Jesusmi Taytanta yaćhapacünincunapä mañacun
17
Nilculmi Jesus janay pachäta licalcul:
“Taytay,
ürá ćhämunñam.
Mayan caśhätapis nunacunäman camalaycachiy yaꞌapis ampïta camalaycachinäpä.
2 Yaꞌamanmi munayniquita uycamälanqui lluy nunacunaca maquilläćhu cananpä,
chaynütac lluy unanchaycuśhayquicunäta wiñay simpripä cawsachinäpä.
Jesús ora por sus seguidores (Juan 17.1-26)
3 Paycuna am rasun Tayta Diosllätawan yaꞌa caćhamuśhayqui cäcäta lisiycuyllanwanmi wiñay cawsaycäta ćhasquipäcun.
4 Taytay,
sumä caśhayquitapis cay pachäćhu camalaycachïmi nimäśhayquicunäta lluy camacaycuśhäwan.
5 Chayurá,
canan-ari ñawpäniquićhu caśhan altuman julaycamay cay pacha allaycuptin anwan cusca julaycamäśhayquinu.
6 “Ñatac cay pachäćhu cäcunäpi unanchaycul uycamäśhayquicunällactam mayan caśhayquitapis lisiycachilá.
Ampa cäcunätamari uycamälanqui.
Ñatac shimiquita uyalilmi cäsuculcäla.
7 Chaymi canan yaćhapäcunña lluy umäśhayquicunaca amllapi śhamuśhanta.
8 Nimäśhayquicunäta lluy willacuptí ćhasquicalcämäla rasunpa am caćhamäśhayquipi śhamuśhäta tantialmi.
9 Chaymi mañacuc paycunapä.
Manam cay pachäćhu nunacunäpächu,
sinuꞌa ampa cäcunapïtam,
umäśhayquicunapïtam.
10 Cay lluy nuna yaꞌapa cäcunäpis ampam.
Chaynütacmi ampa cäcunapis yaꞌapatac.
Paycunapñatacmi maynu sumä caśhätapis camalaycachilanqui.
11 “Cananꞌa cay pachäta caćhaycuśhäñam anwan cananchicpä.
Paycunañatacmi ichá cay pachäćhu caycälinꞌalä.
Chayurá Sumä Taytay,
lluy umäśhayquicunäta ñawillayquićhu caycachiy-ari yaꞌanchicnuy jucllaylla paycunapis caycälinanpä.
12 Cay pachäćhu paycunawan caśhäcamá,
lluy umäśhayquicunäta munayniquiwanmi ñawilläćhu uywalá.
Manamá jucllanpis chincalachu sinuꞌa chay shimiquićhu nishannuy lulacacunanpä camacäśha cananpä unanchäśhancällamari.
13 “Canan cusca cananchicpämi cutiyämú.
Cay pachäćhu caśhäcamam ichá caycunacta mañacamú cushicuynïwan sumä maćhaycälinanpä.
14 Paycunacta willacuyniquita willaptïmá cay pachäćhu nunacunaca ćhïnipapäcula.
Chay uyalicücunäpis nï yaꞌapis manam cay pachäpächu capäcú.
15 Chaynu captinpis,
manam cay pachäpi julunayquipächu mañacuc,
sinuꞌa cay mana allincäpi licaycunayquipämi.
16 Rasunpa,
manam paycunapis nï yaꞌapis cay pachäpächu capäcú.
17 Chayurá rasun allin shimiquiwan amllapäña chuya-camacta lulaycuy.
18 Maynütacmi cay pachäpa ćhawpinman caćhamälanqui,
chaynümi yaꞌapis cay pachäpa ćhawpinman caćhayá.
19 Paycuna-laycumari amllapäña calá paycunapis amllapäña sumä capäcunanpä.
20 “Paycunallapïchu manamá mañacuc,
sinuꞌa paycunap willacuyninpa śhamü chalapacamäcunäpäwanmi.
21 Taytay,
lluy paycunari jucllaylla imaćhüpis capäcuchun.
Maynümi yaꞌanchic juclla cayanchic,
chaynu-ari paycunapis yaꞌanchicwan jucllaylla capäcuchun,
caćhamäśhayquita lluy nunacunaca yaćhapäcunanpä.
22 Ñatac sumä caynïta umäśhayquitapis paycunactam uyculá yaꞌanchicnu jucllaylla capäcunanpä.
23 Yaꞌa paycunaćhu caśhänuy ñatac am yaꞌaćhu caśhayquinu-ari sumä jucllaylla caycuchun.
Chayćha jinantin nunacunaca yaꞌacta cuyamäśhayquinuy paycunactapis maynu cuyaśhayquita tantiapäcunꞌa.
24 “Taytay,
cay uycamäśhayquicunaca yaꞌawan capäcuchun.
Chayćha cay pachäta manalä camal sumä altuman julaycamäśhayquitawan maynu cuyamäśhayquita licapäcunꞌa.
25 Sumä Chuya Allin Taytáy,
cay pachällapa cäcunacá manam lisipäcuśhulanquichu.
Yaꞌami ichá lisic.
Nunäcunapis caćhamäśhayquita yaćhapäcunñam.
26 Chaynütacmi ampi camalaycachilá;
jinallam camalaycachishäpis cuyamäśhayqui cuyacuyniqui ñatac yaꞌa quiquïpis paycunaćhu caycunanpä” nil mañacula.