E Jisu na vatagae bona aba a hopo oraa
Mt 8:28-34; Lk 8:27-39
5
Me Jisu bara o disaepol teve paa vahogoro tea meha papa kopua teo hum vai to tei ria ta Gerasenes.a
Maaka 5:1-20
2 E Jisu he gunaha kahi koa bono bout,
mea a aba a hopo oraa paa tatana nao bona.
Na tavusu ma teo kasikasi.
3 A aba vai na popo nana sin teo avaava,
ei teo kasikasi.
Ahiki ta aba to ante nana tea kiikisi bona,
ei rova beori butara tea kisi bari bona sen.
4 Amaa bero amaa vuri to kisi riori bona bua kurinae ae a bua moonae bona sen,
eove he na rahi kurusu vakisi nana bona sen va kurinae ae tasu booboha vakisi nana bona sen va moonae.
A aba bona a kikisi kurusu,
me ahiki ta aba to ante nana tea ato ae vaahio vatomanini bona.
5 Tea maamihu roava ae boni,
eove na vataviri nana teo kasikasi ae tea maa voora,
beve oreorere batana bara mosi komana batana bona suini nae bono vasu vai o kakaniva.
6 Ere Jisu he gunaha kahi koa bono bout,
mea aba vai a hopo oraa paa tara vananaoana ni nao bene Jisu,
mepaa vakakao vo nao teve,
mepaa no suruvu moonae.
7-8 Me Jisu paa sue ki bona taun hata,
“Taun hata,
tavusu kahi a aba vaarau!”
Mea otei vai a hopo oraa paa koara vabeera,
“Jisu,
Baiko te Hunavaan a Vagigina Oha,
kaokahi anaa!
A tabae to rake noman tenaa?
Enaa na hino unoman tea henane Hunavaan,
ean re goe tea vaherehereke anaa.”
9 Me Jisu paa hivi bona,
“Eteie a henaman?”
Meve paa boha voen,
“A henanaa e Hovo-oraa,b
tea tabae enam o bero.”
10 Mepaa vavaahuu uku ki bene Jisu,
eove re goe tea vaakao tavusu ribari kahi bono hum bona.
11 O toogusu vaasun guu na suru vai roho rori ere-ere na peha voora.
12 Meo oraa paa uku vakikisi ki bene Jisu,
“Vaanao me kamanam teo guu,
vaamanaata ni kamanam,
enam re hopo teori.”
13 Me Jisu paa vaamanaata kiri bono taun hata,
meori paa tavusu kahi bona otei,
meori paa hopo teo guu.
O vaasun guu na ante rori bono 2,000,
meo guu paa vakakao gunaha ere-ere na voora,
meori paa abana vadovo komana kopua.
Meori paa matemate.
14 Mea naba kikira guu paa rosin,
meori paa nao vo tea taon bara tea meha maa hum,
meori paa no suesue kiri bona tavaan bona maa taba vai to tapaku.
Mea maa tavaan paa naonao tea tara bona taba to paa tapakuu.
15 Eori he nao vo nao te Jisu,
meori paa tara bona otei vai to hopo roho o oraa o bero,
eove he tea hio,
o vakokona teve o totobin,
bara na uvu vahaa ni bono hobohoboo.
Meori paa naabu.
16 Mea maa tavaan vai to tara bona taba to tapaku paa nao,
meori paa no suesue kiri bono meho aba bona taba to tapaku ki bona aba vai a hopo oraa bara o guu mee.
17 Meori paa uku ki bene Jisu,
eve re kaokahi bona rijin teori.
18 Me Jisu haehae nana teo bout,
a otei vai a hopo oraa roho he nao vo nao teve,
mepaa uku ki bene Jisu,
eove re pate nao me bona.
19 Evehee Jisu na vaakisi ki bona,
mepaa sue,
“Ahiki.
Ean toro voosu vahaa tea ba noasiman.
Ean re no sue vataaree ki riori bona kiu vai a beera to paku ki vuan e Sunano,
bara to paa koma uru vaevuru meki vuan ee.”
20 Mea otei paa nao,
mepaa no suesue kiri bona ta Dekapolis.c
Na no suesue ni bona kiu vai a beera to paku kie Jisu bona.
Mea maa tavaan paa vaasin kurusu.
A baiko moon vai a mate, ae a moon vai a oro revasin
Mt 9:18-26; Lk 8:41-56
21 Mere Jisu paa hae teo bout,
meori paa pahana vaha bana vo tea meha papa kopua.
Meo toogusu vaagum paa vatataonun taviri bana bari,
eove he tea tei rapana kopua.
Maaka 5:21-43
22 Mea peha too vamee va tea sinagog paa nao vo nao te Jisu.
A henanae e Jairus.
Eove he tara bene Jisu,
mepaa vatokono moonae,
23 mepaa uku viravira ki bene Jisu,
“A si baiko moon tenaa,
sihum koa eove re mate.
Nomaa ean re ma vaakopo a kuriman teve,
eove re tagae,
beve goe tea mate.”
24 Mere Jisu paa nao me bene Jairus,
meo aba o bero paa murina ribari,
eori he tea hoki bata bene Jisu.
25 A moon na tei vai roho nana teo vaagum bona,
a revasin nae na oro roho bono peho saavun buaku (12) o vinu.
26 A moon vai na porete a bero a aba,
bona maa kaku porete.
Eori he na vaakamikamisi vahoara bari.
Meve paa busu pinopino koa ni bona kavara na moonii teve tea voni ribari,
ahiki he beo kamisi kavara,
na beera vahoara.
27-28 Eove he baitono ni bono vaaree ne Jisu,
mepaa vakokona komana voen,
“Benaa ato koa o hobohoboo te Jisu,
enaa repaa tagae.”
Mepaa pita nao bona murinae,
tobina ria maa vaagum,
mepaa ato bono hobohoboo teve.
29 Eove he ato bono hobohoboo te Jisu,
mea revasin paa pahin ante koa tea oro.
Mepaa haraa bona suini nae eve he tagae teo kamisi vai o hata kurusu.
30 Me Jisu paa pahin kona koa voen o kikisi paa tavusu kahiu bona.
Mepaa tabin binubinu vo teo vaagum,
mepaa hivi,
“Eteie to paa atou bono hobohoboo tenaa?”
31 Meo disaepol teve paa sue ki bari,
“Ean na tara nom o aba o bero to vahokihoki bata ni kiu noman,
ean he tea hivi,
‘Eteie to paa ato avanaa?’”
32 Evehee Jisu na tara binubinu vakisi,
eove he tea tara rakerake bene teie to paa atou bona.
33 A moon he kona voen a taba paa tapaku kiu bona,
mepaa no vatokono moone Jisu,
eove he tea totororoo bata teo naabu,d
mepaa vahutate ki bene Jisu bona omana na maamihu taba to tapaku ki bona.
34 Me Jisu paa sue ki bona,
“Sahata tenaa!
O koma vamanamana tean paa vatagaeu vuan.
Bara,
nao.
A murun pasi tei me kiu vuan.
O kamisi vai to vavaasiitore roho vuan paa kavarau.”
35 Me Jisu moroko vakisi nana,
o meho aba he nao vo nao teve.
Eori paa tavusu taneo mau inu te Jairus.
Meori paa no boha voen,
“A baiko moon tean paa mateu,
goe tea vapepeana e Siisia.”
36 E Jisu na baitono rova ribari,
evehee na sue ki bene Jairus,
“Vaarutaa a vuhaman,
goe tea naabu,
vamanamana koa.”
37 E Jisu na vaamanaata koa kiri bene ere Piitaa,
Jemis ae Jon e keara te Jemis tea nao me bona.
38 Eori he no suguna inu te Jairus,
me Jisu paa tara bono aba o bero eori he tea beeben ae oga vabeera.
39 Me Jisu paa hovo,
mepaa sue kiri bari,
“Eam toro goe tea beeben!
A baiko saka mate haana,
na goroho koana.”
40 Meori paa haesi ni bari,
evehee Jisu na vaatavusu ribona tavaan,
mepaa mee bene tamana ae sinana baiko moon,
ae a kukan a disaepol teve vo teo hum to obete nana a baiko.
41 Me Jisu paa ato bona kurinae,
mepaa sue ki bona,
“Talita koum!”e
(to kao vo naen,
“Koveu,
sun hiava!”)
42 Mea koveu paa pahin sun hiava koa,
mepaa pita binubinu,
meori paa vaasin viravira kurusu.
(A koveu vai o peho saavun buaku (12) o vinu roho.)
43 Me Jisu paa sibusibuhu ribari,
eori re goe tea sue vataaree ni bona taba to paa tapakuu.
Mepaa sue kiri bari,
eori re hee bona baiko ta taba-ani.