2
Jinaptinmi wawꞌi-caśhayquicunacta nipäcunqui:
“Tayta Diospa malcanmi capäcunqui” nil.
Paniquicunactañatacmi nipäcunqui:
“Llaquipaycuśham capäcunqui” nil.
Ipanchä malcactam Tayta Dios cuyan
2 Mamayqui Israeltañatac cäranćhu niycuy:
“Pay cananpi manañamá walmïñachu;
yaꞌapis manañamá wayapanñachu cá.
Amaña waticacunanpä pintapacuchunñachu.
Jucwan-jucwan cacunanpä
macallachicuśhan waynancunactapis caćhaycuchunña.
3 “Chaynu mana lulaptinꞌa lluy-lluytamá quitäśhä.
Calanllantamá caćhaycüśhä;a
näsimuśhantanüllamá caćhaycüśhä.
Pasaypi pulumäśhactanümá luläśhä.
Pasaypi chaqui allpactanümá caćhaycüśhä;
yacupïmá wañuchishä.
4 Wawincunactapis manamá llaquipaycuśhächu.
Chay wawincuna,
waticacuśhanćhu waćhapacuśhancunamá.
5 Maman jucwan-jucwan cacü walmimá.
Waćhaśhanca pinꞌayninmá.
Paymari nin:
‘Waynäcunactam aticuśhä.
Paycunamá micuyta,
yacucta,
millwacta,
lïnucta,
asayticta,
upyanäpä cäcunactapis uycapäman’ nil.b
6 “Chaymi pulinancäta caśhacunawan wićhäśhä.
Caminucta manaña talinanpämá inćhawanc wićhäśhä.
7 Waynancunacta maynu-maynu atilpis
manañamá alcansanꞌañachu.
Ashilpis manañamá talinꞌachu.
Jinalmi ninꞌa:
‘Punta wayapäman cuticuśhä.
Canan caśhäpïtá,
paywan puntacta cayal allinmi calá’ nil.
8 Pay manamá tantiayta munalachu trïgucta,
bïnucta,
asayticta yaꞌa uycüca caśhätapis.
Yaꞌamari achca illayta,
üructa uycüca calá.
Chaycunawan ¿imactamá lulälun?
Taytachan Baaltamá lulälälin.
9 “Chaymi cusicha timpu ćhämuptin cutilcamul
trïgüta,
muśhü bïnütapis cutichicuśhä.
Calalla caśhanta täpa cunanpä uycuśhá millwätapis,
lïnütapis quitäśhämá.
10 Lluy waynancunap ñawpäninćhümi calanllacta caćhaycüśhä.
Yaꞌapa maquïpïta manamá
mayanpis libraycuyta atipanꞌachu.
11 Lluy cushicuynincunacta chincächishämá.
Lluy fistancunacta,
llullu quillaćhu,
jamana muyunćhu,
juc fistachacuynincunactapis chincächishämari.d
12 Üba,
ïgus lantancunacta cuchüchishämá.
Chaycunapïmi nila:
‘Caycuna,
waynäcuna pägamäśhanmi cayan’ nil.
Chaycunacta muntiman licalïchiptïmá
munti uywacunallaña micapäcunꞌa.
13 Mana bälï taytacha Baalcunaman insinsiucunacta
cañaycuśhancunapïtamá lawćhaycuśhä.
Yaꞌacta unꞌaycamalmá cullarcunawan,
surtijacunawan ćhulapaculcul cuyaśhan waynancunap ipanta licula.
Yaꞌa Tayta Diosmari niyá.
14 “Payta yaꞌa Tayta Diosmari awnichishä.
Chunyäninman puśhalculmá
chayćhu śhunꞌunta suwaycuśhä.
15 Chayćhümi wamla caśhannu limapaycamanꞌa;
Egiptopi yalamuśhannu chalapacamanꞌa.
Chaypïta üba lantancunacta caśhanmi uycuśhä.
Acore pampactam allin caycuna pampaman muyuycachishä” nil.f
16 Tayta Diosmi nin:
“Chay muyunćhu
manañam imaypis ‘Baali’g nimanquiñachu,
aśhwanpañam ‘Wayapäní’h nil nimanqui.
17 Unꞌächiptïmari chay yanꞌal taytachayqui
Baalcunap śhutincunacta manaña imaypis limalcunquiñachu.
18 Chay muyunćhümá Israel läducuna jawca capäcunanpä
munti uywacunäman,
sïlüćhu pälïcunäman,
allpäćhu śhullwaypa pulï culibraycunäman limalicuśhä.
Cay allpäpi flïcha ćhächicucta,
ispädacta,
gïrracta chincächishä jawcallaña jamapäcunanpämá.
19 Wiña-wiñaypäñam walmí canqui.
Tincüllanman,
cällanman cänïwan,
jinaman cuyacuywan,
llaquipaywanmá casaraśhayqui.
20 Amllacta cuyanacpämá rasunpa cuscacuśhun.
Chaymi yaꞌa Tayta Diosta lisimanqui.
21 “Tayta Diosmari nin:
chay muyunćhümi mañacamäśhayqui pucutayta,
am sïlüman uycuśhayqui;
am sïlüñatacmi allpäman tamyaycachinqui.
22 Am allpäñatacmi trïgucta,
bïnucta,
asayticta wayuycachinqui.
Chaycunawanmi Jezreel allin caycunꞌa.
23 Malcätamá cay allpäćhu tacyaycachishä.
‘Mana cuyaśha’i nishan malcamanmi
cuyacuynïta camalaycachishä.
Mana malcá cäcunätam ‘anmi malcáj canqui’ nishä.k
Payñatacmi:
‘Anmi Tayta Diosní canqui’ nimanꞌa” nil.