Camachicuypi libriñam cayanchic Tayta Diospä cawsananchicpä
7
Chalapacü-masïcuna,
camachicuyta sumäta lisïcunactam limapaycälic.
¿Nunaca camachicuypa maquinćhu cawsaśhanchiccamallam cayanchic icha manachun?
2 Má,
jucnin camachicuyninchicćhümari niyan walmica wayapan cawsaśhancamá payllawan caycunanpä.
Wayapan wañucuptinmi ichá chay chalaläśhan camachicuypi libriña.
3 Sïchuśh wayapan cawsayaptinlä juc wayapawan cayaptinꞌa mansibacuyanmi.
Ñatac wayapan wañucuptinꞌa libriñam munaśhanwan yapacunanpä;
jucwan yapaculpis manañamari mansibacuyanchu.
4 Chaynümi lluywanpis,
chalapacü-masïcuna.
Salbacü Jesuspa aychanwanmari amcuna camachicuypä wañuśha-yupayña cayalcanqui.
Chaymi cananꞌa śhalcamücäpäña caycälinqui,
Tayta Diospa allin wayuycunacta wayuycunanchicpä.
5 Ñatac unaymi aychanchicpa munaynin maquinćhu cachimälanchic.
Camachicuycäpis mana allin munayninchictam talcachï cala.
Jinaptinmi wañuyllapäña wayuyculanchic.
6 Ñatac cananꞌa chay camachicuypa maquinćhu ćhänalächimäśhanchicpá wañüśhanüña caśhanchicpam libriña cayanchic.
Chaymi manaña unay camachicuywanñachu Tayta Diosta sirbiycunchic,
sinuꞌa muśhü cämannüña,
Ispiritunpa munayninmannüñamari.
Allincäwan jucham iwinacun
7 Chayurá ¿“Camachicuyca mana allinmi” niyäśhunchun,
imatá?
¡Manamá!
Camachicuyca juchayu caśhallätam tantiaycachimäla.
Sïchuśh camachicuy “Ama munapayaychu”a mana nimaptinꞌa manaćh munapayta lisïmanchu cala.
8 Ñatac camachicuy nishancunacta juchaca chalacuyculmi śhunꞌüćhu imaymana mana allin munaycunacta śhalcachimula.
Camachicuyca mana captinꞌa juchaca wañüśha-yupayćha canman.
9 Chaymi camachicuyta manalä lisilꞌa allin cawsayniyu cayculá.
Ñatac camachicuy ćhämuptinꞌa śhunꞌüpi juchaca cawsamuyta allacuycuptinmi wañülá.
10 Chaynu cawsayta uycamänanpä alcaycuśhäcämi ichá wañuyman ćhächimäñä.
11 Nishacnüpis juchaca camachicuyta chalacuyculmi pantaycachil wañuyman ćhächiman.
12 Ñatac quiquin camachicuycá sumä chuyam,
allinmi,
tincüllanmanmi.
13 Chayurá ¿wañuycäman allincächun ćhächiman?
¡Manamá!
Ñatac rasunpa maynu-maynu juchaca caśhanta camalachicunanpä allincäta chalacuyculmi wañuycäman ćhächimäla.
Caynu camachicuypam maynu sumä mana allin caśhanta juchaca camalachicula.
14 Yaćhanchicmi camachicuyca Diospa Ispiritun cüsacunapi caśhanta.
Ñatac yaꞌa aychayu tulluyülla cayalmi juchap uyway nunan canäpä lanticüśha cacuñá.
15 Chaymi caycunacta lulaśhäpi rasunpa mana tantiayta atipächu.
Allin lulayta munalpis ćhïnipäśhá mana allincunällactam lulayta jicutayá.
16 Chaynu mana munaśhäcäta lulayaptiꞌa tantiachiman camachicuy allin caśhanta awnishätam.
17 Cay lulaycunacta manam quiquilläpïñachu lulayá.
Sinuꞌa yaꞌaćhu cä jucham mana allin lulaycunaman jitaycalläman.
18 Yaćhämari yaꞌaćhu ima allinllapis mana caycuśhanta.
Allincäta lulaycuypi maynu wañupaculpis manamá atipächu.
19 Cay allin lulay munaśhäta lulanäpïtá,
mana lulay munaśhá mana allincätam jinalla lulayá.
20 Chaynu mana munaśhäta lulayaptiꞌa manañam quiquïchu lulayá,
sinuꞌa cay aychäćhu cä juchäñam.
21 Caynu allincäta lulayta munayalpis mana allincälla yaꞌaćhu cayaptinꞌa tantiachiman juc licchä camachicuy yaꞌacta lulachimäśhantam.
22 Rasunpa Tayta Diospa camachicuyninta llapan śhunꞌüwanmari cuyá;
23 aychäñatacmi ichá chay juc camachishacta aticuyan.
Cay camachicuymari aychäćhu gïrranacun tantiaynïćhu allin camachicuy caśhanta tantiaśhäcäwan.
Jinalmi juchaman puśhamä aychäćhu camachicuyca ćhänalächiman.
24 ¡Imalä bïdá canꞌa!
Cay aychá wañuypä unanchaycuśhanpïta ¿mayanćha julaycallämanman?
25 ¡Tayta Diosllamari Duyñunchic Jesuspa!
¡Payta sulpay callächun!
Má,
ash limayllaćhu niycuśhayqui:
Tayta Diospa camachicuyninpa uywayninmi tantiaynïćhuꞌa caycú;
aychäñatacmi ichá juchap camachicuyninpa uywaynin caycun.