Diosmi munaśhanmannuy Israel caśhtacta aclaycula
9
Salbacüninchic Jesuspa puntanćhu cayal Chuya Ispiritu tantiaynïta caminaycayämaptinꞌa,
cay nishäca rasunmi;
manam articüchu:
2-3 ¡Maynu-maynu mana camacaycütamari śhunꞌüćhu llaquicú malca-masïcunapïta,
caśhta-masïcunapïta,
Israel-masïcunapïtapis!
Chaymi yanapaycuná captinꞌa masqui quiquïpis Jesuspïta japächäśha wiñay lupäcäman jitaycuśhapis cäman.
4 Israelcunämari Tayta Diospa aclacuśhan capäcula.
Paycunactam chulinman muyuycachila.
Jinaman sumä allin caynintapis licachila.
Paycunamanmi limalicuyta limalicul camachicuytapis uycula.
Paycunactam rasun imanuypa alawananpäpis yaćhaycachila.
5 Sumänin awquillunchiccunap milayninpïlätacmi paycuna śhapämun.
Chaypïtacmi imaycamapis alawäśha quiquin Dios lluy imapïpis sumänin Salbacü Jesuspis śhamun.
¡Chaynu cachun!
6 Caywan “Tayta Dios limalicuśhanca manam lulacacunchu” nil manam niyalcacchu.
Sinuꞌa “Llapa Israel caśhta manam rasun Israel caśhtachu” niyalcacmi.
7 Manatacmi Abrahampa lluy milaynincunachu chulincuna,
sinuꞌa “Isaacpam milayniqui śhamunꞌa”a nishancunämi.
8 Chayurá Tayta Diospa chulincuna manam aychallapi śhamücunächu,
sinuꞌa limalicuśhanpi śhamücunämá.
9 ¿Manachun Tayta Dios Abrahamta limalicula:
“Canannu wata śhamunäpämi walmiqui Sara wawicta ishyacunꞌa”b nil?
10 Jinaman chaynütacmi awquillunchic Isaacpa walmin Rebecaćhu ishcay chulin cala.
11-12 Chaynu captinpis,
chulin awachacunac manaläpis näsimuptin,
nï allinta ütac mana allinta lulaptinlämi jucninta Tayta Dios aclaycula munaśhanca lulacacunanpä.
Chayćhu maman Rebecactam nila:
“Mayurcämi śhullcäta sirbinꞌa”d nil.
Manamá allin ütac mana allin lulaśhanpachu,
sinuꞌa Tayta Dios chaynüpa unanchaycuśhallanpam.
13 Chaynütacmi niyan:
“Jacobtam aclalá;
Esaütañatacmi mana”f e nil.
14 Chayurá ¿“Tayta Dios mana allinta lulaycun” niyäśhunchun?
¡Manamá!
15 Quiquin Tayta Diosmari Moisesta nin:
“Mayanwanpis munaśhäwanmi allin śhunꞌuyu caycuśhä;
llaquipay munaśhätatacmi mayantapis llaquipaycuśhä”g nil.
16 Chayurá aclacuynin manam munayäcäpïchu nï wañupacuyäcäpïchu,
sinuꞌa Tayta Diospa llaquipayninpïtamá.
17 Chaymari isquirbishancunaćhu Faraoncäta aclaycuśhanpïpis niyan:
“Sumä puydï mandacüman yaꞌami ćhulaycuc munaynïta amćhu camalaycachinäpä;
jinal jinantin pachäman willaycuśha canäpämi”h nil.
18 Chayurá Tayta Dios munaśhancätam llaquipaycun;
śhunꞌunta lumiyachiyta munalꞌa lumiyächintacmi.
19 Ñatac ninquićh:
“Chayurá ¿imapïtan-nila juchachayämanman?
¿Paypa munayninpa cuntran mayantá śhalcunman?”
nil.
20 Yaꞌañatacmi nic:
¿Pï tucunquitan Tayta Dios ima lulaśhanpïpis niyänayquipä?
¿Icha allpapi luläśha wacuyca luläninta “¿Imapïtá caynüta lulamälanqui?”i
nilchun niyan?
21 ¿Manachun wacuy luläcäpa munayllanćhu cayan quiquin allpallapi fistallapä tuqui wacuyta ütac muyun-muyun sirbichicunallapä lulananpäpis?
22 Má,
Tayta Dios piñacuynintawan munayninta camalaycachinanpäña cayaptinpis pasinsiawanmi awantaycun cay rabyachïcunäta maynu-maynu camacaycüśha cananpä cayalcaptinpis.
23 Awantaycun juccunäman llaquipayninta ćhaycachinanpämi,
chay sumä jatun cayninta camalachicunanpä cäcunaman,
unaypïña unanchaycuśha cäcunämanmari.
24 Chay ayaycuśhancunaca yaꞌanchicmi cayanchic,
manam Israelcunallapïchu,
sinuꞌa mana-Israel caśhtacunäpïpis.
25 Chaymi Diospa willacünin Oseas isquirbishanćhu niyan:
“Mana malcá cäcunätam ‘malcá’ nishä.
‘Mana cuyaśha’ nishan malcamanmi cuyacuynïta camalaycachishä”j nil.
26 Jinamanmi niyan:
“Chay ‘Amcuna manamá malcächu capäcunqui’ nishacunällaćhütacmi ‘Cawsä Diospa chulincuna’ nishatac capäcunquipis”k nil.
27-28 Diospa willacünin Isaiasñatacmi Israel malcapi nila:
“Masqui lamarćhu cä awishquicunänuy Israelcunaca cayalcalpis,
waquillanmi salbaculcanꞌa.
Caynu canꞌa Taytanchic jinantin pachäćhu nunacunäman mana dimurällal tincüninman-cama cäraycuptinmá”l nil.
29 Chaynütacmi Isaias unay nila:
“Sumä munayniyu Taytanchic milayninchicta mana caćhaycamaptinchicꞌa,
Sodoma Gomorra malcacunanüćha cachwan cala”m nil.
30 Chayurá caytam camalaycachimanchic:
juchannä cayta mana ashiycü mana-Israel caśhtacunälämi aśhwanpa talïlälin.
Chayta chalapacuyllanpamá.
31 Ñatac mana juchayu caycuyta camachicuypa ashiycü Israelcunäñatacmi ichá nï taliycälinchu.
32 ¿Imapïtatan?
Manamari chalapacuypachu ashiycapäcula,
sinuꞌa lulayninpam.
Chaymari isquirbishaćhu nishanmannuy mitcacacuna lumïman mitcacälälinn.
33 Chayćhümi niyan:
“Licapäcuy,
Sionmanmi mitcacacunao lumicta ćhulayá;
chaynütacmi cućhpachï wancactapis.
Ñatac payman chalapacücá manam pinꞌayman juluycuśhachu canꞌa” nil.