E Jisu na vaavoosu ori Jerusalem
Mt 21:1-11; Lk 19:28-40; Jn 12:12-19
11
E Jisu bara o disaepol teve he vahusu bata nao bona Jerusalem,
meori paa no suguna tea bua taon va Betpeis ae Betania tea Voora va Oliv.
Me Jisu paa vaanao momohu ri nao bona bua disaepol teve,
Maaka 11:1-14
2 mepaa sue kiri bari,
“Nao vo tea vaan vaoi.
Beam no hovo,
eam repaa no pahin tara koa a donkii vai a visoasi to tanatana ni roho ori.
Saka bin hae vakisi ta aba.
Rigaha o kara kanono,
eam repaa mee mae.
3 Be ta aba hivi ameam,
‘Sovee meam rigaha nom a donkii?’
eam repaa sue kie,
‘Na rake maana e Sunano.
Pasi vaanomaa vahaa vue.’”
4 Rerau,
meori paa nao,
meori paa no vuriha bona donkii hanana.
Na tanatana nana matano matavusu na inu.
Meori rigaha rori bari,
5 a tavaan vai to sun vai roho rori he hivi ribari,
“A tabae to paku nomeam?
Sovee meam rigaha nom a donkii varau?”
6 Meori paa vaataena meri bari voen to sue vo nao e Jisu.
Rerau,
meori paa vaamanaata kiri bari bona donkii.
7 Meori paa mee nao bona donkii vo te Jisu,
meori paa no bana ni bona maa maro teori toon na donkii,
me Jisu paa hae teebona.
8 A tavaan o bero to bana bata ni nao bona maa maro teori hanana.
A meha papana he na vaobete momohu bata nao bona maa pea naono to mosi ori rasuu.b
9 A tavaan to momohu bata nao bara to vamurina bata nao na kavara koara vabeera bata naori,
“Hosana!c
Hunavaan,
vaovoi a aba vai to nomaa batana tea henane Sunano!d
10 Vaovoi a vuaba vai to nomaa batana,
a vuaba te suburaara e Devita!
A ta teo suviri mee na vamatamataa rori bene Hunavaan!”
11 Rerau,
me Jisu paa no suguna Jerusalem,
mepaa hovo inu penapena,e
mepaa tara binubinu vo tea maamihu taba.
Evehee suku bona paa tauravi sanau,
meve paa vaakaku vahaa vo Betani meri bona peha saavun buaku (12) a disaepol teve.
E Jisu na kaesi hata ni bono naono piig
Mt 21:18-19; Lk 13:6-9
12 Teo meho boni,
eori he kaokahi batari bona Betani,
me Jisu paa behu.
13 Mepaa tara vananaoana ni nao bono naono piig,
a bero paka.
Mepaa nao tea tara be vua nana.
Eove he no suguna teo naono,
mepaa tara vahiki to vua,
a paka koa,
ei kou saka o vuri tea naono piig haana tea vua.f
14 Me Jisu paa sue ki bono naono piig,
“Ahiki kurusu ta aba to pasi ma ani vaha nana to vua en tean!”
Meo disaepol teve paa baitono bono moroko bona.
E Jisu na gani tavusu ribona naba vaavoni kahi bona inu penapena
Mt 21:10-17; Lk 19:45-48; Jn 2:13-22
15 Ere Jisu he suguna nao Jerusalem,
meori paa nao tea veeveo va tea inu penapena,
me Jisu paa taneo tea gani tavusu ribono aba vai to voni bara to vavaavoni roho teebona.
Mepaa kae kokope ni bona maa teevoro tea naba vatapau mooniig bara maa hum hiihio tea naba vaavoni maoruu.h
Maaka 11:15-33
16 Me Jisu paa sue vakikisi kiri bona tavaan,
eori re vihau tea dee kaakoo me ma bona maa taba vaavoni teori inu penapena.
17 Meve paa vaasusu ribona tavaan,
mepaa boha voen,
“A koara te Hunavaan na takino vo naen,
‘A inu penapena tenaa pasi dao vori bona inu vaneanava to pasi nomaa vo nom a kavara na aba va teo munana.’i
Eam he paa verete potee ve ‘bona inu varavihi tea naba kavekaveru.’jk”
18 Mea tau vamee teo pris bara o siisia va tea lo paa baitono ni bona taba to paku e Jisu.
Meori paa naabu ni bari,
ei kou kavara no vaagum na vaasin ni bono vaasusu teve.
Rerau,
meori paa taneo tea rake ta hanana vai toro vaamate kaakoo meori bari.
19 Tea tauravi,
me Jisu bara o disaepol teve paa kaokahi bona Jerusalem.
O naono piig na mahaka
Mt 21:19-22; Mt 6:14-15
20 Tea nubunubu no meho boni,
eori he tea vaakaku vaha bata,
meori paa tara vaha nao bono naono piig.
Na mahaka taneo teo ana.
21 Me Piitaa paa upehe bono moroko to paku ki nao roho e Jisu bono naono piig.
Mepaa sue,
“Raabae!
Tara han!
O naono piig to kaesi hata ni nao roho an,
na mahaka.”
22 Me Jisu paa sue kiri bari,
“Vamanamana koa e Hunavaan.
23 Enaa na sue kanom ameam a omana,
be ta peha aba sue ki bona voora vai,
‘Takara,
ean re kuu vo tahii!’
orepaa tapaku ki bona.
Eove he toro vamanamana kurusu voen pasi tapaku nana,
beve goe tea vovoeaka tea vuhanae.
24 Menaa na sue kanom ameam,
a tabae to hino nomeam teo vaneanava,
vamanamana voen,
eam paa gono vaevuru a taba bona.
E Hunavaan repaa hee ameam bona.
25 Evehee beam gavagava ni nom ta peha aba,
beam vaneanava bata nom,
rudaha amaa hata teve.
E Tamaraara va teo suviri repaa rudaha bona maa hata team.”
26 lA tau vamee na vovoeaka ni bono atorotii te Jisu
Mt 21:23-27; Lk 20:1-8
27 Me Jisu bara o disaepol teve paa suguna vaha bana Jerusalem.
E Jisu he pita batana komana inu penapena,
mea tau vamee teo pris bara o siisia va tea lo ae a naba bebeera paa nao vo nao teve.
28 Meori paa hivi bari,
“Eteie to paa sue kiu vuan mean paku nom amaa taba vai?
Eteie to paa hee uvuan bono atorotii tea paku bona maa taba vai?”
29 Me Jisu paa sue,
“Enaa mee pasi hivi nom ameam o peho hivi.
Beam vaataena kamanaa o hivi bona,
enaa repaa sue kameam o atorotii te teie to paku bata nom naa amaa taba vai.
30 Sue kamanaa,
e Jon he baptais ri roho bona maa tavaan,
o atorotii teve na tavusu ma te Hunavaan va teo suviri ge teo aba?”
31 Meori paa vamoromoroko komana,
meori paa sue,
“Beara boha voen,
na tavusu ma teo suviri,
eve repaa hivi araara,
‘Me sovee meam goe rohoe tea vamanamana?’
32 Eara he pasi taagin boha koa vo raen,
‘Na tavusu ma teo aba’?”
(Eori na naabu ri rori bona tavaan,
suku bona maamihu aba na vamanamana vo rien e Jon a poropita mamana.)m
33 Rerau,
meori paa sue ki bene Jisu,
“Enam na toku nom.”
Me Jisu paa sue kiri bari,
“Bara.
Enaa mee saka ante haa nom tea sue kameam,
teo atorotii te teie to paku bata nom naa amaa taba vai.”