2 Aku ningu panjikulie yu liku, ka toko, mengo puku, ˻Romo˼-gapomano ye-nomi Paillate molorumune mengo puku kote tenderingi.

3 Kanu-kinie Judasi, yu Yesusi lipe yunge opa-puluema sirimu ye kanumu, Yesusinge kotemo pilkulie “Kolopili, toko kondangi!” niringi kinie pilipelie yuni Yesusi eno lipe sirimu mele pilipe keri pilipelie, kelepa konopu alowa tepa enonga kou-sillipa wane paono tene ou yu siringime kelepa memba pupe Pulu Yemo popo tondoringi ye-awilime kinie Juda-yembomanga tapu-yema kinie sipelie nimbendo:

4 “Nane ye eno lipu sindu kanu yemo yu ulu te tepa naa kenjeli yemo ‘Toko kondangi!’ nimbu lipu sindumu^d paa ulu-pulu-keri te tendu.” nirimu.

5 Kanu-kinie Judasi yuni kou-sillipa kanume meli pupe ˻Pulu Yemo popo toringi˼ ulke-tembele palana topa anjokondo mundupelie yu eno mundupe siye kolopa anjo purumu. Anjo pupelie ‘Ka nombo kolambo!’ nimbelie ka te lipe meli pupelie ka nomba kolorumu.

6 Pulu Yemo popo tondoringi ye-awilimene kou kanume ˻manie polona˼ lierimu kanoko likulie ningendo: “I koume yembo topo kondomolondo simulume kene ulke-tembele koume kinie tere lepo nosimolo kinie kapola naa temba. Akumunge ungu-mane te pelemo kene naa nosiemili!” ningulie

7 ungu te ningu panjikulie ningendo: “I kou-monemane mingi-sosipene mane tepa mimi telemo yemonga mamo topo-topo liemili! Yembo ma te naa lepa enonga kolea sulune yembo ya ongo molemelemanga yembo kolongema akune óno teangi!” ningulie aku-siku topo-toko lsingi.

8 ˻Kanu kou-monemane ye te toko kondonge aulkemo akisinderingi koumene˼ aku teringimunge kanu mamo imbi leko ‘Yembo Toko Meme Ondoringi Mamo’ niringi mele kinié kepe aku-sipu nilimolo.

9-10 ˻Juda-ye-awilimene˼ aku-siku teringimunge Pulu Yemone ungu-umbu tondorumume pilipe yemboma nimbe sirimu ye Jeremayane ulu te pe wendo ombá ou nirimu mele kamu wendo orumu. Yuni nimbendo:

11 Judasi aku-sipe tepa molopili Yesusi Romo-gapomano ye-nomi ˻Paillate˼ molorumumunge kumbi-kerena angilierimu kinie kanu ye-nomimuni ˻yunge kotemo pilipelie˼ yu walsipe pilipelie nimbendo: “Nu Juda-yembomanga ye-nomi-kingimu molo móloye?” nirimu.

12 Pulu Yemo popo tondoringi ye-awilime kinie, ˻Juda-yembomanga˼ tápu-yema kinie, enone Yesusi kote tendeko Paillatendo ˻kolo toko˼ ungu awisili ningulie ningendo “Yesusi yu tepa kenjilimo.” ningu yu kote tenderingi kinie Yesusi yu ungu te naa nimbe we angilierimu.

13 ˻Yesusini ungu te naa nirimu kanopalie˼ Paillatene yundu nimbendo: “Nu ulu-keri awisili terinu nikimili mele nu naa pilkinuye?” nirimu kinie

14 Yesusi ˻yu tepa kenjerimu niringi mele˼ pundu topa ungu teluri kepe naa nimbe ˻we angilierimu kinie kanopalie Romo-˼gapomano ye-nomi kanumuni paa mini-wale mundupe konopu awisili lipe mundorumu.

15-16 ˻Yesusi kote tendeko molangi,˼ ye te, yunge imbi Barapasi, yu mongo lsimu mele yemboma pali pilku moloringi kanu yemo yu ka-ulkena perimu. ˻Ponie tenga-tenga, Juda-yembomane kolea-awili Jerusalleme ongo akune suku˼ Pulu Yemone enonga anda-kolepalime Naa Topa We Omba Purumu mele pilingendo^f langi noringi walema wendo orumu kinie enone ka-ulkena perimu ye te imbi leko “Wendo liku mundou!” ningu mawa teringi kinie ˻Romo-gapomano ye-nomimuni kanu yemo wendo lipe yemboma sirimu.

17 ˻Aku-siku te-pou-pou teringi walema kamu wendo omba pepili Yesusi kote tenderingi pilipelie nirimumuni,˼ Juda-yemboma liku máku toko moloringi kinie Paillatene eno walsipelie nimbendo: “Ye nawe ka-ulkena wendo lipu eno siembo konopu lekemeleye? Ye Barapasi wendo lipu siembo, molo enone “Pulu Yemone “Eno nokopa kondomba ye te lipu mundumbo.” ou nimbe mako torumu ye-nomi Kirasimu.”^g nilimele ye Yesusi wendo lipu siemboye?” nirimu.

18 ˻We-yemboma Juda-yembomanga ye-awilime munduku siye kolko enonga ungume liku su siku Yesusinge ungumu pilku yu lombili andoringimunge Juda-yembomanga ye-awilime˼ Yesusi-kinie konopu keri panjikulie^h kote tenderingi-ne pilipelie Paillatene aku-sipe nirimu.

19 Paillate kote-pilieli polona ˻molopa ‘Juda ye-awilimene topondoko ungu te ningenje.’ nimbe nokopa˼ molorumu kinie yunge menuni ungu te yu molorumune nimbe mundupelie nimbendo: “Nuni andi ye sumbi-nílimu ulu te naa tei! Kinié yu kumbu tepo kanondumunge nanga konopune umbune awisili wendo omu kene yu ulu te paa naa tei!” nirimu.

20 ˻Paillatene “Ka-ye nawe wendo lipu siemboye?” nirimu kinie pilkulie˼ Pulu Yemo popo tondoringi ye-awilime kinie, ˻Juda-yembomanga˼ tapu yema kinie, enone we-yemboma kondi toko ungu-umbu tondokolie “ ‘‘Yesusi topa kondopili! Barapasi wendo lipe sipili!” niee!” niringi.

21 ˻Aku niringi kinie pilipelie Romo-˼gapomano ye-nomimuni enondo “Yeselonga ‘nawe wendo lipu siembo!’ konopu lekemeleye?” nimbe walserimu kinie

22 Aku niringi kinie pilipelie Paillatene enondo nimbendo: “Aku liemo, enone “Pulu Yemone “Eno nokopa kondomba ye te lipu mundumbo.” ou nimbe mako torumu ye-nomi Kirasimu.” nilimele ye Yesusi, nambe-eamboye?” nimbe walserimu kinie

23 Aku niringi pilipelie yuni enondo nimbendo: “Aku nambemuneye? Yu mongo nambolka mongore limuye?” nirimu.

24 Yunge ungumu naa pilku, opa tenge teringi kanopalie Paillatene no mare kolopa lipe, yembo liku máku toko angilieringime kanoko molangi ki kulumiye topalie nimbendo: “I yemo toko kondonge kolomba kinieⁱ eno-kinie ungu pemba; nanga ungu te naa pemba.”^j nirimu.

25 ˻Aku-sipe nirimu kinie pilkulie˼ yembomane topondoko ningendo: “Yu tonge kolombamonga umbune pembamo olio kinie olionga ambolangoma kinie pepili!” niringi.

26 Kanu-kinie ye Barapasi ka-ulkena wendo lipe eno sirimu. ˻Aku tepalie˼ Yesusi lipe ˻yunge ami-yema˼ sipelie nimbendo: “Yu ka-pulsene tokolie pe ‘Unjo-perana kolopili!’ ningu mengo puku unjo-perana uku toko panji-pee!” nirimu.

27 Kanu-kinie ˻Romo˼-gapomano ye-nomimunge ami-yemane Yesusi liku kanu ye-nomimu perimu ulke-awili^l akune suku ˻yemboma liku máku toko moloringi koleana˼ pukulie, enonga ami talape yema pali “˻Yesusi ya molemona˼ sukundu-sukundu waa!” niringi.

28 Kanu-kinie yunge mulumbalema kulku wendo lindiku, ‘Yu ye-nomi-kingi te none tepili!’ ningu mulumbale kondoli peanga te pakondoko,

29 unjo-ka koko molorumu te mulkupiye teko ‘Ye-nomi-kingimunge waniemo.’ ningu pengena mere mundunduku, kingimene unjo-kope te we ambolemele mele koló te liku yunge ki-umbukundu amondokolie niringimuni, yu angilierimune koporongo langoko ungu-taka tondoko imbi we kólo toko liku ola mundundungendo “Juda-yembomanga ye-nomi-kingimu, nu angilinoye?” ningu

30 yunge kumbi-kerena olkambe toko kandoko, koló kope ambolorumumu liku yunge pengena kope to-pou-pou teringi.

31 Yu aku-siku ungu-taka tondoko pora sikulie mulumbale kondolimu kulunduku, yunge ou panjerimu mulumbalema altoko panjindikulie “Yu unjo-perana kolopili, panji-pemolo!” ningu yu liku meli puringi.

32 ˻Romo-ami-yemane Yesusi Jerusalleme palana˼ ulsu mengo punge pukulie niringimuni,ⁿ kolea Sairini^o ye te, yunge imbi Saimono, ambolko liku ka-mele siku Yesusi kolomba unjo-peramo “Kolo wangoko mendei!” ningu siringi.

33 ˻Pukulie˼ kolea Golkota puku akune moloringi. (Golkotanga ungu-pulumu ‘penge ombele lieli koleamo’.)

34 ˻Yesusi akune mengo pukulie niringimuni, ‘Yemboma mindili naa nangi!’ ningu˼ no-waenena suku marasini kombili teli te munduku noseringi aku no-waenemo^p ‘Yu nopili!’ ningu, siringi nalo aku no-waenemo nomba pilipelie “Mólo!” nimbe naa norumu.^q

35 Kanu-kinie ˻ami-yemane˼ yu unjo-perana ola panjikulie unjomo liku ola anjeringi. ˻Aku tekolie, ou unjona ola uku toko naa panjikulie˼ yunge mulumbale ˻kulunduku noseringime˼ ‘Moke teamili!’ ningu eno yu-mele-mele linge mele pilingendo kou-kate teko pe mulumbalema lsingi.^r

36 Pe yu unjo-perana ola angiliepili tápu-teko kanoko moloringi.

37 ‘Yu mongo lsimu mele yemboma kanangi!’ ningu

38 Opa tekolo mélema wa lsingili ye talo pea unjo-pera talonga uku toko panjeringila. Te Yesusi yunge ki-umbukundu uku toko, te ki-tarokondo uku toko panjeringi.^s

39 Akune ongo puringi yembomane Yesusi ˻kanoko keri kanokolie yu˼ ungu-taka tondoko iri-mele tokolie

40 ningendo: “Aa! “Ulke-tembelemo tekisipulie altopo wale yepoko omba pupili takopo limbo.” nirinu yemo,^t ‘Naa kolambo!’ ningu nu nunu liku tapondou! Nu sike Pulu Yemonga Malo liemo unjo-perana manie ou!” niringi.

41 Aku-sikula Pulu Yemo popo tondoringi ye-awilime kinie, Pulu Yemonga ungu-manemanga pulume pilku mane siringi yema kinie,^u ˻Juda-yembomanga˼ tapu-yema kinie, enone kepe yu ungu-taka tondokolie ningendo:

42 “Yu yembo-wema ‘Naa kolangi!’ nimbe lipe tapondorumu nalo yu-yuyu ‘Naa kolambo!’ nimbe manda naa lipe tapondokomo. Yu ‘Isirele-yembomanga ye-nomi-kingimu ˻molio.’ nilimo mele sike aku-sipe˼ molemo liemo yu-yuyu unjona manie opili! Yu-yuyu unjona manie ombá kinie kanopolie ‘Yu sike olionga ye-nomi-kingimu.’ nimbu tondolo-mundupu pilimolo.^v

43 Yuni ‘Pulu Yemone na lipe tapondomba.’ nimbe tondolo-mundupe pilipe molemo kanumu; yu “Pulu Yemonga Malo molio.” nilimo^w kene Pulu Yemone yu kanopa peanga kanopa, ‘Yu manie we olkanje papu.’ konopu liemu liemo kapola, yu omba yu lipe tapondopa ˻unjona wendo lipili˼! ˻Aku-sipe temu liemo ‘Yu sike Pulu Yemonga Malo.’ nimbu tondolo-mundupu pilimolo˼.” niringi.

44 Wa noli ye talo yu-kinie unjoselonga uku toko panjeringi yeselone yu aku-siku ungu-taka tondoringilila.

45 ˻Yesusi unjona ola we pepili˼ awi-tangoli ena tuwellepo-killoko terimu kinie kolea pali sumbulu topalie, pe ipupene ena tere-killoko terimu kinie kelierimu.

46 Ipupene ena tere-killoko mele terimu kinie Yesusini ru nimbelie nimbendo:

47 Akune nondoko angilieringimenga marene yuni aku nirimu kinie pilku ˻sundukulie˼ ningendo: “Pilieme! Yu Illainja walsikimu.” niringi.^z

48 Aku nirimu kinie pilieringimenga ye te tamburumbu lkisipe pupe ulú-pinje mele te lipe no-waene kombili teli mare akune panjipelie, ‘Yesusi no-waene kombili teli pinjena pelemomo nopili!’^a nimbe memba omba unjo-pepena tenga ka topa olando sirimu.

49 ˻Nalo yu no-waenemo sirimu mele kanokolie˼ we-yembomane ningendo: “Mólo! Kinié unjona we angiliepili! Illainjane sike yu ‘Naa kolopili!’ nimbe lipe tapondopa manie limbendo okomonje, kanopo kanamili!” niringi.

50 Yesusini ungu te tondolo ru nimbelie,^b pe yunge minimundu ‘Pu!’ nimbe yu kolorumu.

51 Yu aku-sipe kolorumu kinie ˻ulu-awili mare˼ walsikele ˻wendo orumu.˼ Pulu Yemo popo toko kaloringi ulke-tembele ˻Jerusalleme suku angilierimu akune sukundu Pulu Yemo molorumu˼ suluminia paa kake telimunge kere-pulune ˻‘Yemboma sukundu naa pangi!’ ningu ou alieli˼ mulumbale awili tene pipi siku panjeringi angilierimu. ˻Yesusi kolopa pora sirimu kinie˼ kanu mulumbalemo awi-suku-singine olakondo maniendo-sipe olá torumu.^c ˻Aku tepa,˼ ma jimi-jimi te tepa, kou awilime topa ungu-mengu topa,

52 yembo ou óno teringi koleama anjo-yando pupe, Pulu Yemonga yembo kake teli ou koloringime^d ˻Pulu Yemone˼ topa makinjinderimu.

53 Lomboroko ola molko óno-kolea peringine wendo ongolie, Yesusi pe lomboropa ola molorumu kinie Pulu Yemonga kolea-awili kake teline^e suku pukulie yembo awisili ‘Kanangi!’ ningu puringi.

54 ˻Romo-˼ami-ye wane-anderete nokorumu yemo kinie, yu pea Yesusi terimu mele tápu-teko kanoko moloringi ami-yema kinie, enone ma jimi-jimi tepa ulu lupe-lupema wendo orumu kinie kanokolie eno paa mini-wale mundukulie ningendo: “I yemo yu paa sike Pulu Yemonga Malo lepamo.” niringi.

55 Ambo awisili mele, ˻Yesusi unjo-perana kolorumu˼ akune sulu-teko kanoko angilieringi. Ou kanu amboma ˻enonga pulu-˼kolea Gallilli disiriki munduku siye kolko Yesusi lombili andoko liku tapondoko nokoko ˻Jerusalleme pea˼ oringi amboma.

56 Enonga ambo te Makatalla-taono ambo Maria, te Jemisi kinie Josese kinie elonga anumu Maria, te ye Seperinge maloselonga anumu.

57 Ipupene, kolea kala tomba terimu kinie Arimatia-taono ye kamako te, yunge imbi Josepo, yu kepe Yesusi lombili andorumu ye te, yu omba

58 ˻Romo-gapomano ye-nomi˼ Paillate molorumune pupe, “Yesusinge ónomo na si!” nimbe mawa terimu kinie Paillatene yu “Ónomo lipili!” nimbe ˻ami-yemando nimbe mundorumu˼.

59 ˻Paillatene “Kapola.” nirimu kinie˼ Josepo pupe ónomo manie lipe, mulú konde tene lipe kulupi torumu. Kulupi topalie

60 kou-kande konde te, Josepo yu ‘Kolombo kinie akune na óno teangi!’ nimbe kou-kande te akupe noserimu kou-kandemonga suku memba pupe noserimu. Nosipelie kou-kande kere-pulune kou awili te perele-marele memba omba pipi sipelie yu kelepa purumu.

61 Makatalla-taono ambo Maria kinie Maria te kinie^g elo kou-kandemo lierimu kere-pulune nondoko ˻yu ónomo kou-kandena noserimu mele kanoko˼^h moloringili.

62 ˻Kanu-kinie,˼ ‘Opali ˻koro molomolo˼ wale-Sambatemo.’ⁱ ningu pilkulie, kinié mele, mélema undu-undu siringi kanu walemo pora nirimu kinie opalikundu Pulu Yemo popo tondoringi ye-awilime kinie, Parisi-yema kinie,^j eno ˻Romo-gapomano ye-nomi˼ Paillate molorumune puku liku máku toko angilkulie

63 ningendo: “Ye-Awilimu, ye kanumu ou naa kolopa we molopalie yembomane ‘Sike.’ ningu pilinge ungume kolo topa nirimu kanu yemo yu “Kolopolie wale-yepoko omba pumbe kinie lomboropo ola molombo.” nirimu^k olio pilierimulu kene

64 ˻nuni ami-yemando˼ “Kanu yemo ˻oleanga˼ óno tengi kou-kandemo wale-yepoko paa mimi-siku nokaa!” nieni! Naa nokonge kinie yunge lombili andoli yemane ónomo ongo wa liku mengo pukulie “Yu lomboropa ola molopa omba pumu.” ninge. Aku-siku kolo toko ninge kinie yuni ou “Sike nikimu.’ niengi!’ nimbe kolo torumu ungumu maniendopa, enone ‘Yembomane ‘Yuni sike aku-sipe temu.’ niengi!’ ningu kolo tonge ungumu paa olandopa pemba.” niringi.^l

65 Paillatene ˻Juda-ye-awilimendo˼ topondopa nimbendo: “˻Aku liemo,˼ ami-ye mare liku mengo puku, “Yemo óno tengi koleamo nokoko kondangi!” ningu mondoko, ‘Yembomane óno-koleamo ulu te naa teangi!’ ningu ‘Aulkemo tondolo pipi siemili’ konopu lenge mele teangi!” nirimu.

66 ˻Aku nirimu kinie˼ pilkulie ami-ye mare liku meli puku, yembo-óno kou-kandemo pipi siringi koumu pala teko pele leko enonga imbimu akune toko mondokolie, “Ami-yema akune nokoko molangi!” ningu mondokolie ˻eno puringi˼.