Jesusmi nunacunäpa michïnin
10
Chaypïtam:
“Sumäta uyalipämay:
mayanpis uwish canćhaman puncunpa mana yaycul juc-lädunpa yaycücá cullu cära suwam.
2 Ñatac quiquin michïcá canćhap puncunpam yaycun.
Jesús el buen pastor (Juan 10.1-21)
3 Paytam puncu quićhäcäpis quićhaycun.
Uwishnincunapis uyat-uyatllañam cayalcan.
Chaymi ayayllawan canćhanpïta yalachimun.
4 Chaynu lluyta yalalcachimul puntanta ñawpaptinmi uwishcunäñatac shiminta lisipäcul atipäcun.
5 Ñatac juc nunactá manam atinchu.
Aśhwanpa michïninpa shimin mana caśhanta yaćhalmi buryaylla ayiculcan” nin.
6 Caynu tincuchiywan Jesus yaćhachiptinpis imapi limaśhantapis manam tantiapäculachu.
7 Chaymi nila:
“Rasunpa yaꞌam uwishcunäpa yaycunan puncuca cayá.
8 Ñatac puntäta śhamücunacá pasaypi suwacunam.
Ñatac uwishnïcuná manam cäsupäculachu.
9 Sumäta uyalipämay:
yaꞌallam rasun puncuca cayá.
Chaymi mayanpis yaꞌap yaycücá salbaśha canꞌa.
Jinaptinmi uwish cutiticlaylla llullu pastucunalläćhu jawca puliycänuy capäcunꞌa.
10 Ñatac suwacá suwacüllam wañuchïllam camacällam śhamun.
Yaꞌañatacmi ichá llapanta sumä-sumä allin jawca mana camacaycü cawsayta unäpä śhamulá.
11 “Chaynütacmi yaꞌa allin michïca cayá.
Allin michïcá uwishnin-laycum bïdantapis uycun.
12 Ñatac michipacücunacá atü śhayämüta licälulꞌa quiquinpa uwishca mana captinmi lluy caćhaycul ayicun.
Jinaptinmi atüca paćhcaycul lluy pintïchin.
13 Chay nunacá uwishcunäpi mana imapis ucunchu michipacülla calmi.
14-15 “Yaꞌam ichá quiquin allin michïca cayá.
Maynümi Taytäwan lisinacú,
chaynümi uwishnïcunawanpis lisinacú.
Chay uwishnï-laycumari bïdätapis uycú.
16 Jinaman cay canćhäćhu mana cä uwishnïcunactapis atimunämi cayan.
Paycunapis shimïta uyalipämanꞌam.
Chayćhümi juc canćhallaña juc michïllaña canꞌa.
17 “Ñatac Taytá cuyaman quiquí cawsaynïta uycul caśhan cawsanäpä captïmi.
18 Manam mayanpis bïdäta apamanꞌachu;
quiquilläpïmi uycuśhä.
Maquilläćhümari unäpäpis,
śhalcamunäpäpis cayan.
Caynu lulayní cananpä Taytäpïmi ćhasquiyculá” nil.
19 Chayta uyalipäculmi Israelcunaca ishcayman iwinacälälin.
20 Waquinnincunam nipäcula:
“Cayꞌa Satanaśhpa gänaśha lücuśhäta ¿imapämá uyalipäcunqui?”
nil.
21 Juccunañatacmi:
“Satanaśhpa gänäśha cayalꞌa caynu allin yaćhachicuyta manam limayanmanchu,
nï nasïdunpi aplactapis licayächinmanchu” nipäcula.
Caćhamuśhan Salbacüca Jesus caśhanta manam awnipäcunchu
22 Ñatac Jerusalenćhümi Diospa Wasinta Chuyanchaśhan Yalpanan Fista tamya timpućhu cala.
Jesús acusado de blasfemia (Juan 10.22-42)
23 Chayćhümi chay wasip “Salomonpa Patyun” nishanćhu Jesus puliyäla.
24 Chaymi Israelcunäpa puydïnincuna cunćhacaycälil:
“¿Imaycamatan umäta nanachipämanqui?
Dios Caćhamuśhan Salbacüca rasunpa cayalꞌa,
¡sumätañari niycälimay!”
nin.
25 Niptinmi Jesus:
“Niyaptïpis amcuna manamá chalapaculcanquichu.
Jinaman Taytäpa munayninwan imaymana milagru lulaśhäcunam pï caśhätapis tantialcächishunqui.
26 Jinaptinpis yaꞌap uwishní mana capäculmi shimïta nï chalapacamanquichu.
27 Ñatac yaꞌa uwishnïcunawan lisinacümi.
Chaymi shimïta uyalil atipäman.
28-29 Paycunactam mana imaypis chincapäcunanpä wiñay cawsayta uycú.
Taytá uycayämaptinmari mana mayanpis maquïpïta ućhimanꞌachu.
Pay lluypïtapis sumä munayniyu cayaptinmi maquinpïta mana mayanpis ućhipäcunmanchu.
30 Yaꞌa Taytäwan jucllamari capäcú” nin.
31 Chayćhümi Israelcunaca lumicta yapa apticälälin Jesusta tamshälälinanpä
32 Jinaptinmi:
“Taytäpïmi imaymana milagrucunacta amcunaćhu lulalá.
¿Mayanninpïtatá tamshayta munacayalcämanqui?”
nin.
33 Niptinmi:
“¡Allin lulaśhayquipïchu manamá,
sinuꞌa Tayta Diosta jalutacuśhayquipïtamari!
¡Am nunalla cayal Diostucuśhayquipïtamá!”
nicuyalcan.
34 Jesusñatacmi:
“Quiquin Diosninchic isquirbishancäćhümi ‘Amcuna dioscunam capäcunqui’a nunacunallacta nila.
35-36 Yaćhaśhanchicnüpis camachicuy rasunca cayalꞌa,
manam articunchu.
Chayurá chaynu nunacunäman shiminta uycuśhancunällacta ‘dioscuna’ niyalꞌa,
maynülämi cay pachäman quiquin Śhuñaycuśhan Caćhamuśhancätá ninmanpis.
Chayurá ‘Paypa chulinmi cá’ nishalläpi ¿imapïtan-nila Tayta Diosta jalutacüpa licapämanqui?
37 Taytá nimäśhancunacta mana lulaptiꞌa ama chalapacalcämaychu.
38 Nimäśhanta lulaptïñatacmi ichá,
masqui yaꞌacta mana ćhasquipämalpis lulaśhäcäman-ari chalapaculcay Tayta Dios yaꞌaćhu caśhanta,
chaynütac yaꞌapis Taytäćhu caśhäta tantiapäcunayquipä” nin.
39 Chaymi yapa wićhachinanpä chalayta munacuyalcaptin chaypi chincacula.
40 Chaypïmi Jordan mayüćhu Bawtisä Juan unay bawtisaśhancäman Jesus yapa chimpala chayćhu caycunanpä.
41 Chayman achca nunacuna licä lïcunämi:
“Bawtisä Juan masqui ima milagructa mana lulayalpis,
śhamü nunapi willamäśhanchiccänüllamá rasunpa canan pasacuyan” nipäcula.
42 Chayćhüñatacmi Jesusman achca chalapaculcäla.