2 Yesusini topondopa nimbendo: “Ipupene ena pumbendo mulúmu kondoli telemo kinie kanokolie ‘wale peangamo wendo ombá lémo.’ nilimele.

3 Ipulueli-ou kolea tangombando kolea kupe topa mulúmu sumbulu tolemo kinie kanokolie^f ‘Lo ombá lémo.’ ningu pilimele kanumu. Mulúmu kanokolie ‘koleamo i-sipe i-sipe temba.’ ningu kanolemele nalo i walemanga ulume wendo olemoma kanokolie ulumenga pulumu manda naa pilimele.

4 Kinié mana molemele yemboma yembo kerime mindi molemele. Eno teko kenjiku Pulu Yemo siye kolko, méle lupama konopu mondolemele kanu yembomane “Pulu Yemone mindi ulu-tondoloma manda telemo mele kanamili tei!” ningu na mawa telemele. Nalo ˻Pulu Yemone na lipe mundorumu-ne ya ombo molkoro. Yu-kinie tapu topo kongono telembolo mele˼ lipe ora simbe ulu-tondolo te wendo naa ombá. ˻Pulu Yemone ungu-umbu tondorumume pilipe yemboma nimbe sirimu ye˼ Jonane terimu^g ulumuni mindi lipe ora silimo mele manda kanonge. Te pea wendo naa ombá.” nimbelie eno mundupe siye kolopa purumu.

5 Eno ˻Nomú-Gallilli˼ nekendo pungendo ˻Yesusi˼ lombili andoli yema pillawa-kaloli komu sindiku naa mengo puringi.

6 ˻Kanu-kinie˼ Yesusini enondo ˻liepi-liepi topa ungu-iko topalie˼ nimbendo: “Paa mimi-siku kanaa! Parisi-yema kinie Sadusi-yema kinieⁱ enone pillawa-akoli mméle yísi nosilimelemo kanoko kondaa!” nirimu.^j

7 Aku-sipe nirimu kinie pilkulie yu lombili andoli yemane enono kere-pale ningulie ningendo: “Olio pillawa-kaloli ˻nomolo˼ mare naa lipu membo omulumunge aku-sipe nikimunje.” niringi.

8 Aku-siku niringi mele pilipelie Yesusini enondo nimbendo: “Eno ‘nane manda lipe tapondomba.’ ningu wallo-kolte mindi pilimele yema, “Pillawa-kaloli naa memulu.” ningu nambemune kere-pale nikimiliye?

9 Kinié kepe eno naa pilku kondolemeleye? Pillawa-kaloli kise-pakera ye pape-tausini moke teko siringi mele komu sindilimeleye? ˻Nongo pora siringi kinie˼ langi kakena lierimume liku wale-basikete awisili toko peko siringi mele komu sindiku naa pilkimiliye?^k

10 “Molo pillawa-kaloli yepoko-pakera moke teko ye po-tausini siringi mele naa pilku, ˻nongo pora siringi kinie˼ wale-basikete awili mare langi kakena lierimume toko peko siringi mele naa pilku molemeleye?

11 ‘Yuni sike pillawa-kalolimundu naa nikimu.’ ningu nambemune naa piliengiye?^l ‘Parisi-yema kinie Sadusi yema kinie pillawa-akoli méle yisi nosilimelemo mimi-siku kanangi!’ nimbu nikiru.” nirimu.

12 Yuni aku nirimu kinie pilkulie enone ‘pillawa kalongendo yísi mundulimele akumundu naa nikimu. Parisi-yema kinie Sadusi-yema kinie enone ungu-mane siringi ungumendo nikimu.’ ningu pilieringi. ˻‘Parisi-yema kinie Sadusi-yema kinie enone ungu-mane mare kolo toko siringime yunge lombili andolimene paa naa piliengi!’ nimbe nirimu mele ningu pilieringi.˼^m

13 Yesusi kolea-awili Sisaria-Pillipai lierimu koleana pupelie nirimumuni, yu lombili andolimendo walsipelie nimbendo: “Manie Omba Mana-Ye A Lierimu Yemondo yembomane yu imbi leko nawe nilimeleye?” nirimu.

14 Enone yundu ningendo: “Marene “Nu No-Lindeli Jono ˻kolorumu, kinié kelepa lomboropa ola molemo˼.” nilimele; marene “Nu ˻Pulu Yemone ou konde molopili olando lsimu ye˼ Illainja^o kelepa omba molemo.” nilimele; marene nu “Jeremaya^p molo Pulu Yemone ungu-umbu tondorumume pilipe yemboma nimbe sirimu ye ˻ou kolorumu kinié lomboropa ola molemo˼ te-lupe.” nilimele.” niringi.

15 Aku niringi pilipelie Yesusini enondo nimbendo: “˻We-yembomane aku-siku nilimele˼ nalo eno-enono na nawe nilimeleye?” nirimu.

16 Saimono Pitane topondopa nimbendo: “Nu Konde Molopa Mindi Puli Pulu Yemonga Malo,^q ˻Pulu Yemone ‘Olio nokopa kondomba ye te lipu mundumbo.’ ou nimbe mako torumu ye-nomi˼ Kirasimu.”^r nirimu.

17 Yuni aku nirimu pilipelie Yesusini yundu nimbendo: “Jona Malo Saimono,^s nu malo. Nu Pulu Yemone “Konopu peanga pepili molko kondangi!” nilimo aulkena moleno.^t I nikinumu mana yembo tene nu naa nimbe simu. Tata mulú-koleana molemomone nimbe simu.

18 Ungu te pea nundu nikirula: Nunge imbi Pita, (kanu imbimunge ungu-pulumu ‘kou-mulú’ kanumu). Kanu kou-mulúmunge ola^u nanga yembo talapemo^v lipu máku topo mondombo. Kanu-kinie kololi ulu-pulumunge tondolomone i nanga talapemo topa manie manda naa mundumbe, mólo!

19 Pulu Yemo ye-nomi-kingi molopa yemboma nokomba ulke-kimu nu simbo.^w Kanu-kinie nuni mana méltendo “Mólo!” nini mélemo mulú-koleana sukundu “Mólo!” nimbéla. Nu mana-méltendo “Kapola.” nini mélemo mulú-koleana sukundu “Kapola.” nimbéla.” nirimu.^x

20 Kanu-kinie yu lombili andolimene Yesusindu “Pulu Yemone “Eno nokopa kondomba yere lipu mundumbo.” ou nimbe mako torumu ye-nomi Kirasimu nu ongo moleno.” niringi kanu ungumundu yuni enondo tondolo-mundupe nimbendo: “Enone anjo yembo telurindu kepe na kanu yemo molio mele ˻isili-ou˼ paa naa ningu siee!” nirimu.^y

21 Kanu-kinie Yesusi yu lombili andolimene yundu ˻“Pulu Yemone olio “Nokopa kondomba ye te lipu mundumbo.” ou nimbe mako torumu ye-nomi Kirasimu nu.” ningu, ningu para siringi kinie pilipelie˼ yuni yu-kinie wendo ombá mele pulu polopa^a eno sumbi-sipe nimbe sipelie nimbendo: “ ‘Na mindili awisili nombondo kolea-awili Jerusalleme paa pumbo.’ nimbu pilipu molio.^b Juda-yemboma nokolemele tapu-yema kinie, Pulu Yemo popo tondoli ye-awilime kinie, Pulu Yemonga ungu-manemanga pulume pilku mane silimele yema kinie,^c enone na paa toko mindili kondonge. Na toko kondonge kolombo kinie wale talo omba pumbe kinie yepoko-sipemonga Pulu Yemone nando ‘Lomboroko ola molou!’ nimbé.” nirimu.

22 ˻Aku nirimu kinie pilipelie˼ Pitane yu anjo lipe memba pupelie yu pulu polopa iri topalie nimbendo: “Awilimu, aku-siku paa naa ni! Nu nikinu mele aku-sipe paa wendo naa ombámo.” nirimu.

23 Nalo ˻yuni kurumenga nomi Setenene ungu-umbu tondorumu mele pilipelie nirimu kulu pilipelie˼ Yesusini topele topa Pitando nimbendo: “Setene,^d nu anjo pa! Pulu Yemone nando “Tei!” nirimu kongono tembo tekeromo pipi sini tekeno kene nu anjo pa! Nuni na teko embambo sini tekeno. Nu Pulu Yemone konopu lemo mele naa leno. Yembomane konopu lemele mele mindi leno.” nirimu.^e

24 Kanu-kinie Yesusini yu lombili andolimendo nimbendo: “Yembo tene ‘Yu lombili pambo!’ nimbelie yuni yunge konopumuni pilimo mélemanga ‘Topo manie mundembo!’ nimbe yemboma unjo-perana angilku mindili nongo kolemele mele yuni unjo-pera mele gomo lembando ‘Na yu lombili pumbondo mindili nondu liemo papula; kolondu liemo papula.’ nimbelie na lombili opili! We naa opili!^f

25 Yembo tene yunge mana konde molopa naa kololi ulu-pulumu ambolomba temba kinie yu kolopalie sike molopa kenjipe mindi pumbe. Nalo yembo tene na konopu mondopalie nanga kongonomo “Tendambo!” nimbe temba kinie yu kolopalie yu konde molopa kondopa mindi puli ulu-pulumu sike kanopa limbe.^g

26 ˻Akumu nambemune nikiruye?˼ Yembo tene mana-mélema pali yu-yuyu lipe nosipelie yu mini-pali Pulu Yemo naa molomba koleana pupe mindili nomba molopa kenjilkenje kanu mélemane kanu yembomo nambepa lipe tapondolkanje? Lipe naa tapondolkamo. Molo yembo tene ‘Na mini-pali konde molopo kondopo mindi pambo!’ nimbelie yu nambolka méltene mini-pali konde molopa kondopa mindi puli ulu-pulumu topo topa lilkeye? Méltene manda topo topa naa limbe.^h

27 “Manie Omba Mana-Ye A Lierimu Yemo pe Lapanga tondolo pa telimu-kinieⁱ yunge ˻mulú-koleana˼ angelloma-kinie pea ombá. Ombalie yuni olio ya mana-yemboma yu-mele-mele telemolo ulumenga olio yu-mele-mele pundu tombamonga nane aku nikiru.

28 “Nane enondo paa sike nimbu sikirumu: “Eno ya angilkimilimenga mare ou kolou naa kolangi Manie Omba Mana-Ye A Lierimu Yemo ye-nomi-kingimu omba molopa mélema kinie yemboma kinie pali nokomba^j ombá kanonge.” nikiru.” nirimu.^k