“Yaꞌam caminuca, rasun allinca, cawsayta uycücäpis cayá”
14
Nishanpïmi:
“Amañari anchap jucmanyäśha cayalcaychu.
Aśhwanpa Tayta Diosmanpis,
yaꞌamanpis chalapacalcämay.
2-3 Taytá caśhancäćhümi yaćhanapä achca jäcuyalcan.
Chaymi ćhäpämunayquipä allichamü liyá.
Chaynu allichalcamulmi puśhäniqui cutimuśhä,
yaꞌa caśhäcäćhu amcunapis capäcunayquipä.
Sïchuśh chaynu mana captinꞌa manaćh ‘Allichä-ari lishä’ niyalcacmanchu.
El único camino a Dios (Juan 14.1-14)
5 Niptinmi Tomas:
“Taytay,
manatac mayta linayquitapis yaćhapäcüchu.
¿Imanuypatá chay caminütälä lisïlälïman?”
nin.
6 Niptinmi Jesus nin:
“Yaꞌam caminuca,
rasun allinca,
cawsayta uycücäpis cayá.
Yaꞌallapamari Taytäman ćhanman.
7 Amcuna yaꞌacta lisipämalꞌa Taytätapis lisipäcunquim.
Cananpïtá lisïlälinquiñam.
Jinamanꞌa licälälinquiñam canpis” nil.
8 Niptinmi yaćhapacünin Felipe:
“Taytay,
Tayta Diosta licaycachimänallayquipämi capäcuśhä” nin.
9 Jesusñatacmi:
“Felipe,
¿cay-chica timpu cayaptinchicchun manalä lisimanquimanchu?
Yaꞌacta licamäcá,
Taytätapis licaycunñam.
¿Chaychun canan ‘licachimay’ niyämanquimanlä canpis?
10 Icha ¿manachun Taytäćhu yaꞌa caśhäta chaynütac Taytäpis yaꞌaćhu caśhanta chalapacunqui?
Imanishacpis manam quiquilläpïchu,
sinuꞌa yaꞌaćhu cä Taytämi lulaycuyan.
11 Chalapacamay-ari Taytäwan juclla capäcuśhäta masqui milagrucunacta lulaśhalläpapis.
12 Rasunpa,
yaꞌaman chalapacamäcunacá yaꞌa lulaśhäcunactam lulapäcunꞌa.
Taytäman cutiptïmi ichá sumä mascunactalä lulapäcunꞌapis.
13 Ñatac yaꞌap pudirní cayal Taytäta imactapis mañaculcaptiquiꞌa uycuśhämi,
Taytá maynu munayniyu caśhanta yaꞌawan camalaycachinanpä.
14 Chayurá yaꞌap śhutïćhu mañacalcämuptiquiꞌa imactapis ćhasquiycälinquim.
Chuya Ispiritucta caćhamunanpämi limalicun
15 “Ñatac rasunpa cuyapämalꞌa,
yaćhachicuynïmannümi cawsaycälinqui.
Jesús habla del Espíritu Santo (Juan 14.15-31)
16-17 Chaynütacmi Taytäta mañacuśhä juc Caminaycüniquita caćhamunanpä.
Chay rasuncäta camalachï Ispiritunmari amcunawan imaycamapis caycunꞌa.
Mana chalapacücunacá payta mana licalmi lisilmi nï ćhasquïpäcunmanchu.
Amcunam ichá cusca cayalcal lisipäcunqui.
Jinamanñatacmi amcunaćhu caycunꞌa.
18 Manatacmi caćhaycälishayquichu,
sinuꞌa amcunaman cutimuśhämi.
19 Ñatac ishcay quimsa muyuncunapïtanuy caypi licuptïmi manaña licapämanꞌañachu.
Amcunam ichá caśhan cawsamuptí licapämanqui.
Chaymari amcunapis cawsapäcunqui.
20 Chay muyuncunaćhümi tantiapäcunqui Taytäćhu caśhäta,
chaynütac amcunapis yaꞌaćhu capäcuśhayquita,
jinamanꞌa yaꞌapis amcunaćhu caśhäta.
21 Mayanpis shimïta uyalicul lulaycücá llapan śhunꞌunwanmi cuyaman.
Cuyamäcunätá Taytäpis cuyanꞌam.
Yaꞌañatacmi sumäta camalaycachicuśhä” nin.
22 Chayćhümi juc Judas — cayꞌa manamá Judas Iscariotichu — nin:
“Taytay,
¿imapïtan yaꞌacunallaćhu camalaycachicunqui,
jinantin nunacunaćhuꞌa manatac?”
nil.
23 Niptinmi:
“Cuyamäcá camachicuynïmannümi cawsaycunꞌa ñatac Taytäpis cuyanꞌam.
Taytäwan cutipämulmi cuyamänïcunawanpis yaćhapäcuśhä.
24 Mana cuyamäcunacá camachicuynïmannüchu manam cawsapäcunꞌa.
Cay nishäcunaca manam quiquilläpïchu sinuꞌa caćhamäní Taytäpïmi.
25 Cayćhu caśhäcamam caycunacta yaćhayalcächic.
26 Śhamü muyuncunaćhüñatacmi ichá Taytá Caminaycüniquipä caćhamuśhan Chuya Ispiritu yaćhachipäcuśhunqui.
Cay yaćhachishäcunätapis yalpachipäcuśhunquim.
27 “Cananꞌa yaꞌa-laycum jawca caycälinqui.
Jawca caynïtam uycälicña.
Cay jawca cayta uśhacꞌa manam cay pachäćhu nunacuna uśhancänüllachu.
Chayurá ama jucmanyapäcunquichu,
nï manchaliculcanquichu.
28 Uyalipäculanquiñam ‘Licuśhämi;
chaypi caśhanmi amcunaman cutimuśhä’ nishäta.
Rasunpa cuyapämalꞌa yaꞌapïpis mas munayniyu Taytäwan cusca canäpä liyaptiꞌa cushiculcanquimanmi.
29 Lluy caycunacta willayalcac manaläpis pasayaptinlämi,
cay nishänülla pasaptin chalapacalcämänayquipä.