Ćhaśhäśha rütactam canaśhtaćhu licachin
8
Chaypïtam Tayta Dios juc canaśhtaćhu ćhaśhäśha rütacta licaycachimal niman:
2 “Amos,
¿imactam licayanqui?”
nil.
Nimaptinmi nilá:
“Juc canaśhtaćhu sumä puꞌuśha-cama junta rütactam licayá” nil.
Niptïmi Tayta Dios niman:
“Israel malcá,
sumä puꞌuśha rütanümi mućhuycachinäpä cayan.
Chaymi paycunacta mana pampachaycuśhächu.
3 Alawana wasićhu cushicuy taquicunäpis,
wañupacü llaqui-llaqui taquicunamanmá muyupäcunꞌa.
Achca-achca wañücunamá maymanñapis wicapaycüśha capäcunꞌa.
Chayurá upälla capäcuy.
Yaꞌa Tayta Diosmari niyá” nil.
4 Má,
mana cäniyücunäta jalutacücuna,
jinantin allpäćhu wacchacunäta usuchïcuna,
canan sumäta uyalipäcuy.
5 Amcunamá nipäcunqui:
“Trïgucta lanticunapä ¿imayñatá cay ‘Llullu Quilla Fista’ pasacälinꞌa?
¿Imayñatá jamana muyunca pasanꞌa chaqui micuyninchicta lanticunapä?
Tupucucta mirmatyächishun;
mas-cascactam ćhaninta mañaśhun;
balansactapis chutatyäśhunꞌari.a
6 Chay wacchacunätamari illaywan lantiycuśhun,
mana cäniyücunätañatac jucllay llanquillawan.
Trïgupa pasaypi apshillantapis lanticuśhunmá” nil.
7 Chaymi Jacobpa milaynincunacta cuyal Tayta Dios limalicun:
“Cay nunacunäpa mana allin lluy lulaynincunacta
imaypis manamá unꞌaśhächu.
8 ¿Manachun lluy caycunapi jinantin allpaca chucchunꞌa imamá?
¿Manachun chayćhu cawsäcunaca awćhupäcunꞌa imamá?
Jinantin nasyunmari Nilo mayu sumä-sumä wiñaśhannu,
mirmaśhannu chucchupäcunꞌa” nil.
9 Tayta Diostacmi nin:
“Chay muyunćhümi intïta,
ćhawpi muyun chincachishä;
ćhawpi muyuncäćhümari jinantin allpaca tutawyanꞌa.b
10 Lluy fistachacuyniquicunactamá waꞌacuyman muyuchishä,
lluy taquiquicunactamá aya taquiman muyuchishä.
Llaquicuypïmá shicacü müdanacunawan müdaculcanqui;
ächayquicunactapis siplay-siplaytamá lutuculcanqui.
Japallan chuliquipïnümá awćhuylla cacunꞌa.
Pasaypi ćhacćhayä muyunćhünümá camacapäcunqui” nil.
11 Tayta Diostacmari nin:
“Cay nasyunman
micuy wanayta ćhächimuná timpuca janayquićhüñamá cacuyan;
manamá micuy wanayca yacupïchu micuypïchu canꞌa,
sinuꞌa Tayta Diospa yaćhachicuyninta uyaliycuypi micanäcuymi cacunꞌa.
12 Chaymi nunacunaca ashiyninwan yanꞌal-yanꞌal pulipäcunꞌa,
inti yalamunan lädupi aśhta inti yaycunan läducamapis,
nurti lädupi aśhta sur läducamapis;
Yaꞌa Tayta Diospa yaćhachicuynïta
maynu ashipäculpis manamari talipäcunꞌachu.
13 Jinalmi chay muyuncuna
tuquish-cama wamlacunäpis,
alli-cama müsucunäpis yacupïta lawtïsha capäcunꞌa.
14 Chaynütacmi Samariaćhu,
Danćhu,
Beersebaćhu cä taytachancunap śhutinćhu limalicücunäpis
mana śhalcüña pasaypi palpupäcunꞌa” nil.