Jatun michïructawan ishcay ulïbus lantactam licachin
4
Chaypïta yaꞌawan limä anjilca cutilcamulmi puñuyä nunacta lichcachïcänu lichcächimäña.
2 Jinalculmi niman:
“¿Imactam licayanqui?”
nil.
Nimaptinmi nilá:
“Licayá,
ürupi luläśha jatun michïructam,
asayti winacu tasunnintinta.
Chaypa janäninćhümi anćhish walanancuna cayan;
chayman asayti ćhänanpäñatacmi anćhish tübucuna cayalcan.
3 Chay jatun michïrup lädunćhüñatacmi ishcay ulïbus lanta cayalcan;
jucninmi allï lädunćhu,
juccäñatac ichü lädunćhu” nil.
4 Chaypïtam yaꞌawan limä anjilcäta nilá:
“Taytay,
¿caycuna imactam tantiachimanchic?”
nil.
5 Niptïmi anjilca:
“¿Manachun imapä caśhantapis yaćhanqui?”
niman.
Nimaptinmi:
“Taytay,
manam tantiallächu” nilá.
6 Niptïmi niman:
“Zorobabeltamá Tayta Dios limapayan:
‘Manam pilyaywanchu nï callpawanchu lulaycuśha canꞌa,
sinuꞌa Ispiritüwanmi.
Yaꞌa sumä munayniyu Tayta Diosmi niyá’ nil.
7 ¿Am jatun ulꞌu,
imallamá canqui?
Zorobabelpa puntanćhuꞌa pasaypi pampamanmá licalinqui.
Alawana wasí simintäśha cananpä allin chalänin lumicta pay ćhulaycuptinmi nunacunaca:
‘¡Maynu tuquim!
¡Ima allinmi!’
nipäcunꞌa” nil.
8 Chaypïtam Tayta Dios niman:
9 “Cay alawana wasïpa simintunta Zorobabelmi ćhulaycula;
paytacmi śhalcachiytapis camacanꞌa” nil.
Chaynu lulacacuptinmi sumä munayniyu Tayta Dios caćhamäśhanta yaćhapäcunqui.
10 Śhalcachiyta allaycuyaptin mana cäpänu licäcunämá,
Zorobabel lulayta camacäluptin cushiculcanꞌa.
Cay anćhish latachicücunaca,
Tayta Diospa ñawincunamá;
payꞌa cay jinantin pachäta tuquictamari licaycuyan.
11 Chaypïtam yapa nilá:
“¿Imactam tantiachimanchic jatun michïrup ishcaynin lädunćhu cä ulïbuscunaca?”
nil.
12 Jinaman yapalämi tapuyculá:
“¿Imactam tantiachimanchic ürupi cä ishcay tübunpa-cama asayti yaycuśhan ishcay ulïbus lantacunaca?”
nil.
13 Niptïmi niman:
“¿Ima ninantapis manachun yaćhanqui?”
nil.
Nimaptinmi:
“Taytallay,
manam yaćhallächu” nilá.
14 Niptïmi anjilca:
“Cay ishcayca,
jinantin pachäta licaycü Tayta Diospa ñawpäninćhu japächaśhana nunacunämari śhäcuyalcan” niman.