Puydï sasirdüti Josueta chuya müdanawan ćhulachishantam lican
3
Chaypïta puydï sasirdüti Josuetam Tayta Dios licachimäña.
Paymi Tayta Diospa anjilninpa ñawpäninćhu śhäcuyäña.
Josuepa allï lädunćhüñatacmi Satanaśhca tumpananpä cayäña.
2 Chayćhümi Satanaśhcäta Tayta Diospa anjilnin nin:
“¡Satañaśh,
upälla cay!
¡Malcanpa Jerusalenta aclacü Tayta Diosmi upälla nishunqui!
¿Cay nunaca manachun nina waläcäpi śhanśha julüśhanu cayan imamá?”
nil.
3 Chay anjilpa ñawpäninćhüñatacmi anla müdanawan ćhulacüśha Josue śhäcuyäña.
4 Chay anjilcäñatacmi sirbiy yanapänincunacta nin:
“Chay anla müdananta lluśhtipäcuy” nil.
Nilculmi Josueta nin:
“Licay,
juchayquicunactam julülú.
Sasirdüticuna ćhulacuśhan fïnu müdanacunawanñamari canan ćhulaśhayqui” nil.
5 Chaypïtam yanapänincunacta nin:
“Chuya cä uma watacuwan Josueta ćhulapäcuy” nil.
Niptinmi chuya uma watacuwan ćhulälälin;
jinaman sumä müdanawanpis müdälächin.
Tayta Diospa anjilninñatacmi chay puntanćhu jinalla śhäcuyäla.
6 Chaypïta Josuetam Tayta Diospa anjilnin nin:
7 “Sumä munayniyu Tayta Diosmi niyäśhunqui:
‘Munaśhämannu cawsaycuptiqui,
camachishäcunactapis lulaycuptiquim ichá alawana wasïta licaycüca canqui;
chayćha patyuncunactapis ñawillayquićhu caycachinqui.
Jinaman sirbïnïcunactawan cuscactalämi ćhulaycuśhayquipis.
8 Puydï sasirdüti Josue,
lluy sasirdüti-masiquiwan uyalipäcuy.
Amcuna śhamü muyuncunapämi siñalnu cayalcanqui.
Sirbïnïtam puśhaycamuśhä;
“Chillqui” nishantam puśhaycamuśhä.
9 Má,
Josuepa ñawpäninman ćhulaśhá lumictari licapäcuy.
Chay lumi anćhish ñawiyümi cayan;
chaymanmi yaꞌa isquirbiycuśhä.
Juc muyunllaćhümá jinantin pachäpa juchanta pampachaycuśhä.
Yaꞌa sumä munayniyu Tayta Diosmi niyá.
10 Chay muyunćhümi üba,
ïgus lantayquicunap siquinćhu quiquiqui-pula jawca jamachinaculcanqui.
Yaꞌa sumä munayniyu Tayta Diosmari niyá’ ” nil.