Allincäta jalutacü nuna śhalcamunancäpïtam limapan
2
Cananñatacmi chalapacü-masïcuna,
willaycälishayqui Jesusninchic cutimuptin paywan lluypis juntunacunanchicpi.
2 Ama pinsamintucuyalcaychu “Chay muyunca ćhämunñam” nil willacuycunapapis,
cartapapis ütac quiquin Pablopapis nïcunällawanꞌa.
3 Ama-ari imawanpis mayanwanpis ingañachicuyalcaychu.
Caycunalämi puntacta pasanꞌa:
jinantin pachäćhümi Diospa cuntran ćhïnicüninca śhalcapäcunꞌa “Ampïta manañam yaćhaytapis munäñachu” nil.
Chaycunapïtam śhalcamunꞌa allincäta jalutacü nunaca,
chay camacäśha cananpä unanchäśha nunaca.
4 Paymi Diospa cuntran śhalcul “Yaꞌa puydïcällactam alawapämanqui” nil imacunacta alawätapis payllaman cutichinꞌa.
Quiquin Diospa chuya wasintapis duyñuchacuyculmi “Yaꞌam quiquin Dios cayá” nil mandaćhacamunꞌa.
5 Amcunaćhu cayal ¿manachun caycunapi nipäculac?
6 Amcuna yaćhapäcunquimá chay juyu nuna manalä timpunćhu licalimunanpä ima atajaläśhantapis.
7 Masqui pacaläcäta manalä licaycuyaptinchicpis chay mana allin lulaynincuná muyuyanñamá.
Chay atajaläśhancäta julünallanñamari cayan.
8 Aśhüchiptin Diosta jalutacüca licalimuptinpis Jesus cutimulmi juc limayllawan wañüchinꞌa,
camacaycülunꞌa.
9 Cay jalutacüca quiquin Satanaśhpa sumä pudirninwanmi śhamunꞌa milagrucunacta lulaśhtin siñalcunawan quirichishtin imalä canpis.
10 Chay imaymana mana allin artinwanmi ingañayta jicutaycunꞌa,
Diospa cuyacuyninta salbaśha cananpä jalutacü wañuypä cä nunacunäta.
11 Chaymi chay ingañacuyninwan aysachicunanpä Diosninchic caćhaycunꞌa.
12 Chay mana allincällaćhu cushisha cawsapäcul rasuncäta mana ćhasquiculcäśhanpïtam lluy mućhuchisha capäcunꞌa.
Masïsu tacyaycäliy
13-14 Amcunactam ichá cuyaśhá chalapacü-masïcuna cay pacha manaläpis captin cuyacuyninwan aclaculcäśhulanquiña paywan wiña-wiñaypä cawsapäcunayquipä.
Caycunapïta,
yaꞌacuna ¿manachun Diosninchicta anradisicüman?
Diosninchicpi willapäcuptí paypa Ispiritunmi rasuncäman chalapaculcänayquipä yanapaycälishulanqui.
Jinalculmi canan imawanpis yanapayalcäśhunqui muyun-muyun masta paynu capäcunayquipä.
Caynu lulapäcuśhayquipañatacmi Jesusninchicpa bïdanwan partiycuśhanülla capäcunqui.
15 Chayurá chalapacü-masïcuna masïsu tacyaycälil ama unꞌapäcuychu cartap ütac shimïwan yaćhachipäcuśhäcunätapis.
16 Quiquin Salbacü Jesusninchicwan cuyamäninchic Tayta Diosmari llaquipayninpa śhunꞌunchicta wiña-wiñaypä acchiycachimälanchic.
17 Pay-ari ima lulayćhüpis limayćhüpis callpanchaycuśhunqui tacyaycälichishunqui.