10
Juni-juni üba lantanümá Israel cala.
Munaśhanmannümá wayuycula.
Mas achca cänincuna captinꞌa
mastalämi uycuna pataccunactapis lulaycapäcula.
Ćhaclancuna sumäta wayuycuptinꞌa taytachancunapä
tuqui-tuqui labräśha lumicunactalämá lulaycapäculapis.
2 Ishcay śhunꞌüśhamá Israel cayan.
Cananmi ichá juchancunapïta licaycuśha canꞌa.
Tayta Diosmari,
uycuna patacnincunacta pampaman muyüchinꞌa;
labräśha lumincunactapis camacaycülunꞌamá.
3 Chayläćha nipäcunꞌa:
“Tayta Diosta manchacuywan
mana licaycuptinchicmá mandacüninchic nï canñachu.
Masqui mandacüninchic calpis,
¿imallactá yaꞌanchicpä lulaycunmanmá?”
nil.
4 Paycuna shimin chalaśhallantamá limapäcun.
Limaliculpis yanꞌal-yanꞌalmi limaliculcan.
Chaymi ćhaclap śhucanćhu wañuchicü ulacunänu
quijacunacta licaycücunaca timpuyan.
5 Samaria läducunaca Bet-avena lädućhu
malta wäca taytachanpïmá manchäśha chucchupäcunꞌa.
Chay taytachanpa jananmi sasirdüticunäwan
jinantin malcaca llaquiculcanꞌa.
Chay altuman juluycuśha caśhanpi cushiculcäśhancämá quitäśha canꞌa.
6 Chay wäcamá Asiria läduman apaśha canꞌa
jatun mandacücäta uycuśha cananpä.
Pinꞌayman ćhulaycuśhamá Efrain canꞌa;
taytachancunapä lulaycuśhancunapïtamá pinꞌayman ćhulaycuśha Israel canꞌa.
7 Astillacta yacu apaśhannümi
Samaria lädup mandacüninta apacunꞌa.
8 Aven lädu uycuna pataccunaćhu
Israel juchacuśhancunaca camacaycüśhamá canꞌa.
Chay uycuna patacnincunaćhümi
itañacunawan caśhacunallaña wiñanꞌa.
Chayćhümi ulꞌucunäta “janänïmanña palpälälimuy” nipäcunꞌa.
Ulꞌunpalcücunätapis “ñitilpälälillämayña” nipäcunꞌa.b
9 Tayta Diosmi nin:
“Israel,
amcuna Gabaa lädućhuc
jucha lulayta allaycuśhayqui muyunpïtamá
chay juchallayquićhu tacyacaycälinqui.
Chayurá,
¿manachun juchayücunäta
Gabaa lädućhu gïrraca chalälunꞌa imamá?
10 Amcunacta mućhuycachiyta munalꞌa mućhuycachishayquimá.
Achca-achca juchayquicunapïta mućhuycachiptïmá
amcunawan pilyananpä achca nasyuncuna juntunaculcanꞌa.
11 “Am Efrain,
mansu wäca ïra jaluyta yaćhachisha cäcänümá cayanqui.
Ñatac yügucta manamá ćhulayta munalacchu.
Cananmi ichá tuqui cä cucutiquiman yügucta watäluc.
Am Efrainmi carritacta aysanqui.
Judami äranꞌa.
Jacobpis culpaca maꞌaśha cananpämi chutanꞌa.
12 “Amcuna tincüllanman cäcäta talpupäcuy,
chalapacuna caycäta cusichaycälinayquipä.
Amcuna anä śhunꞌuyquita ärapäcuyña;
Tayta Dios ćhaycamunanpä ashiycälinayqui timpuñamá,
tincüllanman cäcäta amcunaman tamyaycachimunanpä.
13 “Amcuna mana allincällacta talpupäculmá
mana allincällactatac cusichapäculanqui.
Chaymi articuy wayuśhallanta micapäcunqui.
Amcuna carritayquicunaman,
achca pilyäniquicunallamanmari chalapaculcälanqui.
14 Chaymi malcayquicunaćhu sumä-sumä pilyullaña śhalcunꞌa.
Lluy murälläśha malcayquicunamá camacaycüśha canꞌa.
Bet-arbel malcacta lluy walmicunätapis wawintin-camacta
mandacü Salman camacaycüśhannümari camacaycüśha canꞌa.
15 Sumä-sumä juchayquicunapïta
chaynümá am Bet-elwan lulaycunꞌa.
Wäläluptinmi Israelpa mandacünin
wiña-wiñaypä camacaycüśha canꞌa.