Jesusmi yaćhapacünincunap ćhaquinta paꞌan
13
Chay Libraculcäśhan Fistapä juc muyunllañam cayäla.
Jesusñatacmi cay pachäpïta Taytan caśhancäman cuticunan üra ćhämuśhanta yaćhalaña.
Pay cay pachäćhu nunancunactam cuyala.
Chaymi maynu-maynu cuyaśhantapis camalaycachinanpä cayäla.
2-4 Ñatac supayca Simon Iscariotip chulin Judaspa śhunꞌunmanmi ćhuläla Jesusta ipanchananpä.
Jesusñatacmi quiquin Tayta Diospi śhamuśhantapis payman cutinantapis,
jinaman maquinman lluy imacta Taytan ćhulaycuśhantapis tuquicta yaćhala.
Chay sinayalcäśhanćhümi Jesus śhalcuculcul janä müdananta lluśhticulcul tuallacta wiꞌawninman watacülun.
Jesús lava los pies de los discipulos (Juan 13.1-17)
5 Jinalculmi labaturiuman yacucta ćhulaycul yaćhapacünincunap ćhaquinta paꞌalcul wiꞌawninćhu tualläwanñatac pichala.
6 Ñatac Simon Pedroman paꞌananpä ćhäluptinmi:
“Taytay ¿amlächun ćhaquïta paꞌayämanquiman?”
nin.
7 Niptinmi:
“Caycunacta manalämi canan tantianquimanlächu.
Chaypïtam ichá tantiapäcunquiman” nin.
8 Niptinmi Pedro:
“Manam imaypis ćhaquïtá paꞌacamanquimanchu” nil mićhacula.
Niptinmi:
“Mana paꞌaptiꞌa,
manam yaꞌapä canquimanchu” nin.
9 Niptinmi:
“Taytay,
chaynu captinꞌa,
maquïtawan umätawan-ari paꞌaycallämay” nin.
10 Niptinmi:
“Mayanpis almacuśhacá lluy chuyañam cayan;
ćhaquillantañam paꞌacunan.
Amcuna chuyañam cayalcanqui,
masqui lluy mana capäculpis” nin.
11 Caynu Jesus nila “Manam lluychu chuya cayalcanqui” nil pï ipanchanantapis yaćhalmi.
12 Ñatac lluy yaćhapacünincunap ćhaquinta paꞌayta camacalpulmi,
caśhan müdaculcul taycucuycul nila:
“¿Tantiapäcunquichun imapi caynu lulaśhäta?
13 Amcuna ‘Yaćhachicü taytay’ nipämanquim.
Rasunpa nimäśhayquinümi cayá.
14 Yaꞌa yaćhachicü taytayquilä uyway nunanu ćhaquiquicunacta paꞌayaptiꞌa,
amcunapis quiquiqui-pula paꞌanaculcänayquim.
15-16 Rasunpa juc uyway manam patrunninpïta maslächu,
nïtac juc caćhaśha nunapis caćhäninpïta maslächu.
Chaymi caynu lulaynïwan yaćhaycälichic amcunapis lulaycälinayquipä.
17 Canan caycunacta uyalicul lulapäculꞌa cushisham capäcunqui.
18 “Ñatac manam llapayquipïchu limayá.
Mayanniquicuna aclaśha capäcuśhayquitapis yaćhämari.
Rasunpa isquirbishancunaćhu ‘Cusca micuśhäcämi ipanchäní licalïlun’a nishancämi canan lulacacunꞌa.
Jesús predice la traición (Juan 13.18-38)
19 Cananpïmi cay pasanantapis willayalcac lluy lulacaptin rasunpa pï caśhäta tantiapäcunayquipä.
20 Sumäta uyalipäcuy:
caćhacuśhäta ćhasquïcá quiquïtam ćhasquiyäman;
yaꞌacta ćhasquiycamäcá caćhamäní Taytätapis ćhasquiyanmi” nin.
Judas ipanchanantam Jesus willan
21 Caycunacta nilculmi Jesus sumä-sumäta llaquisha cayal:
“Rasunpa jucniquim ipanchapämanqui” nin.
22 Niptinmi yaćhapacünincuna licapänacuyllaman camälälila,
“¿Mayannïćha cayalcá?”
nicuśhtin.
23 Ñatac cuyaśhan yaćhapacüninmi Jesuspa lädunćhu cayäla.
24 Paytam Simon Pedro siñaśhchayllap “¿Mayanshi chay cayan?”
nil tantiachila tapunanpä.
25 Niptinmi masta jućhutyalcul:
“Taytay,
¿mayannïtan chay ipanchäniqui cayalcá?”
nin.
26 Niptinmi Jesus:
“Tantacta puśhtalcachilb uśhäcämi cayan” nin.
Nilculmi tantacta puśhtalcachil Simon Iscariotip chulin Judasman uycula.
27 Chayćhu ćhasquïllaptin-pacham Judas Satanaśhpa maquinćhu cananpä llallichicüla.
Chaymi Jesus:
“Lulanayquita apuraypa lulay” nin.
28 Niptinmi chayćhu lluy micücunaca imapi chaynüta nishantapis mana tantiapäculachu.
29 Ñatac Judas illay uywäca captinmi “ ‘Fistäpä lluy lantipacamuy’ niyanćha,
ütac ‘Wacchacunaman uycamuy’ niyanćha” nil nipäcula.
30 Ñatac chay tanta uśhancäta Judas micacalpulmi tutapäśhaña pasacula.
Jesusmi muśhü camachicuyta uycun
31 Chaynu pasacuptinmi Jesus:
“Canan ürá ćhämunñam.
Yaꞌa Rasun Nunap Chulinca maynu sumä caycuśhäta ñam camalachicuśhäña.
Ñatac yaꞌa lulaśhäwanmi Tayta Dios altuman juluycuśha canꞌa.
32 Jinaycuptí yaꞌactapis altuman julaycamänan cayllaćhüñamá cacuyan.
33 “Cuyaśhäcuna,
ash timpullañam amcunawan caycuśhä.
Chayćhu ashipämalpis Israelcunäta nishänüpis manam lishämanꞌa lipäcunquimanlächu.
34 Cananmi muśhü camachicuyta niycälic:
quiquiqui-pula cuyanaculcay.
Maynümi cuyapäculac chaynu-ari cuyanaculcay.
35 Chaynu cuyanaculcaptiquim yaćhapacünïcuna caśhayquita lluypis tantiapäcunꞌa” nin.
Pedro ipanchanantam Jesus willan
36 Niptinmi Simon Pedro:
“Taytay,
¿maytatan licunqui?”
nin.
Niptinmi:
“Lishäcäman canan manam atimanquimanlächu.
Chaypïtaćh ichá śhamunquiman” nin.
37 Niptinmi Pedro:
“¿Taytay,
imapïtan canan mana aticmanlächu?
Am-laycu bïdätapis uśhämi” nicuyan.
38 Jesusñatacmi:
“¿Rasunpachun bïdayquitapis uycunquiman?
Rasunpa manaläpis wallpa waꞌamuptinmi,
quimsa cutictaña ‘Manam lisïchu’ nil nimanqui” nin.