2 “Pulu Yemo ye-nomi-kingimu molopa yemboma nokolemo^b akumu i-sipe mele:

3 Koronga “Ye ambo limbe langi pea namili sukundu wangi!” nirimu yemboma yunge kendemandemando “ ‘‘Kinié langi namili waa!” ni-pee!” nimbe mundorumu, nalo puku aku-siku niringi kinie

4 Altopa kendemande mare lupe lipe mundupelie nimbendo: “ ‘‘Langi pea namili wangi!” nirindu yembomando puku ningendo: “Langi tepa mimi tepa pora simu. Yunge kongi-kao peleama kinie kongi-kao walo wami telime kinie tomu. Langi pali tepa mimi tepa nosilimo kene ye ambo limbemonga langi pea namili waa!” ni-pee!” nirimu.

5 Nalo puku niringi kinie naa pilku siye kolko, te yunge poniena pupe, te yunge bisinetena pupe,

6 marene kingimunge kendemandema ambolko liku teko kenjikulie toko kondoringi.

7 ˻Aku teringimunge˼ kingimu mumindili kolopalie yunge ami-yemando nimbendo: “Eno molemelena puku toko kondoko enonga koleamo tepe leko to-paa!” nimbe eno lipe mundorumu kinie pukulie, nirimu mele teringi.

8 Kanu-kinie kingimuni yunge kendemandemando nimbendo: “Ye ambo limbemonga langi nosilimolo nalo “Pea namili wangi!” nirindu yemboma nonge kapola naa temba kene

9 eno pukulie aulke lupe-lupe lemomanga pali puku yembo kanongema “Ye ambo limbemonga langi pea namili waa!” ni-pee!” nirimu.

10 Pilkulie kanu kendemandema aulkemanga pali puku yembo kanoringime pali liku máku toringi. Yembo peangama kinie yembo kerime kinie pea liku máku toringi. Kanu-kinie ye ambo limbemonga koleana yemboma paa ongo si-siku moloringi.

11 Ongo moloringi kinie kingimu “Yembo máku toko molemelema kano-pambo!” nimbe eno moloringine ombalie, yemboma ye ambo limbe ˻makune ongemonga wale-pakoli kamume ‘pakoko sukundu wangi!’ ningu siringi˼ wale-pakolimenga^c ye te wale-pakoli akumenga te naa pakopa molorumu kanopalie

12 yundu nimbendo: “Kangomo, nu ye ambo limbe wale te naa pakokono kanokoro kene nu aulke tena sukundu onuye?” nirimu kinie kanu yemone unguri naa nirimu.

13 Kanu-kinie kingimuni langi nokoringi kendemandemando nimbendo: “I yemo kimbu-kime ka tokolie pena kolea sumbulu tokomona toko pena mundee!” nirimu. Akune yemboma paa mindili nongolie kola teko pereko molonge.” ˻nimbe Yesusini nirimu.˼

14 ˻Aku nimbelie Yesusini ungu-ikomonga pulumu kamu nimbendo:˼ “Sike ˻Pulu Yemone˼ yembo awisilindu “Waa!” nilimo nalo yembo koltalo mindi^d mako topa “Sukundu waa!” nilimo.” nirimu.

15 ˻Yesusini aku-sipe nirimu˼ kinie ˻pilkulie˼ Parisi-yema^f ulsu puku eno-enono liku máku tokolie ningendo: “ ‘Yesusini ungu te nimbe kenjepili!’ nimbu nambe-eamiliye?” ningu kere-pale ningulie niringimuni,^g

16 eno lombili andolime kinie ye-nomi-kingi Erotenga talape-ye mare kinie liku Yesusi molorumune liku mundoringi, eno puku Yesusindu ningendo:

17 Aku-siku ningu molenomonga nu nambolka konopu lekenoye? Olione Romo-Gapomano Ye Paa Awili Kumbine ‘Sisa’ nilimu kou-takisi tomulu liemo kapola molo móloye? Pulu Yemone akumundu ungu-mane sirimu ungu-mane nambolkamo pelemoye? Ningu si!” niringi.

18 Nalo Yesusini yu-kinie konopu keri panjiku yu teko kenjinge teringi pilipelie enondo nimbendo: “Eno kolo toko topele-mapele toli yema,^h ‘Yuni nimbe kenjepili!’ ningu nambemune na manda manjiku kolo toko walsikimiliye?ⁱ

19 Takisi tolemele kou-mongo te na liku ora siee!” nirimu.

20 Kanu-kinie Yesusini enondo nimbendo: “I koune nainge kumbi-keremo kinie imbimu kinie molemoye?” nirimu.

21 Enone yundu ningendo: “Romo Gapomano Ye Paa Awili Kumbine Sisamonga kumbi-keremo kinie imbimu kinie molemo.” niringi.

22 Yuni aku-sipe ˻paa sumbi-sipe˼ nirimu mele pilkulie ˻‘Yu paa pilipe konginjeli pelemo yemo lepamo.’ ningu pilku˼ konopu awisili liku mundukulie yu munduku siye kolko eno puringi.

23 ˻Kanu yema Yesusi-kinie kou-takisi toli ungumu ningu pora siringi kinie˼ pe aku enamonga Sadusi-ye mare^k Yesusi molorumune oringi. Sadusi-yema eno ‘Pulu Yemone pe kolemele yemboma topa naa makinjindimbe, lomboroko ola naa molonge.’ ningu pilku moloringi talapemo. Aku Sadusi-yema ongo Yesusi walsiku pilkulie ningendo:

24 “Ungu-Mane Silimu, ˻Pulu Yemonga ungu-manema olio sirimu ye˼ Mosisini ungu-mane sipelie nimbendo:

26 Nalo ambolango te naa mendepalie yu we kolorumula. Yunge bulkundumuni kanu ambomo lsimula nalo yu kepe we kolorumula. Aku teliku pukulie ye yepoko-pakera pali ambolango telu kepe naa mengolie kolko pora siringi kinie akiliomo we kolorumula.

27 Pe ambomo yu kolorumula.

28 Akumunge, kolemele yemboma pe lomboroko ola molonge kinie kanu ambomo ye yepoko-pakera pali ya mana lsingi kulu ambomo yu ye paa nainge menu molombaye?” niringi.

29 Yesusini enondo topondopa nimbendo: “Eno Pulu Yemonga bokune ungu molemoma kinie, Pulu Yemo-kinie tondolo pelemo mele kinie, naa pilku lou lemelemonga ˻yemboma pe tengemondo nikimili mele pilku sunduku kolo tokomele˼.

30 Lomboroko ola molonge yembomanga yema ambo naa liku, amboma ye naa puku, aku paa naa tenge. Mulú-koleana molemele angelloma molemele mele aku-siku molonge. ˻Angellomane mana-yemboma telemele mele naa telemele kanumu.˼ Aku tengemonga ˻‘Eno Pulu Yemonga ungumu pilku sunduku lawa telemele.’ nikiru.˼

31-32 “Nalo ˻eno Sadusimene˼ ‘Kolemele yemboma lomboroko ola naa molonge.’ konopu lemelemonga ungu te Pulu Yemone enondo nirimumu enone naa kanoko pilimeleye? Yuni i-sipe nimbendo:

33 Yuni aku nirimu mele yembo máku toko moloringimene pilkulie yunge ungu-mane sirimu ungume pilkulie pungu-pungu ningu paa konopu awisili liku mundoringi.

34 Nalo Yesusini aku ungu nirimumuni Sadusi-yemanga ungumu pipi sinderimu, eno ungu te naa perimu-ne Parisi-yemane^p pilkulie eno liku máku toko ˻Yesusi molorumune˼ oringi.

35 ˻Oringi kinie˼ enonga ye te, yu Pulu Yemonga ungu-manemanga pulume pilipe kondorumu yemone ‘Yuni nimbe kenjimbenje manda manjipu piliembo!’ nimbe^q Yesusindu walsipe pilipelie nimbendo:

36 “Ungu-Mane Silimu, Pulu Yemone ungu-mane sirimu pelemomanga nambolka ungu-manemo yu olandopaye?” nirimu.^r

37 Yesusini yundu nimbendo:

41 Kanu-kinie Parisi-yema aku-siku we máku toko molangi Yesusini enondo i-sipe walsipelie nimbendo:

42 “Pulu Yemone “Eno nokopa kondomba ye te lipu mundumbo.” ou nimbe mako torumu ye-nomi Kirasimundu^w enone nambolka konopu lekemeleye? Yu nawe? Yu nawene kalopa limbe konopu lemeleye?” nirimu kinie

43 Yuni altopa eno walsipelie nimbendo: “Aku liemo ˻Pulu Yemonga˼ Minimu Depisinge konopune molopalie ungu te nirimu kinie Depisini pilipelie ye-nomi Kirasimundu “Awilimu” nirimu akumu nambemune nirimu konopu lekemeleye? Depisi yuni ˻ye-nomi Kirasimu molomba mele˼ i-sipe nirimu:

46 ˻Yesusini aku-sipe walserimu mele pilkulie˼ ye akune moloringimenga tene ungu telu kepe topondoko manda naa niringi. ˻Enone yu walsiku pilieringi ungume pali yuni topondopa anjo nimbe kondorumu pilkulie˼ pe altoko yu ungu te walsiku pilingendo pipili kolko naa walseringi.