Yesusini Juda-Yembomanga Ye-Awilime Umbune Awili Yepoko-Pakeranga Nirimu Temanemoa
Kolomongo-Awili 23 pali
Umbune-Awili Telu-Sipemo: Parisi Yema Kinie Ungu-Manema Pilku Mane Siringi Yema Kinie Enone Teko Kenjeringi Ulumenga Ungu Teb
23
(Kolomongo-kanga wane. Pulu Yemonga Ungumu.)
Kanu-kinie Yesusini yembo máku toringime kinie, yunge lombili andoli yema kinie, ungu nimbe sipelie nimbendo:
2 “Pulu Yemonga ungu-manemanga pulume pilku mane silimele yema kinie Parisi-yema kiniec enone Mosisini ungu-manemanga pulume mane sirimu mele yandopa mane silimele.
3 Akumunge kanu yemane eno mane silimelema pali mimi-siku pilku teangi, nalo kanu yemane mane silimele mele kanu yema enono pilku liku naa telemelemonga kanu yema enone ulu telemelema manda manjiku naa teangi!d
4 Yembo tene wale umbune teli te tepa mimi tepalie yembo te ‘mepili!’ nimbe ola lipe bulune mendelemo mele ˻aku-siku kanu yemane yembomando ungu-mane siku “I-siku i-siku teaa!” ningu˼ umbune silimele nalo laye-kolte kepe ‘Lipu tapondopo meamili!’ naa nilimele.e
5 “Kanu yemane ulu telemelema ‘we teamili!’ ningu naa telemele. ‘Yembomane olio kanokolie ‘molko kondolemele.’ ningu kanangi!’ ningu ulume telemele. Pulu Yemonga ungu-manema molemo pepá te kulupi toko mambelena molo kíne ka tongendo ‘Yemboma paa kanangi!’ ningu kulupi paa awili-teko toko,f enonga wale-pakolimenga ka moko toko mondongendo ka sulu peanga mare awili-teko moko toko mondolemele.g
6 Yembomane langi nongo yembomando “Namili waa!” nilimele kinie kanu yema ongolie ye-awilimenga polo kumbikundu ‘olio molamili!’ ningu konopu siku molemelela. Yemboma máku toko Pulu Yemonga ungumu pilimele ulkena sukundu pukulie manie molongendo ye-awilime molemele polo peanga akune ‘molamili!’ ningu mendo puku polo akune konopu siku molemelela.h
7 Yemboma máku toko molemele koleana andongendo mongo-kenge teko ‘We-yembomane olio kanoko kapi niengi!’ ningu pilkulie konopu siku pilku andoko molemelela. Yembomane enondo ‘Rapai’i nilimele kinie paa konopu silimelela.
8 “˻Kanu yemane aku telemele˼ nalo enonga nokoli ye-awili telumu mindi molemo, eno pali angenupili molemele kene yembomane “eno olionga Rapaime.” naa niengi!
9 Enonga Lapa telumu mindi molemo, akumu mulú-koleana molemo, akumunge mana-yembo tendo ˻‘olionga ye-awilimu’ ningu˼ “Tata” naa niengi!
10 Pulu Yemone “Eno nokopa kondomba ye te lipu mundumbo.” ou nimbe mako torumu ye-nomi Kirasimuj mindi enonga nokoli-ye-awilimu molemo kene yembomane enondo ˻‘olio nokolemo yemo’˼ ningu “Ye-Awilimu” naa-la niengi!
11-12 Yembo tene yunge imbimu yuyu lipe ola mundumbe kinie ˻Pulu Yemone˼ yunge imbimu topa manie mundumbe; yembo tene yunge imbimu yuyu topa manie mundumbe kinie ˻Pulu Yemone˼ yunge imbimu lipe ola mundundumbe kene enonga ye te eno nokomba ye-awili te molopa enonga kongono-kendemande-yemo molopili!”k ˻nirimu.˼
Umbune Mare Walse: Parisi Yema Kinie Ungu-Manema Pilku Mane Siringi Yema Kinie Akumendo Yesusini Iri Topa Teko Kenjeringimunge Mindili Nonge Mele Nirimu Temanemol
13 ˻Yu lombili andolimendo ungu nimbe kelepalie Yesusini Juda-yembomanga ye-awili moloringimendo nimbendo:˼
“Eno Pulu Yemonga ungu-manemanga pulume pilku mane silimele yema kinie, Parisi-yema kinie, eno mindili nongo paa molko kenjinge! Eno topele-mapele toli yema!m Enone yemboma Pulu Yemo ye-nomi-kingi molopa nokolemon mulú-koleana punge pulimele kere-pulumu pipi silimele. Eno-enono sukundu naa pulimele; yembo-lupema punge telemele kinie aulkemo pipi siku “Mólo!” nilimelela.o
14 “(Eno ungu-manemanga pulume pilku mane silimele yema kinie Parisi-yema kinie eno mindili nongo paa molko kenjinge.
Eno topele-mapele toli yema! Enone ambo-wayema liku lou siku enonga ulkema wa liku, enone ‘Yemboma kanangi!’ ningu Pulu Yemo-kinie ungume sulu teko we ningu angilimele, akumunge kote-walemo wendo ombá kinie eno-kinie umbune awili-tepa pemba.)p
15 “Eno ungu-manemanga pulume pilku mane silimele yema kinie Parisi-yema kinie eno mindili nongo paa molko kenjinge!
Eno topele-mapele toli yema! ‘Yembo telu mindi kepe konopu alowa tepa olio lombili andomba kinie papu.’ ningu ma-koleamanga kimbu-kongono teko kolea sulumenga puku, nomú-kusa sipimenga andolemele nalo pe yembo te sike enone nilimele ungume pilipe lipe konopu alowa tepa lombili andolemo kinie kanu yembomo tepa kenjilimo mele paa olandopa, enone teko kenjilimele mele maniendopa, akumunge yu tepe-koleana paa sike pumbe aulkemo akisindilimele.
16 “Eno mongo keri lielimene “˻Mongo keri lieli˼ yemboma aulkemo lipu ora siemili!” nilimele yema eno mindili nongo paa molko kenjinge! Enone yemboma mane sikulie ningendo: “Yembo tene mi lembando ‘ulke-tembelemo’ imbi lepa “Paa sike tembo.” nimbelie pe “Tembo.” nimbe panjimbe mele naa temba kinie uluri mólo! Nalo yembo tene mi lembando “ulke-tembelena ape kandoringi kou-gollomo” imbi lepa “Paa sike tembo.” nimbelie pe “Tembo.” nimbe panjimbe mele naa temba kinie kapola naa temba. Yu sike kamu tepili!” nilimele.q
17 “Eno aroma toko mongo keri lieli yema! Méle nambolka mélemo olandopaye? Kou-gollo akumu méle olandopamo molo Pulu Yemo molemo ulke-tembelemone kou-gollo mako topa ‘Pulu Yemonga’ nimbe kake tendelemo ulkemo olandopaye?
18 “Enone ungu te pea yemboma mane sikulie ningendo: “Yembo tene mi lembando ‘Pulu Yemo popo toko mélema kalemele polomo’ imbi lepa “Paa sike tembo.” nimbelie pe “Tembo.” nimbe panjimbe mele naa temba kinie uluri mólo! Nalo yembo tene mi lembando “aku polona ola melte singemo” imbi lepa “Paa sike tembo.” nimbelie pe “Tembo.” nimbe panjimbe mele naa temba kinie kapola naa temba. Yu sike kamu tepili!” nilimele.
19 Eno mongo keri lieli yema! Méle nambolka mélemo olandopaye? Polona ola ‘Pulu Yemo popo toko kalondangi!’ ningu silimele mélemo olandopamo molo polomone kanu mélema mako topa ‘Pulu Yemonga’ nimbe kake tendelemo polomo olandopaye?
20 “Akumunge, yembo tene mi lembando ‘Pulu Yemo popo toko mélema kalemele polomo’ imbi lemba kinie méle polona ola lemba mélemo kepe imbi lepa mi lemba.
21 Aku-sipela yembo tene mi lembando ‘ulke-tembelemo’ imbi lemba kinie ulke-tembelemo kinie akune sukundu molemo yemo kinie imbi lepa mi lemba.
22 Yembo tene mi lembando ‘mulú-koleamo’ imbi lemba kinie Pulu Yemo ye-nomi-kingimu molopa kolea nokombando molemo polomo kepe aku polona ola molemo yemo kepe imbi lepa mi lembala.
23 “Eno ungu-manemanga pulume pilku mane silimele yema kinie, Parisi-yema kinie, eno mindili nongo paa molko kenjinge! Eno ‘sike ungume nikimulu.’ ningu kolo toko topele-mapele toli yema!r Langi kalongendo ‘songo tepili!’ ningu enonga poniena méle kanga lupe-lupe olemomanga inie toko langine mundulimele akumenga ungu-mane te pelemomo pilku rureponga-talo rureponga-talo ningu nosilimelemanga telu-telu Pulu Yemonga ningu yu silimele.s Aku telemele nalo ungu-mane tondolo olandopa mare munduku siye kolko naa pilku telemele. ‘Yemboma apuruku yembo-awilime liku tapondoko yembo kerime teko kenjiku naa teko, yemboma naa apuruku pali kondo kolko, Pulu Yemo ‘Sike.’ ningu tondolo-munduku pilku “Temolo.” nilimele mele sumbi-siku teko molko, aku teangi!’ nimbe pelemo ungu-manemando nikiru.t Ungu-mane wema pilku telemelema munduku siye naa kolko ‘mare naa telemele’ nikiru akume pali telemelanje papu.
24 Eno mongo keri lielimene “˻Mongo keri lieli˼ yemboma aulkemo lipu ora siemili!” nilimele yema,u eno ˻ungu-mane wema tondolo-munduku pilku teko, ungu-mane tondoloma naa pilku telemele aku telemele mele ungu-iko topo niembo:˼ Langi nongendo méle kanga lopalo molo lomou langine pelemo kanokolie ‘Naa namili!’ ningu wendo liku ltelemele, nalo kongi-kao te langine pelemo kinie naa kanoko we liku toko penge mundulimele.v
25 “Eno ungu-manemanga pulume pilku mane silimele yema kinie Parisi-yema kinie, eno mindili nongo paa molko kenjinge!
Eno topele-mapele toli yema! Pellete-kápomanga ulsukundu kulumiye toko kondolemele nalo akumenga sukundu langi pelemoma enone tondolo-munduku wa liku, enone enono waka kolko enono konopu kimbú-siku limele ulume.w
26 Eno mongo keri lieli Parisi-yema! Pellete-kápomanga sukundu kulumiye tonge kinie ulsukundu kepe kake temba.
27 “Eno ungu-manemanga pulume pilku mane silimele yema kinie Parisi-yema kinie, eno mindili nongo paa molko kenjinge!
Eno topele-mapele toli yema! ‘Yembo-ono-koleamo kanoko peanga kanangi!’ ningu pene kake telimu ape kandolemele mele eno aku-sílime mele molemele. Yembo-ono-koleama sike ulsukundu peanga lemo kanolemele nalo sukundu yembo kololimenga ombelema kinie méle puroli nurupulume kinie peke lepa pelemo.
28 Eno aku-siku mele molemele. Yembomane enonga kalkundu kanokolie ‘Eno ye sumbi-nílime’ konopu lemele nalo enonga konopune sukundu kolo toli ulume kinie ulu-pulu-kerime kinie mindi si nimbe pelemo.
29 “Eno ungu-manemanga pulume pilku mane silimele yema kinie Parisi-yema kinie eno mindili nongo paa molko kenjinge!
Eno topele-mapele toli yema! Pulu Yemone ungu-umbu tondolemoma pilku yando ningu silime kolemele kinie enonga óno telemele koleama teko mimi teko, sumbi-nili yembomanga óno-koleama a silimele.
30 Aku tekolie enone ningendo: “Olio olionga anda-kolepalime-kinie molemelanje enone Pulu Yemone ungu-umbu tondorumume pilku yemboma ningu siringi yemax toko kondoringi kinie olionga anda-kolepali naa lipu tapondopo eno naa tolemela.” nilimele.
31 Aku nilimelemonga ‘Kanu yema toko kondoringi yembomane kalko lsingi yema molemolo.’ ningu enono liku ora silimele.
32 Aku liemo kapola enonga anda-kolepalimene pulu polko teko kenjeringi mele enone kamu teangi!
33 “˻Yemboma nongo kondoli˼ kongi-ka wambiyema! Eno kolo topa yemboma tepa kenjeli wambiyemonga waloma!y Pulu Yemone enondo “Teko kenjeringimunge tepe-koleana paa!” nimbé kinie eno manda kowa punge aulke te lembaye?
34 Akumunge nane Pulu Yemone ungu-umbu tondombama pilku yemboma ningu singe yema kinie, pilipe konginjeli pemba yema kinie, mane singe yema kinie, eno molemelena lipu mundukuru. Aku yemanga mare toko kondoko, mare ‘Kolangi!’ ningu unjo-perana uku toko panjiku, mare eno máku toko Pulu Yemonga ungumu pilieli ulkemanga mengo puku ka-pulsene toko, koleamanga ‘tamili!’ ningu pulú siku akiliku lombili punge.
35 Aku tengemonga ou-pulu-pulu ˻Pulu Yemone mulú-maselo terimu kinie˼ kepe yandopa kinié kepe yembo sumbi-nílime toko kondoringimunge ulu-umbunema eno ˻Juda-yembomanga ye-awilime˼-kinie pemba. ˻Pulu Yemonga bokune˼ ou-pulu-pulu sumbi-nili ye Epele kinie, yandopa moloringi yembo sumbi-nílime kinie, yandopa ˻Pulu Yemonga bokumu pora nilimo akune˼ Berekia-malo Sekaraya kinie toko kondoringi akumenga paliz ulu-umbunema eno-kinie pemba. Sekaraya akumu Pulu Yemonga ulke-suluminia lierimu ulkemo kinie Pulu Yemo popo toko mélema kaloringi polomo kinie awi-suku-singine toringi kanumu.
36 Nane paa sike enondo nikiru: “Ou teko kenjeringi ulumenga pali ulu-umbunema i yembo kinié molkomelema-kinie pemba.” nikiru.” ˻nirimu.˼
Jerusalleme-Yemboma Toko Kalonge Pilipelie Yesusini Eno Kondo Kolorumu Temanemoa
37 ˻Aku nimbelie Yesusini Jerusalleme moloringi yemboma yu kondo kolopa akumundu ungu te nimbelie nimbendo:˼
“O Jerusalleme˻-yemboma˼, Jerusalleme˻-yemboma˼, Pulu Yemone ungu-umbu tondorumume pilku yemboma ningu siringi yema toko kondoko, yuni yemboma ‘liku tapondangi!’ nimbe eno moloringine lipe mundorumu yema kouni toko kondoko telemele yemboma, kera-gulta anumumuni yunge waloma lipe yunge kongomone aki topa nokolemo mele nane wale awisili eno aku-sipu nokolka nalo enono “Mólo!” niringi.
38 Akumunge pilieme! ˻Opa-puluema eno tonge onge kinie Pulu Yemone altopa eno naa nokopa naa lipe tapondombamonga˼ opa-puluemane ongo sike toko munduku enonga koleamo kinie enonga ulke-tembelemo kinie kamu toko kalongemonga eno ku penge.
39 Akumunge nane eno ungu te pea nimbu sikiru:
“Eno Jerusalleme-yemboma, enone nando
“Pulu Ye Yawene lipe mundorumu-ne okomo yemo
imbi ola molopa, molopa kondopili!”b Konana 118:26
ninge walemonga na altoko kanonge. Ou mólo!” nikiru.” nirimu.