Israel läducta lawćhaycunanpämi nin
9
Israel,
ama cushicuychu.
Juc malcacunänu cushicuypi ama paćhcaycaćhayaychu.
Tayta Diosniquipi japächacuyculmá mansibädu walminu cayanqui.
Chay trïgu ïraćhu waticacuśhayquipi
ćhasquishayquitamá ama-pacha niyanqui.
2 Chaymi amcunapä ïraćhu trïgupis manaña canꞌañachu;
üba apchinaćhu bïnupis nï canꞌañachu.
3 Tayta Diospa allpanćhu manañamá yaćhapäcunquiñachu.
Egipto lädumanmá Efrain cutipäcunꞌa;
Asiriaćhümi anlapä licaśha micuycunacta micapäcunꞌa.
4 Chayćhu Tayta Diosman manañamá jićhanacunacta uycapäcunquiñachu.
Cañaywan uycuśhayquicunaca manañamá paypa śhunꞌunpäñachu canꞌa.
Ayacta yatä nuna anlapä licaśha cäyäcänümari micuyniquicunapis anlaña canꞌa.
Chayta lluy micücunämá anlaman licalipäcunqui.
Chay tanta,
Tayta Diospa wasinman manamá yaycunmanchu;
quiquillayquicunapäñamá canꞌa.
5 Chayurá Tayta Diospa fista muyunninćhu,
¿imactatá lulapäcunqui?
Juntunacunayqui fista muyunćhu,
¿imactatá fistachaculcanqui?
6 Masqui camacaycüśha caśhayquipi ayipäcuptiquipis Egiptomá chalälälishunqui.
Menfisa lädumanmá pampälälishunqui.
Illaypi luläśha cäniquicunapis itañap juntäśhañamá cacunꞌa.
Yaćhaśhayquicunäćhüpis caśhacunallañamá cacunꞌa.
7 Israel,
¡yaćhaycuyñari!
¡Mućhuycachina muyunca jiꞌacaycayämunñamá!b
¡Tincüninman uycuna muyunca cayllaćhüñamá cacuyan!
Amcunap jatu-jatunmá juchayquicuna;
sumä-sumämá ćhïnipayniquicuna.
Chaymi Tayta Diospa willacüninta luclupa licapäcunqui;
caćhacuśhan nunäta mana tantiayniyüpa licapäcunqui.
8 Quiquin Tayta Diosmari willacüninta ćhulaycula Israelćhu licänin cananpä.c
Amcunañatacmi ichá willacücäpa
puliśhancunäman trampacunacta maśhtayalcanqui.
Tayta Diospa wasinćhüpis ćhïnipayalcanquimari.
9 Gabaad lädućhu mana allin lulapäcuśhanmannümáe
amcunap mana allin lulayniquicuna cayan.
Chay juchayquicunacta Tayta Dios yalpalayanmá.
Chaymari juchayquicunapi mućhuycälichishunqui.
10 Tayta Diosmi nin:
“Chunyäcäćhu übacta talïcänümá Israelta taliyculá.
Ïgus lantap wamä wayuyninta
talïcänümá awquilluncunacta taliyculá.
Ñatac paycuna Baal-peor taytachaman
muyucalcälilmi anla lulaycunacta lulapäcula.f
Chay taytacha cuyaśhancunänümari
pasaypi millachicuy anlaman muyülälila.
11 “Efrainpa sumä caynin pälï pishunümá pasacunꞌa.
Walmicunaca manañamá patacta taliculcanꞌañachu.
Manañam wawicta patalapäcunꞌañachu;
manañamari ishyaculcanꞌañachu.
12 Masqui wawincunacta ishpïlächiptinpis
cay allpäpïta yaꞌami chincächishä.
Paycunapi japächacüluptí,
¡imanuylä capäcunꞌa!
13 Efrainta tuqui allpaćhu talpüśha palmïractanümi licayculá.g
Ñatac cananꞌa wañuchicücunämanñam chulincunacta puśhaycälälinꞌa” nil.
14 Tayta Diosllay,
imam tincüninman uycunayquitari uycüluy.
Walmincuna patacta mana talicü-camaña capäcuchun;
ñuñuncunapis chaquïchunñari.
15 Tayta Diosmi nin:
“Amcuna,
lluy mana allincunacta
Gilgal lädućhümáh lulayta allaycapäculanqui.i
Chayćhümi amcunacta ćhïnipayta allayculá.
Chay anla lulaśhayquicunapïmá allpäpïta alapacüśhayqui.
Lluy puydïniquicunamá pasaypi cullu linli-cama capäcun.
Manañamá cuyapäcuśhayquiñachu.
16 Efrain ishyayanmi;
sapin chaquïsha cayalmá manaña wayunꞌachu.
Masqui chulicuptinpis
chay cuyay chulinta wañüchishämá” nil.
17 Paycuna,
Tayta Diosnïta mana uyaliculcaptinmá wicapälunꞌa.
Jinaptinmi nasyuncunäćhu
yanꞌal pulicünüña taplaycaćhapäcunꞌa.j