Caynüpam Israelcunäta Dios licaycunꞌa
11
Chayurá má,
niycälimay:
¿Tayta Dios malcanta ipanchälunchun?
¡Manamá!
Quiquïpis Israel caśhtamari cayá,
Abrahampa milaynin,
Benjaminpa ayllunmari.
2 Tayta Dios unaypi japächaycuśhan malcanta manamá ipanchalachu.
¿Icha manachun yaćhapäcunqui isquirbishancunaćhu Eliaspi limaśhanta?
Paymari Israel malcanpi Tayta Diosman caynu quijacula:
3 “Taytay,
willacüniquicunacta lluymi wañüchin,
alawaycälinacpä cäcätam pampaman lluy muyülächin.
Yaꞌallañamari cawsayniyu puchuycüca cayá.
Ñatac yaꞌactapis wañuchipämänanpäñam aticaćhacayalcäman”a nil.
4 Niptinmi Tayta Dios nila:
“Anćhish walanga (7000) wayapacuna chay taytacha Baalman mana uyshuycälïcunactalämi uywayá”b nil.
5 Caynüpam canan timpupä Tayta Dios llaquipayninćhu Israelcunäpi aclaycula.
6 Paycuna manam imapis lulapäcuśhanpachu,
sinuꞌa Diospa llaquipayllanpamari.
Lulayninpa captinꞌa manañaćh llaquipaypachu canman.
7-8 Chayurá caytam tantiachimanchic:
Israelcunaca wañuy-wañuy ashishanta manamá taliycapäculachu.
Aclaśhancunäñatacmi ichá taliycälila.
Juccunäpa śhunꞌuntañatacmi lumiyächila Diospa shiminćhu nishannüpis:
“Tayta Diosmi śhunꞌunta lumiyächin,
canancamapis ñawin mana licananpä,
linlinpis mana uyalinanpä” nil.
9 Chaynütacmi Davidpis nila:
“Cushicuy fistachacuynincuna quiquinpa cunca cuchuynincunaman muyuchun,
licalichun trampancunaman palpupäcunanpä.
Jinaman imanpis mana cäman muyuchun,
chaynüpa mućhuycachisha capäcunanpä.
10 Ñawincunapis aspachun;
lluy imawanpis ñitichicüśha pasaypi curculächunpis”c nil.
Mana-Israel caśhtam salbaycuśha capäcunꞌa
11 Chayurá má,
niycälimay:
¿Chaynu Israelcunaca ipanchapäcuśhanwan caśhan allincäman cutipämunanpä cäsu cayanlächun?
¡Aw-ari!
Aśhwanpa chay mana uyalicuynincunap mana-Israel caśhtacuna salbaśha cacuyaptinmi sïlaculcanꞌa.
12 Chayurá chay jalutacuynin jinantin pachäpä allin cayaptinꞌa,
jinaman chay palpuynin juc caśhtacunäpä allinnin cayaptinꞌa,
¡caśhan filtacamuptin maynu-maynu allinpäñaćhá caycunꞌa!
13 Canan am mana-Israelcunätam niycälic:
Amcunap puydï jucnin caćhanpämi Dios yaꞌacta ćhulaycamäla.
Chaymi cay lulaynïta sumä allin ćhaniyüpä licaycú.
14 Chaynüpam ichá imanuypapis malca-masí Israelcunäta licaćhacächïman waquinllanpis salbaculcänanpä.
15 Paycuna ipanchäśha capäcuśhanpa jinantin nunacunaca Diosman caśhan cutiycayämuptinꞌa ¿manachun ćhasquiculcaptinꞌa wañuypïña cawsamuśhannülä capäcunꞌa?
16 Maynümi wamä tanta lulaśhanchicta Diospä japächaycuptinchicꞌa lluy tantaña uycuśhanchicnuy cayan,
chaynütacmi lantap sapinpis Diospä japächaycuśha cayaptinꞌa lluy lapincunapis payllapäña cayan.
17 Canan má,
Israelcunaca rasun lantanümi cayan.
Chay waquinnin pallaynincunämari cuchüśha capäcula;
amñatacmi juc munti lanta cayalcalpis chay pallaynincunaman injirtäśha calanqui.
Chaynüpam cananꞌa chay sapillapi caycunqui,
chay lantallapïtac cawsacunquipis.
18 Ñatac chay juc pallaycunäpi mas allintucuyanquimanlätac.
Sïchuśh chaynu nunatuculꞌa yalpay,
amchu manamá sapinta uywaycuyanqui,
sinuꞌa sapinmi amta uywaycuyäśhunqui.
19 Ichapisćha ninquipis:
“Aw,
chay pallayca cuchüśha cala,
yaꞌacta chayman injirtaycamänanpämi” nil.
20 Aw-ari.
Ñatac paycuná mana chalapacuśhanpam cuchüśha capäcula.
Amcunañatacmi chalapacuyllayquipa chayman injirtäśha caycälinqui.
Chayurá ama-ari nunatucuyaychu,
sinuꞌa manchacuywan allin caycuy.
21 ¿Chay Israelcunätalä Tayta Dios mana awantayalchun,
ampá amtalätac mana cäsuyaptiqui awantayäśhunquiman?
22 Chayurá Tayta Dios maynu llaquipayniyu caśhantawan tincüninman licaycü caśhanta yalpay.
Caynu tincüninmanmi mana ćhasquï Israelcunäta licaycula;
amcunactañatacmi ichá llaquipayninta camalaycachishulanqui.
Chaynüllaćh caycunꞌa llaquipayninćhu tacyaycäliptiquiꞌa.
Sinuꞌa ampis cuchüśhamá canqui.
23 Masqui Israelcunäpis chay ishcayyayninćhu manaña tacyaycälilꞌa caśhan injirtaycuśham capäcunꞌa;
Tayta Diospa munayllanćhümari jinaycunanpäpis cayan.
24 Chayurá caynümi:
Tayta Dios amcunacta ćhulaycälishulanqui chaypä mana capäcuśhayquimanmi juc munti lantap pallayninta rasun allin lantamannüpis.
Chayurá ¡maynüñaćh quiquin lantanmanꞌa Israelcunäta Tayta Dios caśhan cutiycachinman!
25 Chalapacü-masïcuna,
cay Diospa pacacuyninta tuquicta yaćhaycälinayquitam muná,
nunatucüśha mana cayalcänayquipä:
waquin Israelcunaca pasaypi mana chalapacüman muyülälin Diospa lluy unanchaycuśhan mana-Israelcunaca chalapaculcänancamallam.
26 Chaypïtá llapa Israelcunam salbaycuśha capäcunꞌa.
Isquirbishancunaćhu niyanmari:
“Sionpi Salbacüca śhamunꞌa,
Jacobpa milayninpi mana allincunäta juluycunanpä.
27 Chaynu juchancunacta chincaycachiptïmi paycunawan limalicuśhäca canꞌa”d nil.
28 Chayurá amcuna-laycum Israelcunaca allin willacuyta mana ćhasquiyninwan Diospa ćhïnicünincuna cayalcan.
Chaynu captinpis awquilluncuna-laycu paypa aclaśhan capäculmi cuyaśhancuna.
29 Tayta Diosꞌa uśhancunätapis ayacuśhancunätapis manañamari cutichicuyanchu.
30-31 Maynümi amcuna chay unay mana uyalicuyniquićhu Israelcunäpa mana uyalicuyninpa Tayta Dios canan llaquipaycuśhunqui,
chaynümi paycuna imayläpis llaquipaycuśha caycälinꞌa.
Caynu canꞌa Tayta Dios amcunacta llaquipaycälishuśhallayquipamari.
32 Ñatac mana cäsucuyllanćhümi lluytapis Diosꞌa ćhänalächila chaycuscactatac llapantapis llaquipaycunanpä.
33 ¡Tayta Diospa yaćhaynin,
tantiaynin maynu-maynu mana camacaycümi!
¡Munalinanta manamá mayanpis niycunmanchu;
lulaynintapis manamá tantiayta atipanmanchu!
34 Ñatac “¿Mayantá Taytanchicpa tantiayninta yaćhaycunman?
¿Ütac mayantá imallactapis yaćhaycachinman?”e
35 “¿Payman mayantá imallactapis uycula,
pay cutiycachinanpä?”f
36 Llapa imapis paypïmi śhamun.
Payllapmi,
payllapätacmi lluy imapis caycun.
Chayurá ¡wiñaypä paylla alawäśha cachun!
Chaynu cachun.