Yesusi Lomboropa Ola Molopalie Terimu Mele Temane Marea
Kolomongo-Awili 28 pali
Temane Te: Yesusi Lomboropa Ola Molorumu Kinie Ambo Talone Yu Kanoringili Temanemob
28
(Kolomongo-kanga wane. Pulu Yemonga Ungumu.)
Wale-Sambatemo pora nimbe, enonga pulu-pulu kongono-walemoc wendo ombando kolea tangombando muni lierimu kinie Makatalla taono ambo Maria kinie, Maria te kinie,d pukulu ˻Yesusinge˼ ónomo noseringi kou-kandena ˻ónomo˼ kanongele puringili.
2 Awilimunge mulú-koleana angello te manie orumu kinie ma jimi-jimi paa tondolo-tepa terimu.e Angellomone omba kou-kandena pupe kou-kande kerepulumu pipi siringi koumu wendo lipe perele-marele memba pupe nosipe akune ola molorumu.
3 Kanu angellomonga kumbi-keremo kariapá tepa pa telemo mele pa tepa, múlu pakorumume kalopera topa paa kake telemo mele kake terimu.
4 Yesusi-óno-kolea nokoringi ami yema angellomo kanoko paa mini-wale munduku pungu-pungu ningulie yembo kololimene ungu naa ningu ulu te naa telemele mele eno aku-siku uluri naa teko we moloringi.
5 Angellomone amboselondo nimbendo: “Pipili naa kolale! Yesusi ‘Kolopili!’ ningu talko unjo-perana uku toko panjeringi kanu yemo kanongele okombele na pilkiru.
6 Yu ya naa lemo. ˻“Kolopolie wale yepoko-sipemonga˼ lomboropo ola molombo.” ou nirimu aku-mele temu. Ónomo ou lierimu koleamo ongo kanale!
7 Kanokololie popenge teko pukulu yunge lombili andolime i-siku ningu siengili: “Yesusi óno-koleana lepalie lomboropa ola molopa kolea Gallilli disirikindu kumbi-lepa pulimo kene eno akune yu kanonge.”f ningu siengili! ˻Ungu nimbu sindimbondo ondu˼ kanu ungumu nimbu pora sikiru.” nirimu.
8 ˻Angellomo aku-sipe omba mona molopalie nirimu mele˼ kanoko pilkululie amboselo pipili kolkolo kamele paa akokolo, aku-sipe konopu talo pepili lkisiku pukulu yunge lombili andolime ningu singele puringili.
9 ˻Lkisiku pungele puringili kinie˼ Yesusi lipe sinjipe elo aulkena kanopa lipelie “Okombeleye?” nirimu. Kanu-kinie elone yunge kimbukundu puku kangulkulu yu kapi ningu imbi liku ola mundundoringili.
10 Kanu-kinie Yesusini elondo nimbendo: “Pipili naa kolkololie, elo pukulu nanga angenupilindu i-siku ningelendo: “Kolea Gallillindu pangi! Yu akune kanonge.” ni-pele!” nirimu.
Óno-Koleamo Nokoringi Ami-Ye Mare Puku Pulu Yemo Popo Tondoringi Ye-Awilimendo Yesusinge Ónomo Kou-Kandena Ulu Te Wendo Orumu Mele Ningu Si-Poringi Temanemog
11 Amboselo kelko yando ongele oringili kinie Yesusinge óno-kou-kandemo nokoringi ami ye mare kolea-awili ˻Jerusalleme˼ suku puku Pulu Yemo popo tondoringi ye-awilimendoh ulume wendo orumu mele pali ningu si-poringi.
12 ˻Pilieringi kinie˼ popo tondoringi ye-awilime, Juda-yembomanga ye-awilime kinie pea máku tokolie eno-kinie ˻ungu ningulie ningendo: “We-yemboma i ulume wendo omu mele pilkulie “Yesusi lomboropa ola molomunje.” ninge kene ‘Naa piliengi!’ nimbu nambe-eamolonje?” ningu˼ kere-pale ningulie tenge mele ningu panjikulie niringimuni, ami-yema kou-mone awisili sikulie
13 enondo ningendo: “Yembomane “Yesusi nambe-emuye?” ningu walsinge kinie enone i-siku niengi: “Ipulueli uru pemulu kinie yunge lombili andolimene kiyengo ningu ongo yu liku meli pungi.” niengi!
14 ˻Olio Juda-yemboma nokolemo Romo-˼ gapomano ye-nomimuni ˻aku tengi mele˼ ungu te piliemu liemo “ ‘Eno seko kinjikimili kene mindili nangi!” naa niengi!’ nimbu olione enonga lipu tapondopo yu-kinie ungu nimolo, kanu-kinie ‘Enone óno-koleamo mimi-siku naa nokoko we uru pengi.’ konopu lepalie mindili lipe naa simbe.” niringi.
15 Aku niringimunge pilkulie ami-yemane kou-mone liku enone “Niee!” niringi mele yembomando niringi. Akumunge yandopa kinié i˻boku tokoro˼ walemo kepe Juda-yembomanga koleamanga pali i ungumu anjo-anjo pulimo pilkulie yembo awisilini kanu temanemo toko molemele.
Yesusi Omba Yu Lombili Andolime “Nanga Kongonomo Tende-Paa!” Nimbe Lipe Mundorumu Temanemoi
16 ˻Amboselo pukululie kanoko pilieringi mele temane toko siringili˼ kinie pilkulie Yesusi lombili andoli ye rureponga yepoko kolea Gallilli disiriki puku, Yesusini ma-pangi te imbi lepa ou “Akune wangi!” nirimu ma-pangine puringi.
17 Akune puku Yesusi kanokolie niringimuni, yu kapi ningu yunge imbi liku ola mundundoringi nalo marene ‘Yesusi kolorumu. Imu Yesusi molo nawenje?’ ningu konopu talo-teko lieringi.
18 Kanu-kinie Yesusi yu nondopa omba enondo nimbendo: “Tatane nando “Nu-nunu mulú-koleana mélema kinie yemboma kinie, ma-koleana mélema kinie yemboma kinie nokani!” nimbe tondolomoj na sirimu, na-kinie pelemo.
19 Aku ˻tondolo na sirimumu eno simbo eno-kinie pemba˼ kene eno ma-koleamanga pali puku ‘Yemboma pali nanga ungumu pilku liku, nanga lombili andolime molangi!’ ningu, puku ningu si-pukulie ningemone, ˻pilku liku molonge˼ yemboma no lindingendo Lapa kinie Malo kinie Mini Kake Telimu kinie enonga imbi walsikuk eno no lindiku,
20 enondo “Na lombili andolimene teangi!” nirindu mele pali ‘Aku yemboma teangi!’ ningu eno mane siengi! Aku-siku niliku andoko molonge kinie na eno-kinie alieli molambo mulú-maselo pora nimbé.” nirimu.l
˻Aku pea.˼