Jesustam juchaman palpachiyta Satanaśh jicutan
4
Ñä Jesus Chuya Ispiritup munayninćhu cayalmi Jordan mayupi cutila.
Chayćhümi Chuya Ispiritu chunyäninman payta puśhala mana allinman Satanaśh palpuyta ñacachinanpä.
2 Chayćhu tawa ćhunca muyun,
tawa ćhunca tuta ayunaptinmi micanäcuyanña.
Jinaptinmi Satanaśh:
3 “Amꞌa quiquin Diospa Chulin rasunpa cayalꞌa cay lumïta tantaman muyuchiy” nila.
4 Niptinmi:
“Isquirbisham cayan:
‘Manam tantallawanchu nunaca cawsanchic’a nil” nila.
5 Chaypïmi Satanaśh puśhala altu uluman.
Chayćhümi juclla licächin cay pachäta lluy imapis cänintinta.
6 Chayćhümi Jesusta nila:
“Cay licaśhayqui lluy sumä caynintin yaꞌap maquïćhümi cayan mayanmanpis uycunäpä.
7 Canan unꞌulacuycul alawamaptiquiꞌa maquiquimanmi lluy ćhulaycuśhayqui” nil.
8 Niptinmi Jesus:
“Diospa shiminćhümi niyantac:
‘Tayta Diosllayquitam imaypis alawanqui;
payllactatacmi sirbinqui’b nilmi niyan” niycülun.
9 Chaynütacmi Jesusta puśhala Jerusalenta.
Chayćhu Diospa chuya wasinpa mas altunninman ishpilcachilmi nila:
“Rasunpa quiquin Diospi śhamü Chulinca calꞌa caypi,
má,
paćhcalpüluy.
10-11 “¿Manachun Diospa shiminćhüpis:
‘Anjilnïcunactam caćhamuśhä paycuna maquinwan chalapäcuśhuptiqui lumiman mana uchucllapis tupacunayquipä’c niyan-ari?”
nil.
12 Niptinmi:
“Diospa shiminćhüpis niyantacmi:
‘Tayta Diosniquita munayniquimanꞌa ama jicutaychu’d nil” niycülun.
13 Chayćhu munaśhantanu mana lulachiyta atipaculculmi Satanaśhca juc-puncama caćhaycula.
Jesusmi lulanancäta allaycun
14 Chaypïtam Chuya Ispiritup munayninwan Galileap malcancunaman Jesus cutila.
Jinaptinmi paypïta limapäcula intiru Galileaćhu.
Lucas 4.14-44
Jesustam wañuchiyta munapäcun
16 Chaypïtam unay yaćhaśhan Nazaret malcanta Jesus cuticula.
Warda muyunćhüñatacmi custumrinmannuy juntunaculcänan wasiman yaycuycul Diospa shiminta lïginanpä śhalcućhacula.
17 Chaymi Diospa unay willacünin Isaias isquirbishan librüta julalcamul uycula.
Chayćhümi quićhaycul lïgila:
18 “Diospa Ispiritunmi yaꞌaćhu cayan.
Pay quiquinmi śhuñacamäla wacchacunäman allin willacuyta willacunäpä.
Llapa prïsuśha cäcunaman lil caćhaycachimunäpämi caćhamuśha cá.
Jinaman aplacunacta licachinäpämi.
Jucpa maquincunaćhu ñacäcunäta julunäpämari śhamulá.
19 Cayćhu cayá Tayta Diosninchicpa salbanan timpüta willanäpämi”e nil.
20 Cayta lïgilculmi caśhallan pitwilcul cutiycachil taycucuycula.
Chayćhümi llapanpis payllactaña licapäcuyalcan.
21 Jinaptinmi Jesus nila:
“Cay lïgimuśhäcäta uyalipäcuśhayquinümi canan ñawpäniquićhu lluy lulacacuyan” nil.
22 Niptinmi lluy nunapis licapayllaman camäśha “Paymi ichá allinta liman” nipäcula.
Parti awniyalcaptinpis:
“¿Manachun cayꞌa Josëpa chulillan,
imatá?”
nilmi nipäculatac.
23 Chaynu nipäcuptinmi Jesus nila:
“Juc limayćhu nipäcuśhannüpis:
‘Quiquiquitalä jampicüluy’ nipämanquićh.
Ñatac ‘Capernaum malcaćhu lulaśhayquitanuy cayćhüpis lulal licachipämay’ nipämanquićh.
24 “Chaymi yaꞌa nipäcuc:
Diospi willacücunacá manamá mayanpis quiquinpa malcanćhu allinpa ćhasquishachu” nil.
25 Jinamanñatacmi nila:
“Rasunpa,
Elias Diospi willacuśhtin pulinan unay timpućhümi micuy wana cacula quimsa wata partin mana nï chican tamyapis tamyamuptin.
26 Chaypun Israel malcanchicćhu maynu japanyäśhacuna micuypi cayalcaptinpis Dios manam willacünin Eliasta caćhamulachu.
Sinuꞌa caćhala Sidonćhu cä Sarepta juc-lädu malcäćhu japanyäśha walmïta yanapaycachïmi.
27 Chaynütacmi Diospa unay willacünin Eliseo timpućhüpis Israel malcanchicćhu achca-achca ishyayalcäla lipra ishyaywan.
Manamá nï jucllantapis sänaycachilachu.
Sinuꞌa Siria juc-lädu malcayu Naaman nunallactamari” nila.
28 Chay niyta uyalïlälilmi llapanpis piñacälälil:
“¡Cärayqui cañächun yaꞌa Israelcuna cayalcaptí caynu nipämänayquipä!”
nila.
29 Nilculmi Jesusta lluy-lluy aysacuyalcan chay malcap fiyu shiwyayä aꞌanpi jitalpamü.
30 Jinayalcaptinpis Jesusꞌa ćhawpinpa pasalculmi licula.
Satanaśhpa gänaśha nunacunactam Jesus caćhaycachin
31 Chaypïtam Jesus licula Nazaretpïta Galileap Capernaum malcanman.
Chayćhümi warda muyuncunaćhu yaćhachï cala.
32 Chay yaćhachicuyninta uyalilmi sumä licapayllaman camälälil:
“Sumä pudirwanmá pay yaćhachin” nipäcula.
33 Chayćhüñatacmi Satanaśhpa gänaśhaf juc nuna cañä.
34 Chaymi apalcaćhaypa nicuyan:
“¡Nazaret malcayu,
Jesus!
¡Caćhaycälimay!
¿Imactatá yaꞌacunawan munacuyanqui?
¿Mana cäman muyuchipämänayquipächun śhamulanqui,
imatá?
Yaćhämari Diospi Śhamü Chuya caśhayquita” nil.
35 Niptinmi Jesus piñapäla:
“¡Cay nunäpi upälla liculcay!”
nil.
Niptinmi pampäman sätalcul mana uchucllapis däñaycullal chay nunäpi yalapäcula.
36 Chayćhümi lluy nunapis licapänacuyllaman camäśha ninaculcäla:
“¡Imatan cayꞌa!
¡Juc licchä yaćhachicuymá!
¡Maynu sumä munayniyu nunatan achatupis cäsucul licunanpä!”
nil.
37 Jinaptinmi chay lulaśhanta lluy malcacunaca yaćhatityälälila.
Jesusmi Pedrop suyranta allinyachin
38 Chay juntunaculcänan wasipi yalulculmi Jesus lila Simonpa wasinta.
Ćhänanpämi Simonpa suyran calur ishyaywan śhüśhuwaśhting jitalayäña.
Jinaptinmi Jesusta ruygacula sänachinanpä.
39 Chaymi ishyäcäman aśhuycul “Ishyay,
cay walmipi yaluy” nil nillaptin ishyaynin juclla chincacula.
Jinaptinmi śhalculcul atindiycula.
Jesusmi ishyäcunacta allinyachin
40 Ñä aspicalpuyaptinmi payman imaymana ishyaywan ishyänincunacta ćhächipämula.
Jinaptinmi lluytapis yataycullal sänachila.
41 Waquincunactañatacmi achatup maquinpi caćhaycachila.
Jinaptinmi apalcaćhaypa achatucunaca:
“¡Amꞌa canqui quiqui-quiquin Diospa Chulincämi!”
nila.
Quiquin Diospa Caćhaśhan Salbacüca caśhanta yaćhapäcuptinñatacmi piñapalcul manaña limalcachilachu.
Juntunaculcänan wasicunaćhu Jesusmi willan
42 Chay achicäluptin chunyäninman Jesus licuptinmi lluy nunacunaca talipäcunancama ashipäcula.
Chayćhu talilcälilñatacmi juc malcacunaman linanta nï munapäculañachu.
43 Niptinmi:
“Manam.
Juc malcacunamanpis linämi,
Diospa gubirnunpi paycunactapis willaycunäpä.
Chaypämi Diosninchic yaꞌacta caćhamäla” nila.
44 Nilmi Galilea-lädućhu juntunaculcänan wasicunaćhu yaćhachishtin pulila.