Diospa śhunꞌunpänuy cawsanapämi munayta uycamanchic
8
Chayurá Jesuswan cusca cäcunäpä manañam mućhuycachiy canñachu ˻aychanchicpa munayninćhu manaña cawsal,
Ispiritup munayninćhüña cawsayaptinchicꞌa˼.
2 Chay cawsayta uycü Ispiritümari juchaman wañuyman puśhä camachicuypi Jesuspa julamälanchic.
3 Camachicuyca allin tincüninman cawsaycachiyta mana atipamälanchicchu pishi aychanchic captinmá.
Tayta Diosninchicñatacmi ichá juchanchicta mana cäman muyuycachila yaꞌanchicnu aychayu tulluyu chulinta caćhamuśhanwan.
Chaynüpam jucha-sapacunäpa juchanchicta cäraycul mućhuycachila.
4 Chaymari camachicuy lluy allin mañaśhancunaca yaꞌanchicćhu lulacacun aychanchicpa munayninćhu manaña cawsal,
Ispiritup munayninćhüña cawsayaptinchicꞌa.
5 Aychanpa munayninćhu cawsäcunäpa śhunꞌunpis chay aychanpa munayllanćhümi cayan.
Ñatac Ispiritup munayninmannuy cawsäcunäpá Ispiritup munayllanćhütacmi śhunꞌunpis cayan.
6 Sïchuśh aychanchicpa munayllanćhu śhunꞌunchicpis cayaptinꞌa,
wañuycämanmi ćhäśhun.
Ñatac śhunꞌunchic Ispiritup maquinćhu cayaptinꞌa sumä jawca allin rasun cawsayniyüñam caycuśhun.
7 Aw-ari,
aychap munayninman cawsäcuna manam imallaćhüpis Tayta Dioswan apanacunchu.
Manamari Tayta Diospa camachicuyninman sujitaculcanchu nïtac atipapäcunpischu.
8 Chaymari caycuna Tayta Diospa śhunꞌunpänuy mana cawsaycälinmanchu.
9 Amcunam ichá,
Diospa Ispiritun amcunaćhu rasunpa caycuptinꞌa,
aychayquip maquinćhüchu manaña cayalcanqui,
sinuꞌa Ispiritup maquinćhüñamá.
Mayanćhüpis Jesuspa Ispiritun mana captinꞌa manamá paypachu.
10 Aw,
aychayqui juchaćhu caśhan-laycum wañunan cayan.
Ñatac Jesus amcunawan cayaptinꞌa Tayta Dios caśhan allinpäña licaycälishuśhayquipam Ispiritun cawsayta uycälishunqui.
11 Chaynütac wañuycäpi Jesusta śhalcachï Tayta Diospa Ispiritun amcunaćhu cayaptinmi chay quiquin śhalcachimüca camacä aychayquicunacta Ispiritunpa cawsayta uycälishunqui.
12 Chayurá,
chalapacü-masïcuna,
aychanchicpa munayninman manañam cawsayänanchicchu.
13 Sïchuśh chaynülla cawsapäculꞌa wañuśhunmi.
Ñatac Ispiritucta cäsucul munayninwan aychanchicpa mana allin lulaynincunacta wañuchilmi ichá cawsaśhun.
14 Tayta Diospa Ispiritunpa caminaycuśha cäcunacá chulincunañam.
15 Cay ćhasquiycuśhanchic manam uyway-yupay manchacuyćhu canapä ispirituchu,
sinuꞌa chulin canapä cutiycachimäninchic Chuya Ispiritunmi.
Paypa munayninwanmari:
“Papáy papáy” ninchic.
16 Caynu Tayta Diospa Ispiritun yaꞌanchicpa ispiritunchicwan śhunꞌunchicćhu juclla caycuśhanpam chulin caycuśhanchicta camalaycachimanchic.
17 Chaynu chulin cayalꞌa Jesuswan cuscaćhari Tayta Diospa ćhulaśhan tücänincunacta ćhasquiycuśhun.
Chaynütac Jesuspa ñacä-masin cayalꞌa paywantacmi altumanpis juluycuśha caycuśhun.
Diosmi lluy camaśhanta altuman juluycunꞌa
18 “Canan ñacaśhanchicꞌa manam tincuycachisha canmanchu śhamücäćhu sumä altumanlä ćhulaycamänanchicwanꞌa” nilmi niyá.
19 Jinantin camaśhancunäpis Tayta Diospa chulincuna rasun imanuy cananchictapis licaycuypi wañupacuyalcanmá.
20 Rasunpa,
jinantin camaśhanmi mana caśhanman cutinanpä unanchaycuśha cala,
manam quiquillanpïchu,
sinuꞌa Tayta Dios munaptinmari.
21 Ñatac unanchaycula juc muyun llapan camaśhancunäta ismüśha cayalcäśhanpïta caśhan allincäman juluycunanpämi,
Tayta Diospa chulincunawan cusca jawca libri cayćhu caycunanpälä.
22 Yaćhanchicmi jinantin camaśhancuna waćhacü walminüpis ñacayćhu canancama caśhanta.
23 Yaꞌanchicpis masqui Ispiritu uycamäśhanchicwan dilantaycayämaptinchicpis,
waꞌayninchicwan llapan śhunꞌunchicwanmi Tayta Dios chulinman muyulcachil aychanchicta muśhüman muyuycachimänanchicta alcaycuyanchic.
24 Cayman chalapacuyninchicpamari salbaycamälanchicpis.
Ñatac alcaśhanchicta licaycuyalꞌa uywaycuyalꞌa manañamá imacta alcaycunanchic canchu.
¿Mayanmá uywaśhancäta alcaycuyanman?
25 Ñatac mana licaśhanchiccätalä alcaycuyalꞌa mana jucmanyällalmi alcaycunanchic.
26 Chaynütacmi mana callpayu cayaptinchicpis Chuya Ispiritutac yanapaycamanchic.
Manamá imanuypa mañacuytapis waquinćhuꞌa yaćhanchicchu.
Ñatac quiquin Ispiritum śhunꞌunpi-cama yalamü mana atipänä limayninwan Tayta Diosta yaꞌanchicpi mañacun.
27 Śhunꞌunchicćhu lluy cäcunäta lisï Tayta Diosmi tuquicta yaćhan imanuy śhunꞌunwan Ispiritu mañacuśhantapis.
Chaynütacmi chalapacücunäpi Ispiritu mañacuśhanca Tayta Diospa śhunꞌunpänuy caśhantapis yaćhan.
Jesuspam llallïcunapïpis maslä cayanchic
28 Cananꞌa Tayta Diosta cuyaśhanchicpïtá,
munayninmannuy aclamäśhanchicpïtam yaćhanchic ima pasamäśhanchiccunäpis allinninchicpä caśhanta.
29 Allaycuycäpïñam Tayta Dios yaćhala mayancuna aclaycuśhan cananchictapis.
Chay aclaśhancunäta chulin Jesusnülla canapämi unanchaycamälanchic.
Caynu achca-achcapïtañatacmi Jesus wamä chulin caycunꞌa.
30 Chay unanchaycuśhancunätam ayaycamälanchic;
ayaycuśhancunätam juchannäta licaycamälanchic;
chay mana juchayütaña licaycuśhancunätam altumanpis julaycamälanchic.
31 Chayurá ¿imanichwantan?
Tayta Dios yaꞌanchicwan caynüña cayaptinꞌa,
¿mayantá yaꞌanchicpa cuntranchic canman?
32 Tayta Dios chulintapis mana llaquipaycullal yaꞌanchicpi wañuycunanpä ćhulayalchun,
¿ampá paywan cuscactatac lluy imactapis mana uycamachwanchu?
33 Chayurá ¿mayantá aclacuśhancunäta acusaycamachwan Tayta Dioslä “Mana juchayüñam cayanqui” niyämaptinchicꞌa?
34 ¿Mayantá cäraycul mućhuycachimachwan quiquin Jesusninchic wañuyllachu mana wañuyal,
sinuꞌa śhalcalcamul Tayta Diospa lädunćhülä yaꞌanchicpi mañacuyaptinꞌa?
35 Salbacüninchic Jesuspa cuyacuyninpi ¿imatá laquiycamachwan?
¿Ñacaycunachun,
llaquicuycunachun,
aticaćhaycunachun,
micuy wanäcunachun,
mana müdanayu caycunachun,
sasachacuycunachun,
icha wañuycächun?
36 Rasunpa,
cawsayninchic isquirbishaćhu cay nishannümi:
“Am-laycum,
Tayta Diosnilláy,
imaypis wañuycällapä licaycuśha capäcú;
Uwish ćhipïsha cananpä licapäśhancänümi capäcú”a nil.
37-38 ¡Manamá imapis!
Lluy caycunaćhu cuyamäninchicpam llallïcunapïpis mas sumänincamalä caycunchic.
¡Tayta Dios Duyñunchic Salbacü Jesuswan cuyamäśhanchicpïta ima ayca mana japächamänanta yaćhayämi:
nï wañuycäpis,
nï cay cawsaypis,
nï anjilcunäpis,
nï puydïcunäpis,
nï munayniyücunäpis,
39 nï cay pachäćhüpis,
nï janay pachäćhüpis,
nï ima camaśhanpis,
nï cananpis,
nïtac śhamücunäćhüpis!