16
“Lluy caycunacta nipäcuc yaꞌapïta mana laquiculcänayquipämi.
2 Chay juntunacuynincunapïta alupäcuśhunquim.
Chay wañuchipäcuśhüniquicunam:
‘Diosta caynüpamari sirbinchic’ nipäcunꞌalä canpis.
3 Caynu lulapäcunꞌa yaꞌactapis caćhamäní Taytätapis mana imaypis lisipämalmá.
4 Caycunacta willayalcac chay ćhämuptin cay nishäcunäta yalpapäcunayquipämi.
Ñatac puntapi caycunacta mana nipäculacchu yaꞌawan cayalcaptiquilämi.
5 Cananmi ichá caćhamäní caśhancäman cutiyaptïpis mana mayanllayquipis mayta linätapis tapupämanquichu.
Más enseñanza sobre el Espíritu Santo (Juan 16.5-33)
6 Aśhwanpam cay nishäcunäwan sumä-sumä llaquicälälinqui.
7 Masqui chaynu captinpis,
cutishäca amcunap allinniquipämari.
Mana cutiptiꞌa chay Caminaycuśhüniqui manam śhamunmanchu.
Aśhwanpa cutilmi caćhamuśhä.
8 Pay śhamulmi jinantin nunacunäta tantiachinꞌa jucha-sapa capäcuśhanta,
yaꞌapa allin caśhätapis,
ñatac juchancunapi mućhuycachisha canantapis.
9 Tantiachinꞌa jucha-sapa capäcuśhanta yaꞌaman mana chalapaculcämäśhanpïtam.
10 Tantiachinꞌatac allin caśhäta Taytäman cutilcul amcunawan manaña caśhäpïtam.
11 Jinaman tantiachinꞌatac mućhuycachinäta cay pachäta duyñuchacüśhaca cäraycuśhaña cayaptinmi.
12 “May-mayćha amcunacta niná cayan.
Cananꞌa anchapmari canman.
13 Chuya Ispiritu śhamulñam ichá rasun allincäta yaćhaycälichipäcuśhunqui.
Payꞌa manam quiquillanpïtachu yaćhachipäcuśhunqui,
sinuꞌa lluy uyalishancätam.
Jinamanꞌa śhamü muyuncunäćhu ima pasanancunactapis willaycälishunquim.
14 Caynu yaꞌapi ćhasquishallanta amcunaman willaycuśhanwanmi altumanpis julaycamanꞌa.
15 Ñatac Taytäpa lluy cänincunapis yaꞌapam.
Chaymi ‘Yaꞌapi ćhasquishantam Chuya Ispiritu amcunaman willaycuśhunqui’ niyalcac” nin.
Llaquicuycämi cushicuyman muyunꞌa
16 Nilculmi:
“Ishcay quimsa muyuncunapïtanuyꞌa manam licapämanquiñachu.
Chaypïtalämi caśhantac licapämanqui” nin.
17 Niptinmi waquin yaćhapacünincuna quiquin-pula:
“¿Imaninantan ‘Ishcay quimsa muyuncunapïta manam licapämanquiñachu.
Chaypïtalämi caśhan licapämanqui’ niyämanchic?
¿Imanuytacmi ‘Taytá caśhanman lishä’ nishancäpis?
18 Chay ‘Ishcay quimsa muyunpïtanuꞌa’ nishantapis manam imapi limaśhantapis tantianchicchu” ninaculcäla.
19 Ninacuptinmi Jesus tantiälun tapucuyta munapäcuśhanta.
Chaymi:
“¿Amcuna tapunacuyalcanqui ‘Cananpi ishcay quimsa muyuncunapïta manam licapämanquiñachu.
Chaypïtalämi caśhan licapamanqui’ nishäcäpïchun?
20 Canan sumäta uyalipämay:
cay pachäćhu nunacunaca cushicuyćhu cayalcaptin amcunañatacmi waꞌacuyćhu llaquicuyćhu capäcunqui.
Masqui chaynu llaquicuyniqui captinpis sumä cushicuymanmi muyunꞌa.
21 Maynümi juc walmip waćhay dulurnin chaläluptin dulurninta llaquisha apan.
Näsichicülulmi ichá chay wawinpïta cushicul nanay apaśhantapis manaña yalpanñapischu.
22 Chaynümi amcunapis canan sumä llaquichisha capäcunqui.
Caśhan cutimuptí tincuptinchicmi ichá sumä-sumäta cushiculcanqui.
Chay cushicuyniquitá manamá pipis ućhishunquimanchu.
23 Chay muyuncunaćhuꞌa,
manañam mañacalcämänayquipä canꞌañachu.
Rasunpa pudirní cayalcal Taytäta mañaculcäśhayquitam lluy uycälishunqui.
24 Canancama manalämi imallactapis pudirnïnuy mañaculcanquilächu.
Mañaculcalꞌa ćhasquipäcunquim sumä cushicuywan maćhaycuśha capäcunayquipä.
25 “Canancama caynu tincuchiyllapmi yaćhaycälichilac.
Ñatac Taytäpïta tincuchiycunap mana yaćhaycachil cällanman camalaycachiná üra jananchicćhüñam.
26 Chay muyunpi pudirní cayalmi Taytäta mañaculcanqui.
Manañam mañacapuná canꞌañachu.
27 Aśhwanpa quiquin Taytämi cuyapäcul uyalipäcuśhunqui.
Ñatac caynu cuyapäcuśhunqui cuyapämäśhayquipam,
jinaman paypi śhamuśhäta tantiapäcuśhayquipam.
28 Rasunpa Taytá caśhancäpïtam cay pachäman śhamulá.
Cananñatacmi cay pachäta caćhaycul Taytá caśhanman cutishä” nin.
29 Niptinmi yaćhapacünincuna:
“Cananꞌa mana tincuchillalñam tuqui tantiapaśhllacta willaycälimanqui.
30 Cananmi ichá tantiaycälí lluy imactapis yaćhaśhayquita aśhta ima tapucuyní cäcunactapis.
Chaymi Diospi śhamuśhayquita chalapaculcá” nipäcun.
31 Nipäcuptinmi Jesus:
“Chayurá chalapacayalcämanquićhá ¿aw?
32 Japalläta caćhaycälälimal wicta cayta chiꞌipäcunayqui üraca jananchicćhüñam.
Ñatac japallächu manam cayá;
Taytämari yaꞌawan cusca cayan.
33 “Caycunacta niyalcac yaꞌaćhu jawca caycälinayquipämi.
Cay pachäćhuꞌa ima sasachacuycunactapis pasapäcunquim.
Ñatac chaycunaćhu callpanchaculcay;
yaꞌa quiquïmari lluyta cay pachäćhu llalliytá llallïlüña” nin.