Mansibacü walmictam pampachan
8
Jesusñatacmi Ulibus nishan ulüta licula.
2 Chay walantinmi wäla wälalla Diospa chuya wasinman cutimula.
Chayćhümi nunacunaca juntunacälälimuptin taycucuycul Jesus yaćhachila.
Jesús perdona a mujer condenada (Juan 8.02-11)
3 Chaymanmi camachicuyta yaćhachicücunäwan fariseocunaca juc walmicta mansibacuyäta talilcälil puśhapämula.
Chayćhu lluy nunacunap ñawpäninman śhaycacaycachilmi
4 Jesusta nipäcula:
“Yaćhachicü taytay,
cay walmictam mansibacuyäta talïlälí.
5 Moisespa camachicuyninćhuꞌa caynuy walmicunacta lumi tamshaypa wañuchinapämi cayan.
¿Amꞌa imaninquitan?”
nil.
6 Cayta nipäcula Jesuspa limayllan cunca cuchuynin cananpämi.
Jesusñatacmi ichá pampäman uyshucalpul dïdunwan allpäćhu isquirbiyäla.
7 Chayćhu jinalla tapucuyalcaptinmi Jesus śhalculcul nila:
“Mayanniquipis mana juchayücá,
má,
allaycuchun tamshayta” nin.
8 Nilculmi caśhan uyshucalpul pampäćhu dïdunwan isquirbiyäla.
9 Chaynüta niycüluptinmi puśhamücunaca juchayu capäcuśhanta lluy tantiacalcälil awquishnincunapi allacaycälil jucllap jucllap chincaculcäla.
Jinaptinmi Jesuswan chay walmïllaña quïdäläliña.
10 Chayćhümi Jesus śhalculcul tapula:
“Walmi,
¿mayćhütan cayalcan?
¿manachun jucllanpis juchachaycälishunqui?”
nil.
11 Niptinmi:
“Taytay,
manamá mayanllanpis” nin.
Niptinmi:
“Chayurá yaꞌapis manam juchachacchu.
Jawcallañari licuy.
Cananpiꞌa amañamá juchacta lulanquiñachu” nin.
Mayan caśhantapis bälichicun
12 Chaypïta achca nunacunäta yapa yaćhachilmi nin:
“Cay pachäćhu llapa nunacunäpa acchinmi cayá.
Yaꞌacta atimäcá manañam tutapäcäćhu cawsanꞌachu,
sinuꞌa sumä cawsayta uycuśha acchićhümi cacunꞌa” nil.
Jesús es la luz del mundo (Juan 8.12-30)
13 Niptinmi fariseocunaca:
“Ä,
canan caynu quiquillayquipi willacuśhayquiwanꞌa limayniqui manamá bälinchu” nin.
14 Niptinmi:
“Maypi śhamuśhätapis yaćhayaptiꞌa masqui yaꞌalla willacuyaptïpis,
willacuśhäca rasuncämi.
Amcunam ichá mana yaćhapäcunquichu maypi śhamuśhätapis nï mayta linätapis.
15 Nunacunallap tantiayllanmannümi cäraycälinquipis.
Yaꞌañatacmi ichá mayantapis mana cäraycüchu.
16 Ñatac cärayculpis caćhamänïwan cayaptïmi tincüninman cäraycuyniꞌa.
Manam japallächu licaycú,
sinuꞌa paywanmi.
17 Amcunap camachicuyniquićhümi ‘Ishcay nuna willaycü captinꞌa tacyalpachishañam’ niyan.
18 Chayurá yaꞌa quiquïmi jucnin willaycüca cayá;
juccäñatacmi caćhamäní Taytá” nin.
19 Niptinmi:
“¿Mayćhütan chay taytayqui cayan?”
nipäcula.
Jesusñatacmi:
“Mayan rasunpa caśhätapis mana lisiyämalꞌa ¿imanuypatan taytätalä lisïlälinquiman?
Manamá mayannïtapis lisipämanquichu” nin.
20 Caycunacta nila Diospa chuya wasinćhu illay apapämunan ćhulacunpa läduscanćhu yaćhayächishanćhümi.
Chayćhu manalä üran captinmi mana pipis prïsunanpä chalapäculachu.
21 Chaypïtam Jesus yapa nila:
“Yaꞌa licuśhäñam;
ashiyalcämalpis manam ćhäpämunquimanchu;
aśhwanpa juchayquićhu cayalcalmá wañupäcunquipis” nil.
22 Niptinmi Israelcunaca:
“ ‘Yaꞌa caśhäcämanꞌa manam ćhäpämunquimanchu’ ninanpä ¿‘supay-apäśhä’ nicuyanchun,
imamá?”
nipäcun.
23 Jesusñatacmi nin:
“Amcuna cayllapïmi capäcunqui;
yaꞌañatacmi ichá janaypi.
Amcuna cay pachällapïmi capäcunqui,
yaꞌañatacmi ichá mana cayllapïchu.
24 Pï caśhätapis nishacmannuy mana chalapaculcalꞌa juchayquićhümi wañupäcunqui” nil.
25 Niptinmi:
“Am ¿pï tucunquitan?”
nipäcun.
Niptinmi:
“Allaycuśhäpïta mayan caśhätapis nishäcämari.
26 Jinaman amcunapïtapis sumä achcam limapaycälinac cäraycälinac cayan.
Caycuna cay pachächu sumä tincüllanman cayan rasuncällacta niycü caćhamänïpïta uyalishäta willaycuptïmi” nin.
27 Ñatac manam tantiapäculachu,
taytanpïta limaśhanta.
28 Chaymi Jesus nila:
“Altuman śhalcachisha captïlämi Nunap Chulinca rasunpa yaꞌa caśhäta,
chaynütac quiquilläpi imactapis mana limal,
caćhamäní yaćhachimäśhanmannülla limaśhäta tantiapäcunqui.
29 Chayurá caćhamäní yaꞌawanmi cayan.
Imaypis paypa munaśhanta lulaptïmi mana japallätachu caćhaycaman” nin.
30 Caynu Jesus niptinmi achca chalapaculcäla.
Taytan mayan caśhanpïtam limapäcun
31 Chay chalapacü Israelcunätam Jesus:
“Amcuna willacuynïćhu masïsu tacyapäculꞌa rasunpa yaćhapacünïcunam cayalcanqui.
Jesús se enfrenta a falsos discípulos (Juan 8.31-59)
32 Jinalmi Diospi rasun allincäta lisipäcunqui.
Chay rasuncäñatacmi ćhänalächipäcuśhuśhayquipi julapäcuśhunqui” nin.
33 Niptinmi:
“Yaꞌacuná Abrahampa milayninmi capäcú;
imaypis manamá mayanpa uywayllanpis capäculächu.
¿Chaychun ‘Amñatac juluycuśham capäcunqui’ niyalcämanquiman?”
nipäcula.
34 Niptinmi Jesus:
“Rasunpa mayanpis juchaćhu cawsäcunacá juchap uywayninmi cayalcan.
35 Uywayca chay ayllućhu manam pasaypipächu caycun.
Ñatac chulinmi ichá pasaypipä.
36 Chayurá Chulica julaycälishuptiquiꞌa pasaypipä libriñam capäcunqui.
37 Yaćhämari Abrahampa milaynin capäcuśhayquita.
¿Chaynu cayalcalchun yaćhachicuyní śhunꞌuyquipänuy mana captin wañuchiyta munayalcämanqui?
38 Ñatac quiquin Taytäpa lädunćhu cayal licaśhäcätam yaꞌa limá;
amcunapis taytayqui limapapäcuśhuśhayquitam lulapäcunqui” nin.
39 Niptinmi nipäcula:
“Yaꞌacunap taytá Abrahammari” nil.
Jesusñatacmi:
“Abrahampa rasun chulin capäculꞌa,
paynüćha lulaycälinquiman.
40 Manaćh wañuchiyta munayalcämanquimanchu quiquin Diospi uyalisha rasun allincäta willaycuyaptiꞌa.
Caynüchu Abrahamꞌa manamá lulaycula.
41 Amcuná taytayquip lulaynintam lulaycuyalcanqui” nin.
Niptinmi paycuna:
“Yaꞌacuna manam ishu chulipacuychu capäcú.
Tayta Diosllam yaꞌacunap taytá” nicuyalcan.
42 Jesusñatacmi:
“Rasunpa Dios taytayqui captinꞌa paypi śhayämuptiꞌa cuyapämanquimanćha.
Paypa caćhaśham śhayämüpis,
manamá munaylläpïchu.
43 Chayurá ¿imapïtan-nila yaćhachicuynïta mana tantiapäcunquimanchu?
Mana ćhasquiculcänayquimari.
44 Aśhwanpa amcuná taytayqui Satanaśhpa munaśhanta lulayta jicutayä nunanmi capäcunqui.
Payꞌa cay pachap allaycuyninpïta nuna wañuchicümi.
Manamari imaypis rasun allincäta niyculachu nï cayculapischu.
Artishca cayalmi jinaman chay articunap quiquin taytan cayalmi articta limalꞌa tincüninman liman.
45 Chaymari yaꞌa rasun allincäta willaycuptiꞌa mana chalapacalcämanquichu.
46 Má ¿mayanllayquiꞌa juchayu caśhäta licapämälanquitan?
Chayurá rasuncäta yaćhayächiptí ¿imapïtan mana ćhasquiculcanquichu?
47 Rasunpa,
Diospa cäcunacá shiminta uyaliculcanmi.
Paypa mana capäculmi amcuna mana uyalïtuculcanquichu” nin.
Abrahampïpis mas puntacta Jesus calañam
48 Niptinmi Israelcunaca:
“Allintam niyalcac ¡anla Samaria-lädu nuna Satanaśhpa gänaśham canqui!”
nipäcun.
49 Niptinmi Jesus:
“Manam Satanaśhpa gänaśhachu cayá.
Aśhwanpam Taytäta altuman juluycú;
amcunañatacmi ichá pinꞌayman julaycälimanqui.
50 Manamá quiquillächu alawacuyta ashiyá;
aśhwanpa jucmi alawaycuśha canäpä ucupacuyan.
Payꞌa amcunactapis lluyta cäraycücämi cayan.
51 Chaymi rasunpa willacuynïta chalapacücá wañuyta mana lisipäcunꞌachu” nin.
52 Niptinmi Israelcunaca:
“Cananmi ichá Satanaśh gänaśhuśhayquita rasunpa yaćhalpälí.
¡¿Imanuypatan ‘Shimïman chalapacücunacá manam wañuyta lisinꞌachu’ niyanman,
aśhta quiquin Abrahampis Diospa willacünincunapis wañuyalcaptin?!
53 ¿Tayta Abrahampïpis mas puydïlächun cayanquiman,
imatá?
Paypis Diospa willacünincunapis wañuculcälam.
¿Amꞌa pï tucunquitan?”
nipäcun.
54 Niptinmi Jesus:
“Quiquilläpi alawacuptí manam uchucllapis pasanmanchu.
Aśhwanpa amcuna ‘Diosnïmi’ nipäcuśhayqui quiquin Taytämi altuman julaycaman.
55 Niyalcalpis amcunañatacmi ichá mana lisipäcunquichu.
Yaꞌami ichá tuquicta lisiycú.
‘Manam lisïchu’ niptiꞌa amcunanüpis casquicüćha cäman.
Yaꞌami ichá lisiyal shiminmannuy cawsaycú.
56 Ñatac taytayqui Abrahampis cay śhamuná timpucta licaycuypi cushiculam.
Chaymi licämalꞌa sumä-sumälä cushicula” nin.
57 Niptinmi:
“Picha ćhunca watallayquipis mana cayaptin ¡Abrahamta licälunquiman ampá!”
nipäcun.