Egiptoćhu cayaptinmá chulïta ayaycamulá.^a

2 Masta-masta ayaycuptí aśhwanpam

yaꞌapïta masta-masta aśhucula.

Baal taytachacunamanmá uywacunacta cañaywan uycula;

taytachacunämanmá insinsiucunacta cañaycula.

3 “Efrainta yaꞌami puliyta yaćhachilá;

yaꞌami maquillapïta puśhayculá.

Ñatac ñawilläćhu licaycuśhäta payꞌa manamá awniyta munalachu.

4 Paycunacta sumä cuyaywanmi puśhayculá.

Chulinta malayllanćhu ishpichïcänümá ishpiycachilá.

Apaśhan yügunta pasquiyculmá micuyta uyculá.

5 “Ñatac yaꞌaman cutipämuytá manamá munapäcunchu.

Chaymi Egipto läduman manaña cutipäculpis,

Asiria lädup mandacüninpa maquinćhüña capäcunꞌa.

6 Malcancunacta ispädamá camacaycülunꞌa.

Jinantin malcanmá pampaman muyüchisha canꞌa.

Quiquincuna tantiaśhanmannu lulapäcuśhanpïtamari camacaycüśha capäcunꞌa.

7 Awari,

malcäpä śhunꞌunćhu ipanchamänanpämi cayan.

Janay pachäćhu cäcäta ayaycaćhapämalpis

manatacmá altuman julaycälimanchu.

8 “Efrain,

¿imanuypamá amta jitälucman?

Israel,

¿imanuypamá jucpa maquinman amta ćhulaycülucman?^b

¿Imanuypamá Adma malcactanu lulälucman?

¿Imanuypamá Zeboim^c malcactanu caćhaycülucman?

Amta cuyaynïwan llaquicuptïmá śhunꞌulläpis nanaycun.

9 Manamá sumä piñacüśha caśhämannüchu lulaycuśhä.

Manamá Efrainta pampaman caśhan muyuchishächu.

Amcunapa ćhawpiquicunaćhu manamá nunallachu cayan,

sinuꞌa Chuya cä Tayta Diosmá cayan.

Chayurá camacaycüchu manamá śhamuśhä.

10 “Amcuna,

yaꞌa Tayta Diosmanmá śhapämunqui.

Liyunnu yaꞌa apalcaćhaptïmari

inti jiꞌalpunan lädupi am chulïcuna

chucchuśhtin śhapämunqui.

11 “Egipto lädupïmari pälïcänu paliylla-pälil śhapämunqui.

Asiria lädupïñatac ulpaynu chucchuśhtin śhapämunqui.

Wasiquićhu-cama yaćhapäcunayquipämi cutiycälichishayqui.

Yaꞌa Tayta Diosmari niyá.

12 “Artillancunawanmá Efrain cunćhalayäman.

Ingañacuyllanwanmá Israel muyupayäman.

Judami Tayta Diosninta caćhaycul pulicun.

Chalapacuna cä Chuya Tayta Diospi calupaculculmari puliyan.^d