Prïsu puśhaśha cäcunätam nin
2
Chaypi altucta licalcuśhäćhümi suyñuynïćhünu licälú juc wayapa tupunapä cä curdilnin apticüśhacta.
2 Paytam yaꞌa Zacarias nilá:
“¿Maytam liyanqui?”
nil.
Niptïmi:
“Jerusalen malcacta anchunman largunman ayca caśhantapis tupuycümi liyá” niman.
3 Ñatac limapämä anjilca yalucuyaptinmi juc anjilñatac talipänin śhamuña.
4 Paymi nin:
“Curdil apacüśha lï wayapacta juclla niycamuy:
‘Jerusalenćhu achca-achca nunacuna,
uywacuna timpuyaptinmi mana murällayüña capäcunꞌa’ nil.
5 Tayta Diosmari niyan:
‘Paycunap muyülïninćhu yaꞌami nina walayä murällannu caycuśhä;
paycunap ćhawpinćhümari sumä caynïta camalaycachishä’ ” nil.
6 Israelcunätamari Tayta Dios niyan:
“Tawan läduman yaꞌami chiꞌilächilac.
Canan ¡ayipämuy,
ayipämuy!
Nurti lädućhu yaćhäcuna ayipämuy.
7 ¡Babilonia nasyunćhu yaćhä Sion nunacuna ayipämuy!”
nil.
8 Imayquitapis waycä nasyuncunäta willanäpämari sumä munayniyu Tayta Dios caćhamäla caynu nil:
“Mayanpis cuyaśhá nunäta tupaycücá,
ñawi lulüta tupaycücänümi cayan.
9 Chaymi paycunap cuntran maquïta ćhulaycuśhä.
Jinaptïćha quiquinpa uyway nunallancuna lluy waycaypa pawälunꞌa” nil.
Chaynu lulacacuptinmari sumä munayniyu quiquin Tayta Dios yaꞌacta caćhamäśhanta yaćhaycunqui.
10 Tayta Diosmi nin:
“Tuquish Sionćhu yaćhäcuna,
amcunawan yaćhämi śhayämú.
Chayurá cushicuypi taquipäcuy.
11 Chay muyunćhümi achca juc nasyuncuna yaꞌa Tayta Diosman śhapämunꞌa.
Paycunapis malcäña capäcuptinmi paycunap ćhawpinćhu yaꞌa cawsaycuśhä” nil.
Chay nishänu lulacacuptinćha sumä munayniyu Tayta Dios caćhamäśhanta yaćhapäcunqui.
12 Chuya allpaćhu tücänin cananpämi Juda läducta Tayta Dios caśhan ñawillanćhu caycachinꞌa.
Jerusalentapis quiquinpä cananpämari caśhan aclaycunꞌa.
13 Chuya canancäpïmari Tayta Dios śhalcuculcul śhacayämun.
Chayurá paypa ñawpäninćhu upällari lluy capäcuy.