O vaaviararaa na too neba vua
Mt 13:1-9; Lk 8:4-8
4
Me Jisu paa taneo bana tea vaasusu ribari rapana kopua va Galilii.
O vaagum o beera sana to taviri bana bari,
mepaa hae teo bout to agaa vai roho nana rapana kasuana,
mepaa hio teebona,
a kavara na aba he tea tei bata kasuana.
Maaka 4:1-20
2 Me Jisu paa vaasusu ribari bona maa taba amaa bero kurusu teo vaaviararaa,
mepaa boha voen,
3 “Baitono ham!
A too neba na nao tea neba bona maa vua teve.
4 Eove he hapuru bata ni nana bona maa vua,
mea meha maa vua paa kuu vo hanana,
meo naovana paa nomaa,
meori paa ma ani vakavara bari.
5 A meha maa vua he na kuu vo teo hum vasuvasuana,
to saka bero haa no kasuana vai o mataa.
Meori paa saku koa tea pura hiava,
ei kou o kasuana saka ruruvuna vira haana.
6 A roava he takae hiava ma,
mepaa para vamarabi ribari.
Meori paa mahaka,
ei kou a ana saka kao gunaha vira haa teo kasuana.
7 Amaa meha maa vua na kuu vo tea subui vai a toutou.
Mea subui vai a toutou paa pura tataono ribari,
meori paa matemate.
Meori saka paa vavuvua haa.
8 Evehee a meha maa vua na kuu vo teo kasuana vai o mataa,
meori paa sigooru,
ae pura hiava,
meori paa vavuvua vaberobero kurusu.
Amaa meha na vaatavusu bono kukan saavun (30) o vua,
amaa meha he o peho totoka saavun (60) o vua,
amaa meha he na vaatavusu bono 100 o vua.”
9 Me Jisu paa sue,
“Eteie to tei me nana bono tainana toro baitono vanenesi.”
O vaamamana no vaaviararaa
Mt 13:10-23; Lk 8:9-15
10 E Jisu he tea tei papahiana meri bono peho saavun buaku (12) disaepol teve ae a meha papana,
meori paa hino bari,
eove re vaamamana kiri bari bono vaaviararaa.
11 Mepaa sue kiri bari,
“Amaa taba varavihi va tea vuaba te Hunavaan paa tahee kavameam.
Evehee teori to saka vamanamana haa nom anaa,
na vaasusu tamuana ri nom naa teo vaaviararaa.
12 A pusunae eiei:
‘Na tara rori,
eori he saka tara inana haari,
na baitono tamuana rori bona maa koara,
eori he saka kona mamana haa ni rori bari.
Ei kou eori to mene tabin vo ma tenaa,
amaa hata teori repaa tarudaha.ab’”
13 Me Jisu paa sue kiri bari,
“Beam saka paa kona haa ni veo vaaviararaa vai,
eam pasi taagin kona koa ni ve amaa meha?
14 A too neba na potee nana bona aba to hapuru ni nana bona koara te Hunavaan.
15 O meho aba to baitono rori bona koara na potee rori bona vua to kuu vo nana hanana.
Beori baitono bona koara,
e Setan repaa pahin nomaa koa,
eove repaa gono kahi vahaa ribari bona koara vai to paa taneba vaevuru vuhariori.
16 O meho aba na potee rori bona vua to kuu vo nana teo hum vasuvasuana.
Eori he baitono bona koara,
meori paa manaata vakahu koa bari,
eori he tea moramora kurusu bata.
17 Evehee suku bona koara saka va-ana-ana vakikisi haa tea vuhariori,
meori saka paa tei vabebeahu haa.
Eori he vatatana me bona maa ponisi ae siitore suku bene eori na vamanamana bona koara,
meori paa saku koa tea kuu kahi bono vamanamana teori.
18 O meho aba na potee rori bona vua vai to kuu vo tea subui vai a toutou.
Eori na baitono bona koara te Hunavaan,
19 evehee amaa upeupehe na tootoo va teo munana,
ae amaa manimanin va tea gono bona bero a taba,
ae amaa manimanin na meha maa taba na hovo ma,
meori paa asun vamate bona koara.
Mea koara saka paa vavuvua haa tea tootoo teori.
20 O meho aba he na potee rori bona vua vai to kuu vo teo kasuana vai o mataa,
na baitono bona koara,
meori paa manaata bari.
Mea koara paa vavuvua tea vuhariori potee bono vua to vaatavusu bono kukan saavun (30) o vua,
amaa meha he peho totoka saavun (60) o vua,
amaa meha he na vaatavusu bono 100 o vua.”
O koma vamanamana tean toro vataaree tavusu nian
Mt 5:15; 7:2; Lk 6:38; 8:16-18; 11:33
21 Me Jisu paa sue,
“Beam dee ma o raama,
eam na vaakopo taono nom ee bona baoro,
ge na vaatei nomeam paana teebana?
Ahiki!
Na vaahana nomeam teo hum hanahana teo raama.
Maaka 4:21-41
22 Na vaapeha nana,
a maamihu taba to varavihi nana pasi vataaree vakisi niu,
amaa taba to saka kona haa ni nana a meha aba,
pasi tavusu vakisiu tea mamana.c
23 Eteie to tei me nana bono tainana toro baitono vanenesi.”
24 Mepaa sue pete kiri bari,
“Vaupeupehe vanenesi nia maa koara to baitono nomeam.
To hee va-ante vo nomeam to pasi gono vo vuam,
bara eam repaa gono va-oha mee.d
25 Teori to baitono bara mamana ni rori bona maa vaasusu tenaa,
o konakona vai o beera pasi tahee kiriu bari.
Evehee teori to goe rori tea baitono bara mamana ni bona maa vaasusu tenaa,
o sihum kona to tei me riori,
pasi gono kahi ri ve Hunavaan bari.”
O vaaviararaa no vua to pura komana nana
26 Me Jisu paa sue pete,
“Eiei to paku vo nana a vuaba te Hunavaan:
A aba na neba ni nana bono vua teo kasuana.
27 A maamihu boni ae roava,
be goroho ge tagune,
o vua paa sigooruu,
mepaa pura hiava,
evehee a otei na toku nana havee to pura vaavaha voe.
28 O kasuana komana to vaapura nana bono vua,
orepaa vavuvua.
Momohu na sigooru nana,
orepaa pura hiava,
o kapa to moomono nana bono vua repaa tavusu,
o vua repaa tavusu komano kapa to moomono nana bona.
29 Evehee beo vua manoto,
eove repaa mosi bona bono rapisi,
ei kou o vuri kabuu paa sugunau.”
O vaaviararaa no vua mastat
Mt 13:31-32; Lk 13:18-19
30 Me Jisu paa sue vaha bana,
“A vuaba te Hunavaan na potee nana bona tabae?
O vaaviararaa tabae to ante ni nom nae tea vavaa-ante?
31 A vuaba te Hunavaan na potee nana bona tabae to tapaku ki nana bono si vua mastat.
Eve o si rutaa vua kurusu to neba ni nomeam teo kasuana,
32 evehee beam neba nie,
orepaa pura hiava oha bona meha maa naono va komana mohina.
Orepaa vapepeana vabeera,
o naovana repaa vigu hai bara vahonoo teebona.e”
33 Be Jisu vamora kiri bona maa tavaan,
na paku nana bona maa vaaviararaa vai amaa vaapeha to ante ni riori tea mamana.
34 Na paku tamuana batana bona maa vaaviararaa beve vaasusu bata ri na bari.
Evehee be tei papahiana meri bono disaepol teve,
eove repaa vaamamana vahaa kiri bari bona maamihu taba.
E Jisu na vaamaaraa bona toohata
Mt 8:18, 23-27; Lk 8:22-25
35 Tea vamanemanee no boni bona,
me Jisu paa sue kiri bono disaepol teve,
“Nigara are vapahana vo tea meha papa kopua.”
36 Meori paa kaokahi bono vaagum,
meori paa hae teo bout vai to hae vai roho nae Jisu.
Mea meha maa bout paa pate nao meri bari.
37 Mea toohata a beera bara kikisi sana paa takae ma,
meo poha paa taneo tea takaku hovo vo ma teo bout,
me sihum koa o bout re hapusu tea ruene.
38 Evehee Jisu na goroho bata nao itao,
eove he tea enasunf bata teo piroo.
Meo disaepol paa no gunegune bari,
meori paa boha voen,
“Siisia!
Ean saka upehe haa nom anam?
Sihum koa eara re dovo.”
39 Me Jisu paa sun,
mepaa koara vakikisi ki bona iravata,
mepaa sue ki bono poha,
“Vaaroomii!
Tomanini!”
Mea iravata paa maaraa,
meve tomanini kurusu vahaa.