Va-upehe ria maa tavaan tea paku bono matapaku mataa
3
Taitus,
va-upehe bata ri nom amaa tavaan voen,
eori toro vaagunaha bara baitono sue bata kiri rori bona tau vamee va tea gavaman ae va tea maa vaan teori.
Ean mee toro va-upehe riori,
eori re matatopo batari tea paku bona maa taba matamataa kiri bono meho aba.
2 Eori toro goe tea moroko vahatahata ribono meho aba bara toro goe tea vaopaopasu.
Evehee eori toro vasisio ribono meho aba bara vataaree ribari bono matapaku va tea vaagunaha mamana kiri bona kavara na aba.
3 Tea tabae eara mee o babaaruu ae o vaavahahaon roho.
Amaa abana mee na meemee vahoara roho araara kaakoo teo piku.
Meara saka paa ante haa ma roho tea vihau tea paku a maamihu matapaku hata vai to manimanini bara to magemagee ma roho ara tea paku.
A tootoo teara na hapuhapusu ni ma roho bona maa matapaku vai amaa hata kurusu ae puuhio.
Meara paa varereasi ma roho.
4 Evehee Hunavaan a Too Vatagae teara na vataaree araara bono matapaku mataa bara uruuru teve,
5 eove he vatagae araara.
Saka ei haana eara na paku ta taba ta mataa.
Ahiki!
Evehee suku koa bono koma uru teve.
Eove na garuhu bona maa matapaku vahata teara,
mepaa vaavahuhu va voon bona taun raara bara na hee araara bona tootoo a voon kaakoo tea kiu tea Taun Penapena.
6 E Hunavaan na vaahapusu va-oha bona taun raara bona Taun Penapena kaakoo tea kiu te Jisu Karisito a Too Vatagae teara.
7 Eove na paku vo teebona,
eara re aba totobin matanae kaakoo teo koma uruuru teve.
Eara mee re tavusu baiko teve bara eara re gono a tootoo vaneovoi vai to matamatana bata nao raara.
8 Amaa moroko vai to paa kare kino nasuu naa,
amaa omana.
Menaa na rake nom bean moroko vakikisi bata ni nom amaa taba bona,
amaa tavaan to paa vamanamana vaevuru bene Hunavaan re kehi batari tea paku bona maa matapaku mataa.
Amaa vaasusu vai amaa mataa,
bara na ante nana tea haihai bona kavara na aba.
9 Evehee a meha papana na vaasue vababaaruu rori,
bara na moroko suku rori bona maa vahutate na maa henaria ba suburiori va nabunuu.
Eori mee na rake rori tea vaopaopasu,
ae tea vaasue suku bona maa lo vai to hee roho e Hunavaan bene Moses.
Evehee ean toro goe tea kao hovo tea maa kaku moroko bona,
tea tabae amaa taba to paku riori amaa taba pinopino,
saka ante haana tea haihai ta aba.
10 Be ta aba paku nana to matapaku vai to vaatavusu nana bona takitakiri varirovana ria maa tavaan to vamanamana rori,
ean repaa moroko vakikisi kie,
eove re vihau tea paku bono matapaku bona.
Moroko kii bono peho ge o buaku o vuri,
evehee beve saka baitono vakisi haa unoman,
ean repaa hee murina eve.
11 Ean kou paa nata vo voen,
o vakokona tea aba bona saka totobin haana.
Meo matapaku vahata teve to pasi ma rare komana nom bona.
O moroko vagegeana te Pol vo te Taitus
12 Enaa pasi vaanao nasu nom e Atemas ge e Tikikus tea paupau vuan.
Beve suguna en rau,
ean repaa kehi ma tea nomaa tenaa,
benaa tei nom Nikopolis,
tea tabae enaa na rake nom tea tei teebona teo vuri tovuhu.
13 Ean toro kehi tea haihai e Apolos bo Zenas,
a otei vai to nata vanenesi ni nana bona lo.
Haihai rii beori nao tea vaavihi,
eori re hiki ta taba toro harusu niori.
14 Ean mee toro vaasusu vakisi bata ri nom amaa tavaan teara tea kehi tea paku bono matapaku mataa va tea haihai ribene eori to harusu rori;
amaa tavaan to vamanamana rori re goe tea popo pinopino.
15 A kavara na aba to pate tei me kanom anaa na hee ni nasu rori bona uruuru teori vo tean.
Ean mee toro hee nia uruuru tenam tea maa tavaan to vamanamana rori – ei to uruuru ni kanom anam.
O koma uruuru te Hunavaan na pate tei me kanom ameam.