Israelta camacaycunanpämi nin
6
¡Ay,
imanuylä capäcunqui Sionćhua jawca cawsäcuna!
¡Ay,
imanuylä capäcunqui Samariap ulꞌunćhu cushisha yaćhäcuna!
¡Ay,
imanuylä capäcunqui sumä nasyunpa puydïninpa am pasachicücuna;
amcunamanmá Israel malcäpis śhapämun!
2 Má,
Calne malcaman liycälil licapämuy.
Chaypi jatun Hamat malcamanpis lipäcuyꞌari.
Chaypïta Filisteob lädu Gat malcaman jiꞌalpapäcuy.
Chay nasyuncunäpi ¿mas alli-camachun amcuna cayalcanqui imamá?
¿Allpayquicunapis paycunapïta mas jatućhaćhä-camachun cayan imatá?
3 Amcuna,
lawćhaycuna muyuncäta calupachiyta munayniquiwan,
aśhwanpamá mana allincällaña timpunanpä aśhuycayalcächimunqui.
4 Amcuna marfilpi luläśha cämacunaćhülämi jitalapäcunquipis;
allin-cama täcunayquicunaćhümá jitaläculcanquipis.
Malta uwishcunacta,
malta allinnin wäcacunactalämá micapäcunquipis.
5 Arpacunactapis wiluy-wiluytam tucapäcunqui;
David tucaśhantalämá atichipäcunqui.
Muśhü taquicunactalämi julupäcunquipis.c
6 Maticunaćhülämi bïnucunactapis upyapäcunqui.
Alli ćhaniyu pirfümicunawanlämi ćhulaculcanquipis.
Ñatac Israel pampaman muyüchisha caśhanꞌa manamá imapis uculcäśhunquichu.
7 Chaymi prïsu puśhaśha cäcunäpä puntanninćhülä
prïsu puśhaśha lipäcunqui.
Chaynüpamá fistachacuyniquicuna,
alli micuyniquicuna camacanꞌa.
8 Sumä munayniyu Tayta Diosmá quiquinta śhaycacaycachil limalicun cay nil:
“Jacobpa nunatucuyninta millachicümi.
Sumä sigüru caynincunacta ćhïnicümi.
Chaymi malcanta chayćhu lluy cänintinta
ćhïnicüninpa maquinman ćhulaycüśhä” nin.
9 Chayćhümá juc wasićhu ćhunca wayapacuna quïdäcäpis
lluy ćhuncantin wañupäcunꞌa.
10 Jinaptinmi ayllun śhamunꞌa julalcamul cañaycunanpä.
Chay wasip tunäninćhu jucnin cayäcätam ninꞌa:
“Chayćhu juc cayanlächun” nil.
Niptinmi payñatac:
“Manañam imapis quïdanñachu” ninꞌa.
Niptinmi:
“Upällaña caśhun;
Tayta Diospa śhutinta ama limalcuśhunchu” ninꞌa.
11 Tayta Diosmá camachinꞌa,
jatun wasi pampaman muyuchisha cananpä;
tacsha wasipis camacaycüśha cananpä.
12 ¿Cawallucunaca,
wanca-wancacunäćhu cürripäcunmanchun imamá?
¿Lamarcäćhüchun yundawan äranchic imatá?
Ñatac amcuná tincüllanman licaycuycäta bininumanmá muyülächinqui;
cällanman licaycuycäta ćhacćhä ajinjumanmá muyülächinqui.
13 Amcuna,
Lodebar malcacta
llallipäcuśhayquipïta cushiculcanquimá:
“¿Manachun callpanchicwan Carnayin malcactapis llallïlunchic?”
nil.
14 Chayurá sumä munayniyu Tayta Diosmá nin:
“Israelcuna,
tuquicta tantiaculcay.
Amcunap cuntrayquim juc nasyunta śhalcachishä,
nurti lädu Hamatpïta aśhta sur lädu Araba mayucama
ñacachipäcuśhunayquipä” nil.