Watica walminta Oseas cuyananpämi nin
3
Chaypïtam Tayta Dios caśhan niman:
“Achca waynanwan waticacü walmiquita cuyamü wayra liy.
Israelcunäta yaꞌa Tayta Dios cuyaśhänuꞌari cuyay.
Masqui juc taytachacunaman muyucalcälil alawapäcuptinpis,
päsas culpachäśhacta micuypi wañupaculcaptinpis paycunacta cuyämi” nil.
2 Nimaptinmi ćhunca pichayu (15) illayta,a
quimsa paćhac quimsa ćhunca (330) quïlu siwäta chay walmïpä pägayculá.
3 Jinalculmi walmïta:
“Achca watam am yaꞌawan caycunqui.
Jucwan-jucwan cayta manalcuyñari;
mansibacuytapis caćhaycuyñari.
Amwan manam yaꞌa puñuycuśhächu”b nilá.
4 Chaynümari Israel läducunaca achca timpucuna mana mandacüniyu,
mana puydïniyu,
cañaywan uycunactapis manaña uycul,
lumi śhaycächishactapis manaña alawaycul capäcunꞌa;
jinaman sasirdütip chalicunpisc manañamá canꞌachu,
nï ayllucunaćhu cä taytachacunapis canꞌañachu.
5 Chaypïta Israel läducunaca Tayta Diosninta,
jinaman mandacünin Davidtapis caśhanmi ashipäcunꞌa.
Śhamü muyuncunäćhümari sumä manchacuywanña Tayta Diosta licaycälinꞌa;
lluy uycuśhancunactapis allinpañamari licaycälinꞌa.