Tesalonicaćhu Chalapacücunäman Pablo Ishcay Cartacuśhan
1
Yaꞌa Pablom,
Silvanowan,
Timoteowan apachicalcämuc cay cartacta amcuna Tesalonica malcaćhu Tayta Diosninchicman Jesusninchicman chalapacücunäpä.
2 Quiquin Tayta Diosninchicwan Duyñunchic Jesuspa llaquipayninpïta jawca cawsay amcunaćhu caycuchun.
Jesuspa cutimuyninćhümi juchayücunäta cäraycunꞌa
3 Chalapacü-masïcuna,
amcunapi Diosninchicta imaypis anradisiculcäman Jesusninchicman masta-mastalä chalapaculcäśhayquipïtam,
jinaman quiquiqui-pula cuyanacul masta-masta yanapänaculcäśhayquipïtam.
4 Cay lulapäcuśhayquicunapi yaꞌacuna mayta chayta lilpis chalapacü-masinchiccunaćhümi alawaculcá:
“Maynu sasachacuycunaćhu cayalcalpis,
maynütaña ñacachipäcuptinpis,
sumä masïsulämari chalapacuyalcanpis” nil.
5 Cay ñacapäcuśhayquipamari Diosninchic tantiaycachipäcuśhunqui allin tincüninman cäraycunan caśhanta.
Chaymi amcunactá “Yaꞌapa gubirnüćhu canayquipä mirisinquim” nil nipäcuśhunqui.
6 Cay ñacachishüniquicunactañatacmi lulaśhanman tincüta mućhuchinꞌa.
7 Amcunapis yaꞌacunapis ñacäcunätañatacmi ichá jawca cawsayta uycamäśhun.
Caynu pasanꞌa nina walayäcäwannuy llapa munayniyu anjilnincunawan Jesusninchic janay pachäpi cutimuptinmi.
8 Chayćhümari Diosninchicta mana lisïcunäta Jesusninchicpa allin willacuyninta mana cäsucücunätapis mućhuycachinꞌa.
9 Chaycuna Diosninchicpi calu-caluman alüśha canꞌa wiñay simpripä camacaycü ñacaycämanmi,
jinaman sumä allin cayninpïpis munayninpïpis japächäśham capäcunꞌa.
10 Amcunam ichá Jesusninchic cutimuptin:
“Maynu sumä-sumämá” nil japächäśhan nunancunawan cushisha alawapäcunqui.
Chayćhu capäcunqui paypi willaptí ćhasquiculcäśhayquipïtam.
11 Chaymi Diosninchicta ruygaculcá ayaycälishuśhayquimannuy sumä allin cawsayäta taliycälishunayquipä,
jinaman chalapacuyniquićhu lluy munapäcuśhayquita lulapäcuśhayquitapis lulaycuśha cananpä.
12 Cay lulapäcuśhayquipam Jesusninchic altuman juluycuśha canꞌa.
Paypis Tayta Diosninchicpa Jesusninchicpa llaquipayninman tincütam altuman julaycälishunqui.