Pablom mañacun allincäćhu tacyaycälinanpä
3
Canan amcuna yaꞌacunapi ruygaculcay mayman chaymanñapis Jesuspa willacuyninta malluchinäpä jinaman amcunaćhünüpis altuman juluycuśha cananpä.
2 Chaynütac mañaculcay chay juyu nunacunap maquinpi libraycälimänanpä;
manamá llapa nunachu allincäman chalapaculcan.
3 Jesusninchicmi ichá sumä allin chalapacuna.
Chaymi masïsucta tacyaycälichishunqui jinaman mana allincäpïpis licaycälishunqui.
4 Chaynütacmi yaćhachipäcuśhacnu lulayalcäśhayquita jinaman lulapäcunayquitapis siguracüśha cayalcá.
5 Taytanchicta mañacú Diosninchic cuyacuyninta śhunꞌuyquiman sumä juntaycachimunanpämi,
Jesusninchictanu imaćhüpis masïsu tacyaycälichishunayquipäpis.
Illacunätam anyapan
6 Ñatac,
chalapacü-masïcuna,
Jesusninchicpa pudirnin caynïwanmi niycälic:
chay mana lulacuyta munä illa chalapacücunäwan,
yaćhachishämannu mana cawsäcunäwan ama jucllachanaculcaychu.a
7 Amcuna tuquictam yaćhapäcunqui imanuy cawsaśhätapis,
atichipämänayquipä:
amcunaćhu manamá imaypis mana lulaculꞌa capäculächu,
8 manatacmi mayanniquipïpis imayquitapis dinbaldilla mañapaculcälacchu.
Aśhwanpam tutay-muyun maynu lulacul mantiniculcälá amcunacta mana piñachiynïwan.
9 Masqui Jesuspa willacuyninta willacuyalcalꞌa ćhasquipäcunämi rasunpa cala.
Ñatac amcuna licamal atichipämänayquipämi chay lulaytá uchucllapis pinsalcälilächu.
10 ¿Manachun amcunaćhu cayal:
“Mana lulacücunacá ama micuchunpischu” niyalcaclä canpis?
11 Ñatac ¿chaychun waquinniquicunapïta uyaliyá “Mana imallactapis lulaculmi nunap bïdallanpi yaćhaycaćhaśhtin pulicun” nïta?
12 Chaymi Jesusninchicpa pudirnin caynïwan amcuna niycälinayquipä nic:
“Chay mana lulacü nunacunaca patanpä lulaculcächun-ari” nil.
13 Amcunañatac,
chalapacü-masïcuna,
allincäta lulaycuypi ama pishipapäcuychu.
14 Cay cartanpa lluy nishäta mana cäsucü chalapacücunapïtá pinꞌaculcänanpä japächaculcay.
15 Ñatac ćhïnicuywanꞌa ama-ari licaychu aśhwanpa cuyacuywan aylluyquitanu anyapaycuy.
Camacalpunanpämi limaycun
16 Cananñatacmi jawcallaćhu cawsachï Taytanchic mayćhüpis imaypis jawcacta cawsachipäcuśhunqui.
Pay-ari amcunawan caycuchun.
17 Llapa lulamuynïćhu lulaśhä-yupaypis yaꞌa quiquïmi cay cartacta maquïwan firmaycul apayächimú.
18 Jesusninchicpa llaquipaynin-ari amcunawan caycuchun.
Chaynu cachun.