Jesusmi rasun üba plantaca cayan
15
Nilculmi Jesus nilatac:
“Yaꞌam rasun üba plantaca cayá;
Taytäñatacmi lulaycüca.
2 Chaymi jucnin pallayní mana wayuyniyu captinꞌa lluy cuchülun.
Ñatac wayuyniyu captinmi ichá püdapayan mas wayuy-sapa cananpälä.
La vid y las ramas (Juan 15.1-17)
3 Chaynümi amcunapis shimïta uyalil ćhasquimäcunacá,
püdaśhanuy allin chuyaña cayalcanqui.
4 Chayurá yaꞌaćhu tacyaycäliy amcunaćhu yaꞌa caycuśhänuy.
Juc pallay quiquillanpïta manamá wayunmanchu.
Chay yulaćhümi caycunan.
Chaynümi amcunapis yaꞌaćhu mana capäculꞌa mana wayupäcunquimanchu.
5 “Yaꞌami üba plantaca cayá;
amcunañatacmi pallaynïcuna.
Chaymi yaꞌaćhu tacyaycüca,
chaynütac yaꞌapis paywan caycuptiꞌa sumä wayuyniyu caycunꞌa.
Ñatac quiquillayquicuná manam imallactapis lulayta atipapäcunquimanchu.
6 Chaynütacmi yaꞌaćhu mana caycücá chaquinanpä wicapäśha pallaycänuy cayan.
Chaycuna chaquïluptinmi juntulcul nina walaśhancäćhu cañaśha canꞌa.
7 Ñatac yaꞌaćhu masïsu tacyaycul,
shimïtapis śhunꞌunćhu uywaycücätá munaśhayquitam mañacuśhayquimannuy uycuśha capäcunqui.
8 Caynu sumä wayuyniquiwan maynu sumä yaćhapacünïcuna caśhayquita camalaycachipäcuśhayquipam Taytá altuman juluycuśha canꞌa.
9 “Taytá cuyamäśhannümi amcunactapis cuyapäcuc.
Cay cuyacuynïćhu-ari tacyapäcuy.
10 Maynümi yaꞌa Taytäpa camachimäśhanta uyalicul,
paypa cuyayninćhu tacyaycú,
chaynümi lluy camachicuynïta uyaliculꞌa amcunapis cuyaynïćhu tacyaycunqui.
11 “Caycunacta niycälic amcunaćhu cushicuyní caycuptin maćhaycälälinayquicama cushiculcänayquipämi.
12 Caymi camachicuyní amcunapä:
Yaꞌa cuyapäcuśhacnuy quiquiqui-pulapis cuyanaculcay.
13 Sumä-sumänin cuyaycücá quiquinpa bïdanta amigunpi uycücämi.
14 Amcuna camachicuynïta cäsuculcalꞌa amigüñam capäcunqui.
15 Manañam ‘uywayní’ niyalcacchu.
Uywaycá patrunnin ima lulaśhancunactapis manam yaćhanchu.
Amcunactam ichá Taytá lluy nimäśhanta yaćhaycälichicña.
16 Ñatac amcunachu manam yaꞌacta aclapämälanqui,
aśhwanpa yaꞌami aclapäculac mana camacaycü sumä wayupäcunayquipä.
Chayurá pudirní cayalcaptiquiꞌa ima mañaculcäśhayquitapis Taytá uycälishunquim.
17 Yapa nishayqui cay camachicuynïta:
quiquiqui-pula cuyanaculcay.
Jesustawan yaćhapacünicunacta ćhïnipapäcunꞌam
18 “Cay pachäćhu nunacunaca ćhïnipäcuśhuptiquiꞌa yaꞌacta puntacta ćhïnipämäśhanta yalpapäcuy.
Jesús advierte sobre la persecución (Juan 15.18-16.4)
19 Sïchuśh cay pachäpä capäcuptiquiꞌa nunacunaca quiquintanümi cuyapäcuśhunquiman.
Canan chay mana allin lulayniyücunäpi julapämuśhacpam,
jinamanꞌa chay lulayninta manaña atichipäcuptiquim ćhïnipapäcuśhunqui.
20 Chaynütac yalpapäcuy ‘Juc uyway manam patrunninpïta maslächu’ nipäcuśhacta.
Chayurá yaꞌactapis aticaćhayalcämalꞌa,
amcunactapis aticaćhapäcuśhunquim.
Willacuynïta ćhasquiyalcämalꞌa amcunactapis ćhasquipäcuśhunquim.
21 Lluy caynu lulapäcuśhunqui caćhamänïta mana lisil yaꞌa-laycum.
22 Rasunpa willaycunäpä mana śhamuptiꞌa manam pï juchachaycunan canmanchu cala.
Cananmi ichá juchanpi mana ima ninan canñachu.
23 Yaꞌacta ćhïnimäcá Taytätapis ćhïniyantacmi.
24 Munaynïwan milagrucunacta paycunaćhu mana lulaptiꞌa mana juchachäśham capäcunman.
Cananmi ichá masqui cay lulaśhäcunacta licayalcalpis ćhïnipapämäśhanwan Taytätapis ćhïniyalcantac.
25 Caycunawanmari lulacacun camachicuyćhu ‘Yanꞌalpïmi ćhïnipapäman’a nishanca.