Israelta camacaycünanpämi licachin
7
Má,
Tayta Diosmi caynu licachimäla.
Tayta Diosmi achca-achca camacaycü paćhcaśhcunacta allichayäña.
Chay timpu ipa talpuy chillquimunan timpum cala.
Mandacücäpa cusichayta camacäluptin caśhan chillquimunan timpumari cala.a
2 Jinantin allpäćhu lantacunäta paćhcaśhcunaca camacäcuyalcaptinmá yaꞌa nicuyá:
“¡Tayta Diosllay,
Jacobpa milayninta pampachaycälillämayꞌari!
Tacshalla cayal,
¿mayanllá salbacunꞌamá?”
nil.
3 Chayćhümi Tayta Dios llaquipaculcul niman:
“Caynu manañamá pasanꞌachu” nil.
Israelta ninawan camacaycünanpämi willacun
4 Chaypïta Tayta Diosmi jucta caynu licachiman.
Ninawan cäraycunanpämi ayayächiña.
Chay ninam lamarcätawan partin allpäta camacaycuyäña.b
5 Chayćhümi nilá:
“Tayta Diosllay,
manalcachillayñari.
Jacob,
ashchaylla cayaptin,
¿mayanllá salbacunꞌamá?”
nil.
6 Niptinmi Tayta Dios llaquipaculcul nin:
“Caytapis manañamá lulaycuśhächu” nil.
Tayta Dios plumädanta chalaläśhantam licachin
7 Chaypïta caytapis licachimanmi.
Plumädawan śhalcachisha murällap jananćhümi Tayta Dios cayäña.
Maquinćhüñatacmi plumädanta aptilayäña.
8 Chayćhümi Tayta Dios niman:
“¿Amos,
imactam licayanqui?”
nil.
Nimaptinmi yaꞌañatac:
“Wasi luläpa plumädantam licayá” nilá.
Niptïmi Tayta Dios:
“Israel malcämanmi plumädacta ćhulaycuśhä.
Ima mana allinllactapis manamá pampachaycuśhächu.
9 Isaacpa milaynincunap altunnin ulꞌucunäćhu patacnincunacta camacaycüśhämá.
Israelpa uycuna patacnincunacta pampamanmá muyüchishä.
Jeroboampa milaynincunap cuntranmi ispädawan śhalcuśhä” niman.
Amasiaspa cuntranmi Amos willacun
10 Chaynu willacuptinmi Bet-elćhu cä sasirdüti Amasias juc willacüta caćhäla,
Israelpa mandacünin Jeroboamman:
“Amosmi am Israelpa ćhawpiquićhu cuntrayqui śhalcülun.
Chay nishancunacta malcaca manañamá awantayta atipanchu.
11 Chay Amosmari nin:
‘Ispädawanmi Jeroboam wañunꞌa.
Israelñatacmi allpanpïta caluman prïsu puśhaśha canꞌa’ ” nil.
12 Chaypïtam Amasias nin:
“Licacü,
Juda läducta wayra pasacuy.
Chayćhu willapacul bïdayquita pasamuy.
13 Cay Bet-elćhu Israelpa alawana wasin captinmá mandacücäpis Tayta Diosta alawä śhamun.
Chayurá cayćhu manam willacunquimanchu” nil.
14 Niptinmi Amos:
“Yaꞌa manam willacüchu cá,
nïtac willacüpa chulinpischu.
Yaꞌa uwish michïmi cá;
chaynütac ïgusta talpümi cá.
15 Ñatac Tayta Diosmi uwishnïta michiyaptí nimäla:
‘Israel malcäman lilcul willacamuy’ nil.
16 Chayurá Tayta Diosnishanta canan uyaliyꞌari.
Anmi niyanqui:
‘Israelpa cuntran ama willacuychu;
awari,
Isaacpac ayllunpa cuntran amari niyaychu’ nil.
17 Tayta Diosñatacmi caynu niyan:
‘Malcaćhümi walmiqui waticacunꞌa.
Walaśh wamla chuliquicuna ispädawanmi camacaycüśha canꞌa.
Ćhaclayquicunactapis chüsanacaycälilmi aypunacälälinꞌa.
Amñatacmi pasaypi millachicuy allpaćhu wañunqui.
Israelmi malcanpïta calu-caluman prïsu puśhaśha canꞌa’ ” nil.