Malcap puydïnincunactam cäsucunanchic
13
Ñatac nasyunpa puydï mandacücunäta lluymi cäsuculcänayqui.
Manamari nasyuncunaćhu juc mandacüllapis Tayta Diospa mana ćhulaycuśhanꞌa caycunchu.
Lluymi paypa ćhulaycuśhan cayalcan.
2 Chaymi mandacücäta mayanpis mana uyalicücá Tayta Dios unanchaycuśhanpa cuntran cayan.
Chaynu mana uyalicuyta munäcunacá cunca cuchuynintam ashicuyalcan.
3 Ñatac mandacücunaca allin luläcunäta manchachinanpächu manam cayan,
sinuꞌa mana allin luläcunätamá.
¿Mana manchacullal cawsaytachun munanqui?
Chayurá allinpa licaycuśhunayquipä allincäta lulaycuy.
4 Paycuna Tayta Dios ćhulaycuśhanćhümi sirbiyalcan allinniquipä.
Mana allincäta lulalmi ichá manchacunquiman.
Manamari yanꞌalchu ispädanta uywayan.
Tayta Diospa sirbïnin cayalmi mana allin luläcunäta mućhuycachin.
5 Chayurá mandacücunäta cäsucunayquim.
Manam mućhuycäta manchacuyllapïchu,
sinuꞌa allinca caśhanta tantiayniquiwanmi.
6 Chaynütacmi mandacücunaca Tayta Diospa munayninta lulayalcal,
chayllaćhüña lulaycälin.
Chaymi paycunaman alcabälacunacta pägaycälinayqui.
7 Uycäliy tincüninman-cama:
alcabäla captinꞌa alcabälacta;
impuistu captinꞌa impuistucta;
allinpa licaycuna captinꞌa allinpatac licaycuy;
altuman juluycuna captinꞌa altumantac juluycuy.
Nuna-masinchiccunaćhu allinpa cawsaycuy
8 Mayanwanpis ama-ari mänutacüśha cayalcaychu.
Aśhwanpa mänuyqui caycunman lluywanpis cuyanacunallayquim.
Chaynu nuna-masinta cuyalꞌa camachicuy lluy nishanta lulälunñam.
9 Ñatac camachicuyćhu:
“Ama mansibacuychu,
ama wañuchiychu,
ama suwacuychu,
ama munapaychu”b nishancunäwan lluy juccunaca,
chumacacun:a
“Quiquiquitanuy nuna-masiquita cuyacuywan licaycuy”c nishancällamanmi.
10 Cuyaycücá manam nuna-masinta mana allinta lulanmanchu.
Chayurá cuyäca lluy camachicuycätam cäsucuyan.
11 Lluy caycunacta lulaycäliy ima timpucunaćhu caśhanchictapis sumäta tantiaycul-ari.
Licaćhacunanchic ürañam,
canan salbacunanchic jiꞌacaycayämuptinꞌa.
Chalapacuy allaycuśhanchicpi cananꞌa caylläćhüñamari cacuyan.
12 Tutaca ñam pasacalpuyanña.
Muyunca jiꞌacaycayämunñam.
Chaymi tutapäcäćhu lulaycunätá juc-lädumanña caćhaycunanchic.
Aśhwanpam muyuncäćhu cawsayal cachacunuy pilyaycuśhun.
13 Muyunpa cawsaśhanchiccäman tincüta allinpa cawsaycuśhun.
Ama-ari chay anla millachicuy fistachacuycunaćhuꞌa,
shincacuycunaćhuꞌa,
mansibacuycunaćhuꞌa,
alli-cama fistallacta lulaycunaćhuꞌa,
nïtac ćhïninacuycunaćhüpis nï lägacuycunaćhüpis puliyalcaychu.
14 Amaña aychayquip munaynincunacta lulaypi wañupacuyalcaychu.
Aśhwanpa Jesusllanchicña jinantin lluy cawsayniquićhu caycuchun.