Oseas
Willacü Oseas Isquirbishan
1
Juda lädup mandacünin Uzias,a
Jotam,b
Acaz,c
Ezequiasd mandacuśhan timpucunaćhümi,
jinaman Joaspa chulin Jeroboame Israel läducta mandacuśhan timpućhümari Beerip chulin Oseasta Tayta Dios limapäla.
2 Tayta Diosmi limapayta allaycul Oseasta caynu nin:
“Cay Israel malcaca waticacülunmi.
Tayta Diospi japächacülunmari.
Chayurá ampis watica walmiwan casaracü liy.
Jinal chuliquicuna cachun” nil.
Oseaspa walmin imanuy caśhanpis
3 Niptinmi Diblaimpa wamla chulin Gomer nishanwan Oseas casaracüla.
Paymi patayu licalilcul walaśhta ishyacüla.
4 Chayćhümi Oseasta Tayta Dios nin:
“Chay chuliquita ‘Jezreel’f nïta śhutichäluy.g
Chaynu ćhulanqui Jezreel malcaćhu nunacunäta mandacü Jehu wañuchishanpïtamá mućhuchishä.
Israel lädup mandacuyninta pampamanmari muyüchishä.
5 Chay muyunćhümari Jezreel pampaćhu Israel lädup pilyänincunacta camacaycüśhä” nil.
6 Chaypïtam Gomer caśhan patayu licalilcul juc wamlacta ishyacüla.
Chayćhümi Oseasta Tayta Dios nin:
“Payta śhutichay ‘Mana cuyaśha’h nïta.
Chaynu ćhulanqui Israel läducta manaña llaquipaycuná,
pampachaycuná captinmari.
7 “Juda läductañatacmi ichá llaquipaycuśhä,
salbaycuśhä.
Manamá flïcha ćhächicuwanchu,
ispädawanchu,
gïrrawanchu,
nï cawallucunawanchu,
sillädacunawanchu salbaycuśhä,
sinuꞌa yaꞌa quiquin Tayta Diosninmi munaynïwan salbaycuśhä” nil.i
8 Chaypïta Gomer “Mana cuyaśha” nishan wawinta wasilculmi caśhanñatac patayu licalilcul juc walaśhta ishyacüla.
9 Chayćhümi Oseasta Tayta Dios nin:
“Payta śhutichäluy ‘Manam malcächu’j nïta.
Chaynu ćhulanqui amcuna malcá mana capäcuśhayquipïmi;
yaꞌapis manamá Tayta Diosniquichu cá” nil.
10 Chaynu captinpis,
Israel läducunaca mana fintaycuna,
mana tupuycuna lamarcäćhu cä awishquicunänümá
achca-achca capäcunꞌa.k
Mayćhümi nishulanqui:
“Malcächu manam capäcunqui” nil,
chayćhütacmi “Cawsä Tayta Diospa chulincuna” nishatac capäcunquipis.l
11 Chaylämi Juda läducunaca Israel läducunäwan juntunacuycul,
juc puydïllactaña ćhulapäcunꞌa.
Caśhanmi chillquilipäcunꞌa.
Chay muyun Jezreelćhu sumä cushicuymá cacunꞌa.