Diospa śhunꞌunpä imanuypa cawsaycuypis
12
Chayurá ama chaynu callaychu,
chalapacü-masïcuna:
Tayta Dios sumä llaquipayninta camalaycachimäśhanchicpïmi payman cawsayniquicunacta lluy uycälinayqui rigäluctanuy.
Jinal japächäśha chuyallaña paypa śhunꞌunpänuy cawsaycäliy.
Caynüpamá rasun allin alawaycuyca canꞌa.
2 Cay pachäpa munaynincunawan ama-ari aysachicuyalcaychu.
Sinuꞌa tantiayniqui muśhüman muyuchicuchun,
jinal śhunꞌuyquipis cawsayniquipis lluy allincällaman muyuchicunanpä.
Chaynüpam tantiapäcunqui Diosninchicpa śhunꞌunpänuy ima caśhanta,
ima allin caśhantapis,
ima rasun caśhantapis.
3 Dios llaquipayllanwan willacüninpa ćhulaycamäśhanpam llapallayquita niycälic:
Ama-ari maynu capäcuśhayquipïta mas-yupaytá licaculcaychu.
Aśhwanpa mana mastucullal Diosninchicman may-chicacta chalapacuśhayquimannuy licacaycäliy.
4 ¿Manachun aychallanchicćhu juc-juc imaymana lulayniyü-cama aychanchiccuna cayan?
5 Chaynümari masqui achca-achca cayalpis juc aychallaćhu jucllachäśha lluy cayanchic;
Salbacüninchicćhümari.
6 Chay llaquipayninćhümi imaymana lulayta munaśhanmannuy dinbaldilla uycamälanchic.
Chayurá Diospi willacunanpä caycücá,
chalapacuyninmannuy willacuchun.
7 Yanapänanpä lulayniyücá yanapächun.
Yaćhachinanpä caycücá yaćhachichun.
8 Callpanchananpä caycücá callpanchaycuchun.
Mana cäniyücunäta yanapaypä caycücá llapan śhunꞌunwantac uycuchun.
Caminaycunanpä caycücá llapan callpanwantac caminaycuchun.
Llaquipaycunanpä caycücá sumä cushicuywantac llaquipaycuchun.
¿Imanuypam nuna-masinchicwan allinpa cawsaycunchic?
9 Ñatac cuyacuyniqui śhunꞌuyquipïmi yalaycamunman,
manam janä śhunꞌullayquipïchu.
Chay mana allincäta ćhïnipäcuy;
allincätañatac atiycäliy.
10 Wawi-caśhanuy cuyanaculcay,
mas allinpa-camatac rispïtuwan licanaculcay.
11 Taytanchicta ama-ari illanäśha sirbiyalcaychu.
Aśhwanpa Chuya Ispiritu callpanchapäcuśhuśhayquimannuy sirbiycäliy.
12 Chaynütac alcaycapäcuśhayquićhüpis cushiculcay;
ñacaycunaćhüpis pasinsiayniqui caycuchun;
mañacuyta ama imayllapis unꞌapäcuychu.
13 Pishipacü chalapacü-masiquicunactapis yanapaycäliy.
Jamapacücunactapis jamaycälichiy.
14 Aticaćhaśhüniquicunactapis allin caycunanpä munaycäliy.
Allinninpäri niycäliy,
ama-ari mana allinninpá.
15 Cushisha cäcunäwanpis cushiculcay-ari;
waꞌacücunäwanpis waꞌaculcay-ari.
16 Lluywanpis allin jawcalla cawsaycäliy.
Ama-ari nunatuculcaychu,
aśhwanpa mana cäpa licaśha nunacunäwan caycäliy.
Quiquillayqui ama-ari yaćhätucuyaychu.
17 Mayantapis mana allincäwanꞌa ama cutiycayächiychu.
Aśhwanpa lluypis allinpa licaśhancunäta lulayta jicutaycäliy.
18 Maycamapis atipäśhayquicamari callpanchaculcay lluywan allin jawca cawsaycälinayquipä.
19 Cuyaśhá chalapacü-masïcuna,
ama-ari cutichicuyalcaychu.
Sinuꞌa Tayta Diospa maquinman caćhaycapäcuy.
Paypa shiminćhümi niyan:
“Yaꞌapam cutichicuycá;
yaꞌami tincüninman uycuśhä”a nil.
20 Chaynütacmi niyan:
“Ćhïnicüniqui micuypi cayaptinꞌa micuyta uycuy.
Yacupi cayaptinpis uycuy-ari.
Chaynu lulayculćhá pampäćhu cärantapis cachinqui”b nil.
21 Chayurá ama-ari mana allincäwan llallichicuyalcaychu.
Aśhwanpa allincäwan chay mana allincäta llalliycäliy.