eno ungu te nimbu sikirumu: “Yembo konopu sumbi nimbe pepili molemele yemboma aku-siku molemele-na eno ulu-pulu-kerime munduku siye-kolko konopu alowa tenge aulke te naa lemo kanumu,^d kanu yemboma mulú-koleana ˻angellomane˼ konopu we silimele. Nalo sipisipi nokoli yemone yunge sipisipi talopa lielimu kanopa lipelie paa olandopa konopu silke mele aku-sipe ulu-pulu-keri teli yembo te yunge ulu-pulu-keri telemoma pilipe keri pilipe mundupe siye kolopa konopu alowa tembamonga angellomane paa olandopa konopu singe.” nikiru.” ˻nirimu.˼

8 ˻Nimbelie kelepa ungu-iko te pea topalie nimbendo:˼^e

9 Kanu-kinie kanu koumu kanopa lipelie yunge pulu lemo yemboma kinie yunge ulke kere-pongolo yemboma kinie walsipelie nimbendo: “Nanga kou-mone suroli manie pumu kanumu kanopo lindu kene pea konopu sipu molamili waa!” nilke.

10 “Nane eno nimbu sikirumu: “Kanu ambomo konopu silke mele aku-sipe ulu-pulu-keri teli yembo te yunge ulu-pulu-keri telemoma pilipe keri pilipe mundupe siye kolopa konopu alowa tembamonga Pulu Yemonga angellomane konopu singe.” nikiru.” nirimu.^f

11 ˻Aku nimbelie˼ Yesusini kelepa ˻ungu-iko yepoko-sipemo pea topa ye-awilime mane-sipelie˼ nimbendo:

12 Walse kango-akiliomone lapando nimbendo: “Tata, nu kolonimunge moya-mélema isili-ou moke teko na sini mele sieni!” nirimu kinie kanu yemone yunge noserimu mélema moke tepalie yunge kangoselo sirimu lsingili.

13 Kanu mélema elo moke tepa sirimu kinie kango-akiliomo wale pokore mindi molopalie, pe méle sirimume pali lipe memba aulke sulu tenga purumu. Aulke sulu tenga pupelie nirimumuni, kolea tenga pupe molopalie yu ‘Langi peangama nambo!’ nimbe, ‘Mulumbale peangama pakambo!’ nimbe kou-mone awili-tepa pulimo mélema topo-topa lipe panjipelie, ‘No nambo!’ nimbe topo-topa lipe, ‘Amboma pea peamili!’ nimbe kou-mone sipe, aku telipe purumu kinie yunge kou-mone mélema pali pora nirimu.

14 Yunge mélema kinie kou-mone kinie pora nirimu kinie yu paa koropa purumu. Kanu-kinie yu molorumu koleana engele awili-tepa lierimu kinie yu mélema pali mólo torumu kinie yu paa engelene kolorumu.

15 Yu engele terimu kulu yu kanu kolea pulu ye te molorumune pupe “Kou-kongono te teambo si!” nimbe mawa terimu kinie yuni nimbendo: “Kapola, nanga kongi tápu tendeko ‘Langi nangi!’ ningu liku si!” nirimu.

16 Yu ˻engelene paa kolopalie˼ ga-kilume kinie konapa-bulume kinie kongi sirimume ‘Namboa!’ nimbe pilipe molorumu. Nalo yembo tene yu langi te naa siringi.

17 Kanu-kinie pe yu konopu lipe mundupe pilipelie yu yuyu nimbendo: ‘Tatanga kongono tendelemele yemboma ga awisili nongo olo telemo nalo na ya engelene kolopolie kamu kolombo tekero.

18 Akumunge na yando pupu Tata molemona pupulie yundu nimbondo: “Tata, nu kinie Mulú-Koleana Molemo Yemo kinie nane tepo kenjerindu.

19 Na kango kerimu kene nunge marena molombo kapola naa temba kene nunge kongono-ye te molambo!” nimbo.’ nimbe pilierimu.

20 Aku nimbe pilipelie yu molorumu koleamo mundupe siye kolopa, lapa molorumune ˻ulke-koleando˼ pumbe purumu.

21 Kanu-kinie kangomone lapando nimbendo: “Tata, nu kinie Mulú-Koleana Molemo Yemo kinie nane tepo kenjerindu. Na kango keri kene nunge marena molombo kapola naa temba kene nunge kongono-ye te molambo!” nirimu.

22 Aku-sipe nimbe molorumu kinie lapane yunge kongono tenderingi kendemande-yemando nimbendo: “Welea puku nanga mulumbale peangamo liku mengo ongo yu pakondoko, ki-ongi te liku yunge kíne mondondoko, kimbu-su liku yunge kimbune mondondayo!

23-24 Aku tekolie kongi-kao walo awilimu toko kalondoko molombolona mengo waa!” nirimu. “Nanga kangomo yu koronga-ou purumu, ‘Yu kolorumunje.’ nimbu pilierindu nalo kinié yu kelepa okomo. Yu ou pupe tepa nema lsimu nalo kinié altopa okomo kanopo likimulu kene konopu sipu kongi-kao nombo molamili!” nirimu kinie eno aku-siku konopu siku kongi nongo moloringi.

25 Nalo yunge kango-komomo poniena kongono tepa molopalie pe ipupene ulkendo ombá orumu kinie eno konopu siku musiki toko denisi teko moloringi ungumu pilipelie

26 yuni kongono-kendemande-ye tendo “Ungu te niembo ou!” nimbelie nirimumuni, yundu walsipelie nimbendo: “Ulu tekemelemo nambemune tekemeleye?” nimbe walserimu.

27 Kanu kongono kendemande-yemone yundu topondopa nimbendo: “Angena omu-ne laniene kanopa yu manda mele molopa ulu te naa tepa omu-ne kanopalie konopu sipe “Kongi-kao walo awilimu namili!” nimbe topa kalomu.” nirimu.

28 Aku-sipe nirimu pilipelie kango-komomo yu mumindili kolopalie “Na ulkena suku paa naa pumbo!” nirimu.

29 lapando topondopa nimbendo: “Pílie! Na alieli, ponie awisili, nunge kongono tendepo molopolie nuni nilino ungume alieli pilipu lipu tenge panjipu, walse kepe nunge ungu te bulu naa sipu molio nalo nuni nando walse kepe kongi-meme walo te ‘Kangoma-kinie pea konopu siku nongo molangi!’ ningu naa silino.

30 Nalo kinié nunge kango te omba, yuni ambomando “Na pea peambili kou-mone siembo!” nimbe nunge kou-mone eno sipe pora sirimu, kanu kangomo omu kinie nu konopu siku ‘Kongi-kao walo awilimu namili!’ ningu tonu lepamo.” nirimu.

31 Lapane yundu topondopa nimbendo: “Kangomo, nu kinie na pea alieli molembolo kinie nanga mélema pali oltonga.

32 Nalo kinié angena kolorumu^g kanumu altopa omu. Yu ou pupe tepa nema lsimu, kinié kelepa omu kanopo likimulu kene olio papu konopu sipu musiki topo langi nombo molkomolo akumu kapola tekemolo.” nirimu.” ˻nimbe Yesusini˼ nirimu.^h