Nunäcuna limalicuynïta jalutaculcäśhanpïta,

jinaman yaćhachicuynïta mana cäsuculcäśhanpïtamari,

Tayta Diospa malcanpa cuntran,

ćhïnicünincuna ancanu śhacayämun.

2 Chaynu cayalcalpis apalcaćhaśhtinlämi ayacalcäman:

‘Anmi Israelpa Tayta Diosllá canqui’ nil.

3 Chaynu mañacalcämalpis ñatac allincäta Israel wicapälunñamá.

Chaymari ćhïnicünincuna aticaćhapäcunꞌa.

4 “Yaꞌacta mana tapuycamalmá mandacücunacta ćhulälälin.

Mana yaćhaycachimalmá puydïcunacta ćhulälälin.

Illaynincunawan,

üruncunawanmá taytachancunacta lulacälälin.

Chaycuna quiquinpä cunca cuchuyninpämari cayan.

5 “Samaria malca,

wäca taytacha^a alawaśhayquita millachicümá.^b

Amcunap cuntrayquimá sumä piñacülú.

Israelcuna,

¿imaycamañamá juchayüllaña cayalcanqui?

6 Israelcuna,

cay alawapäcuśhayqui wäca taytachaca,

aläja lulä nunallap lulaśhallanmari.

Manamá Tayta Dioschu.

Chaymi uchuy-uchuyllaman amshüśha canꞌa.

7 “Paycuna waywacta talpuyalcalmá

sumä manchanaśh bintucta cusichapäcunꞌa.^c

Trïguncuna mana ishpiptinmá

arinallapäpis nï canꞌachu.

Masqui wayuptinpis mana Israel caśhtacunämá micacälälinꞌa.

8 Israel läducunaca millpüśhamá licalïlälinꞌa.

Mana bälï cutuśh mancanümá juc nasyuncunäpä licalïlälinꞌa.

9 Israelcunaca Asiria läducta liypïmi wañupacuyalcan.

Paycuna pasaypi munti aśhnunümá capäcun.

Efrainmi waynancuna yanapänanpä pägayan.

10 Chaynu nasyuncunäta mincacüluptinpis,

chay nasyuncunätamá yaꞌa juntuycuśhä camacaycünanpä.

Sumä mandacücäpa^d maquinćhümari

ash timpulla ñacapäcunꞌa.

11 “Uycuna pataccunacta Efrain śhalcachipäcula juchancuna pampachaycuśha cananpämari.

Ñatac chay uycuna pataccunämi mana allincunallacta lulananman muyüla.

12 Paycunapä achca yaćhachicuycunacta isquirbiycuptïpis,

paycunactá imapis manamá uculcälachu.

13 Paycuna uycuna aychacta uycamaypi wañupaculcan,

uycuna aychacta micapäcunan-laycullamá.

Ñatac chay lulaśhan manamari yaꞌa Tayta Diospa śhunꞌupänüchu.

Chay mana allin lulaynincunacta manamari unꞌaycuśhächu.

Juchancunapi mućhuycachilmá Egipto läduman cutichishä.

14 Israelcunaca luläninta unꞌayculmá

palasyucunacta lulacälälin.

Juda läducunaca sumä murälläśha malcancunactamá śhalcälächin.

Ñatac chay sumä sigüru caśhancunacta yaꞌami cañaycüśhä.

Murälläśha malcancunacta pampamanmari yaꞌa muyüchishä” nil.^e