Jesusmi apla nunacta sänachin
9
Liyäśhanćhümi nasïdunpi apla nunacta Jesus licälun.
2 Chayćhümi yaćhapacünincuna:
“Yaćhachicü taytay,
caynu apla näsïmula ¿quiquinpa juchanpïchun icha taytancunap juchanpïchun?”
nipäcula.
Jesús cura a un ciego (Juan 9.1-41)
3 Niptinmi:
“Manam quiquinpa nï taytanpa juchanpïchu,
sinuꞌa Diospa munaynin payćhu camalaycunanpämi.
4 Chaymi caćhamäní lulananchicpä nimäśhancäta wañuy-wañuylla lulaycunanchic muyunca caśhancama.
Mayanpis lulayta mana atipänan tutaca ñam jiꞌacaycayämunña.
5 Ñatac cayćhu caśhäcamá,
cay pachäćhu nunacunäpa acchinmi cayá” nin.
6 Nilculmi pampäman tuwaycul dïdunwan mitucta lulaycul chay apläpa ñawinta llusiycul nila:
7 “Siloé nishan istanquićhu paꞌacamuy” nil.
(Siloé ninanꞌa “Caćhaśhanca” ninanmi.)
Niptinmi chay apla lilcul paꞌacamul licaśhtinña cutïmun.
8 Chaymi malca-masincunapis,
mañapacuyäta licäcunäpis:
“¿Manachun wicćhu täcuylla täcul mañapacü aplaca?”
nipäcula.
9 Waquinninmi “Paymari” nipäcula.
Juccunañatacmi “Manam.
Jucmi paynü-nilälla” nipäcula.
Apläñatacmi:
“Quiquïmari cayá” nila.
10 Niptinmi tapupäcula:
“¿Imanuypatan-nila ñawiqui quićhacacülun?”
nil.
11 Niptinmi:
“Chay Jesus nishan nunam mitucta lulaycul ñawïman llusiycäman.
Jinalculmi ‘Siloé istanquiman lil paꞌacamuy’ niman.
Chayćhu paꞌacullal-pacham licälú” nin.
12 Niptinmi:
“¿Mayćhütan chay nunaca cayan?”
nipäcula.
Niptinmi:
“Äli,
manam yaćhächu” nin.
Fariseocunämi chay apla sänäśhäta tapupäcun
13-14 Ñatac Jesus mitucta lulaycul apläpa ñawinta quićhacachishanca warda muyunćhümi cala.
Chaymi fariseocunäman chay apla sänäśhäta puśhälälin.
15 Ćhächiptinmi tapupäcula imanuypa ñawin quićhacacüśhantapis.
Niptinmi:
“Mituwan ñawïman llusiycamaptin paꞌacullalmi licälú” nin.
16 Chayćhu waquinnin fariseocunämi:
“Chay nuna Diospïchu manam canman.
¿Imanuypatá cay lulayninwan warda muyuncäta jalutacuyanman?”
nipäcula.
Juccunañatacmi:
“Jucha-sapa nuna cayalꞌa,
¿imanuypatá caynücunactalä lulayanman?”
nipäcun.
Chaymi quiquin-pula iwinacälälin.
17 Chaymi yapa tapucuyalcan:
“Amꞌa ¿imaninquimá,
ñawiquita licachishüniqui nunapïta?”
nil.
Niptinmi:
“Diospa willacüninmari” nin.
18 Ñatac fariseocunaca aplapi sänaśha caśhanta manam awnïtuculcälachu,
aśhta chay apläpa mamanta taytanta ayachipämunancama.
19 Chaymi mamanta taytanta ayalcachimul:
“¿Cay chuliquichun?
¿Rasunpachun nasïdunpi apla?
Chayurá ¿canan imanuypatan licälun?”
nin.
20 Taytancunañatacmi:
“Aw,
payꞌa chulïmi;
jina nasïdunpi aplam cala.
21 Ñatac imanuypa ñawin licaśhantam ichá yaꞌacunapis mana yaćhapäcüchu nï mayan quićhacachishantapis.
Quiquintari tapupäcuy;
ñam yayniyüña” nipäcun.
22 Chaynu nipäcula Israelcunap puydïnincunaca mayanpis “Jesusꞌa Caćhamuśhan Salbacücämi” nil limalcücäta juntunacuynincunapi alapacüśha cananpä limanacüśha captinmi.
23 Chaymi taytancuna “Quiquinta tapuy;
ñam yayniyüña” nipäcula.
24 Chaymi aplapi sänäśhäta caśhan ayalcachimul:
“Diospa ñawpäninćhu rasuncäta niycälimay.a
Yaꞌacunam tuquicta yaćhapäcú chay nunaca jucha-sapa caśhanta” nin.
25 Niptinmi:
“Manamari yaćhächu jucha-sapa mana jucha-sapa caśhantapis.
Śhunꞌućhu yaćhacú aplapïta canan licaśhallätam” nila.
26 Niptinpis mastam tapupäcula:
“¿Imactam luläśhulanqui?
¿Imanuypatan ñawiquita quićhacächishulanqui?”
nil.
27 Niptinmi:
“Niyalcacñamari;
willayaptïpis manatacmi quiripämanquichu.
¿Icha yapa tapupayalcämanqui amcunapis atïnin cayta munapäculchun?”
nin.
28 Niptinmi fariseocunaca:
“¡Ima!
¡Amćhá chay-nilä nunäpa atïnin cayanqui;
yaꞌacuná Moisespa atïninmi capäcú!
29 Yaćhanchictacmi quiquin Dios Moiseswan limaśhantapis.
Ñatac chay nunäpïtá manam yaćhanchicchu maypi yalämuśha caśhantapis” nipäcula.
30 Niptinmi aplapi sänäśha nunaca:
“¡¿Imanuypatá caynu ñawïtapis licachimä nunactalä maypi śhamuśhantapis yaćhapäcunquimanchu canpis?!
31 Tuquictam yaćhanchic Tayta Dios jucha-sapacunäta mana uyalil manchacuywan cäsucünincunallacta uyalishanta.
32 Manatacmi imaypis uyalilanchicchu nasïdunpi aplacta licächishantá.
33 Rasunpa Diospi mana śhamulꞌa manaćh caynüta lulälunmanchu” nin.
34 Chaynu niptinmi:
“¡Cärayqui cañächun am juchallaćhu chapunacüśha näsïcälä yaꞌacunacta yaćhachïtucupämänayquipä!”
nicuyalcan.
Nilculmi lluy alülälila.
Aplaca llapan śhunꞌunwanmi chalapacun
35 Jinaptinmi Jesus yaćhälun chay apla sänäśhanca alüśha caśhanta.
Chaymi tincülul:
“¿Rasun Nunap Chulinman chalapacunquichun?”
nin.
36 Niptinmi:
“Taytay ¿chay mayantan cayällan?
Niycallämay chalapacunäpä” nin.
37 Niptinmi:
“Licayanquiñamari;
anwan limäcämi cayá” nin.
38 Niptinmi puntanman unꞌulacuycul:
“Aw,
chalapacullämi” nil altuman juluycula.
39 Niptinmi Jesus:
“Cay pachäman śhamulá imanuy nunacuna caśhantapis camalaycachïmi,
aplacunäta licaycachï,
licätucücunätañatac rasunpa mana licapäcuśhanta tantiaycachï” nin.
40 Niyta uyalïlälilmi chayćhu cä fariseocunaca:
“¿Ima,
yaꞌacunapis aplachun cayalcá imatá?”
nicuyalcan.
41 Niptinmi Jesus:
“Aplapa-yupay tantiayniqui cayaptinꞌa nishayqui pampachaycuśham canman.
Ñatac licätucuśhayquipam juchallayquićhülä cayalcanqui” nila.